Read Nguna Togoa Etafe North EKSODAS 28 Bible Online

EKSODAS 28 - Nguna Togoa Etafe North bible

EKSODAS 28

¹Go nigo pa viragi umai paki m̃aladigi ki‐go taim̃a Aaron, go natuna maga euga sikoti a, m̃elu dua ki m̃aleoputo ni Israel natuna maga, naga ega maginau suasua nawosiana ki tea viri, Aaron, Nadab, go Abihu, Eleasar go Ithamar, Aaron natuna maga.

²Go p̃a magi taim̃a Aaron mari sugoro tapu maga ni nasamasamaana go ni narekeikiana.

³Go nigo p̃a vasa paki tea p̃op̃o manumatua mamau puti, waina a pakavuro ra ki naata ni namanumatuaana, naga euga mari sugoro maga ki Aaron naga ega tapugoro e, naga ega maginau suasua nawosiana ki tea viri.

⁴Go tea maga waia eu pei sugoro maga waina euga mari ra; tea taurum̃a sikai, go efod sikai, go sugoro varau sikai, go sugoro tokop̃ai nawilina sikai ni namidiria tuakotokotoviana, go tap̃au vivisiana sikai, go tasoki sikai: go euga magi taim̃a Aaron go natuna maga mari sugoro tapu maga, naga ega maginau suasua nawosiana ki tea viri.

⁵Go nara euga tape kold wanogoe go tea kesakesa wanogoe go tea miala‐kesakesa wanogoe, go tea miala‐kalakala wanogoe, go linen wia wanogoe.

⁶Go euga mari efod ega vei tea ni kold, ni tea kesakesa, go tea miala‐kesakesa, tea miala‐kalakala, go linen vilokiana wia, nawosiana ki tea vausi midiria mataisau.

⁷Ega vilake napauna dua, waina eroga vei tea tasokatakiana paki namatap̃agona dua, naga ega vei tea tasokatakiana.

⁸Go tasoki midiria vausiana ki mataisau, waina e doko asa, waina e dasoki a asa, ega tapala nawosiana kakana, go ega vei tea sikai maau ma nae; tea ni kold, tea ni tea kesakesa, go tea miala‐kesakesa, go tea miala‐kalakala, go linen vilokiana wia.

⁹Go p̃a tape vatu ni natap̃alakisi dua, po dae midiri ara nagisa maga ni Israel natuna maga:

¹⁰Elatesa ni nagisada maga euga toko vatu sikai, go nagisa maga ni elatesa waina eu ko doko euga toko vatu kerua, euga tapala navakilinaana adeada.

¹¹Nawosiana ki tea tae midiri vatu, dapala natae‐midiriana maga ni tea vulusoki sikai, p̃a tae midiri vatu dua wanogoe, pae nagisa maga ni Israel natuna maga: p̃a mari ra eroga vei tea taligoroana ki tea taligoro maga ni kold.

¹²Go p̃a toropusi vatu dua wanogoe eroga toko napau maga ni efod, naga eroga magi Israel natuna maga pei vatu ni namidoakilagatiana: go Aaron ega tapetape nagisada maga narae ni Yehovah doko napauna dua naga ega vei namidoakilagatiana sikai.

¹³Go p̃a mari tea taligoro ni kold:

¹⁴Go namori dua ni kold tautau; p̃a mari ra eroga vei viria dua, nawosiana ni tea viriana: go p̃a toropusi namori viriana dua wanogoe eroga toko tea taligoro dua wanogoe.

¹⁵Go p̃a mari tea taurum̃a sikai ni navasap̃otaeana, nawosiana ki tea vausi midiria mataisau; p̃a mari a ega tapala nawosiana ni efod; p̃a mari a ega vei tea ni kold, tea ni tea kesakesa, go tea miala‐kesakesa, go tea miala‐kalakala, go linen vilokiana wia.

¹⁶Ega vei p̃alavati go tea vekeruakiana; nakisitotowoana sikai ega vei navarauana kakana, go nakisitotowoana sikai ega vei naweleweleana kakana.

¹⁷Go p̃a vakavuro paki asa navakavuroana ni vatu, ovara pati ni vatu: ovara sikai ni sardius, topas, go karbunkel ega vei ovara vea;

¹⁸Go ovara kerua ega vei emerald sikai, safir sikai, go daimond sikai;

¹⁹Go ovara ketolu ega vei yasinth sikai, akate sikai, go amethust sikai;

²⁰Go ovara kevati ega vei berul sikai, go natap̃alakisi sikai, go yasper sikai: euga vei tea taligoroana ki kold doko navakavuroana kakada maga.

²¹Go vatu maga wanogoe euga vae nagisa maga ni Israel natuna maga, rualima sikai tamate dua, euga vae nagisada; dapala natae‐midiriana maga ni tea vulusoki sikai, sara naatam̃oli euga vae nagisada sikasikai sarasara ra, euga vei agi naworaworana rualima sikai tamate dua.

²²Go p̃a mari eroga toko tea taurum̃a namori dua dapala viria dua, nawosiana ni tea viriana ni kold tautau.

²³Go p̃a mari eroga toko tea taurum̃a rig dua ni kold, go p̃a toropusi rig dua wanogoe eroga toko namatap̃ago dua ni tea taurum̃a.

²⁴Go p̃a toropusi namori viriana dua ni kold wanogoe eroga toko rig dua waina ero doko namatap̃ago dua ni tea taurum̃a.

²⁵Go namatap̃ago dua kerua ni namori viriana dua p̃a toropusi ra eroga toko tea taligoro dua wanogoe, go p̃a toropusi ra eroga toko napau dua ni efod, paki kivea kakana.

²⁶Go p̃a mari rig dua ni kold, go p̃a toropusi ra eroga toko namatap̃ago dua ni tea taurum̃a, doko nadigina waina e paki taleva ni efod waina e paki ekopu.

²⁷Go p̃a mari rig dua ni kold, po doropusi ra eroga toko napau dua ni efod etano, paki kivea kakana, m̃aladigi ki natasokatakiana kakana, elagi ni tasoki midiria vausiana ki mataisau ni efod.

²⁸Go euga tuti tea taurum̃a pae rig kakana dua paki rig dua ni efod ki natali sikai ni tea kesakesa, naga ega toko tasoki midiria vausiana ki mataisau ni efod, go naga tea taurum̃a ega ta pei tea veresiana m̃elu dua ki efod mau.

²⁹Go Aaron ega tapetape nagisa ni Israel natuna maga doko tea taurum̃a ni navasap̃otaeana doko nap̃op̃ona, ragi waina ega vaki ekopu ni tokora tapu, naga ega vei namidoakilagatiana sikai narae ni Yehovah sara ragi.

³⁰Go p̃a toropusi euga toko tea taurum̃a ni navasap̃otaeana Urim go Tummim; go euga toko nap̃op̃o ni Aaron ragi waina ega vaki ekopu narae ni Yehovah: go Aaron ega tapetape navasap̃otaeana ni Israel natuna maga doko nap̃op̃ona narae ni Yehovah sara ragi.

³¹Go p̃a mari sugoro varau ni efod ni tea kesakesa mau.

³²Go malo masai sikai ni nap̃auna ega toko m̃aleoputo kakana: nadigi ni malo masai kakana ega vilake tea silae sikai daliviri, nawosiana ki tea vausi, ega tapala malo masai ni sugoro sikai ni navakalo naga ega ta mawora mau.

³³Go p̃a mari euga toko namatap̃agona maga pomekranet magi ni tea kesakesa, go ni tea miala‐kesakesa, go ni tea miala‐kalakala, doko namatap̃agona maga daliviri; go bell maga ni kold namawota kakada daliviri:

³⁴Bell sikai ni kold go pomekranet sikai, bell sikai ni kold go pomekranet sikai, doko namatap̃ago maga ni sugoro varau daliviri.

³⁵Go ega toko Aaron naga ega suasua: go nadaleona ega vei tea rogoana ragi waina ega vaki ekopu ni tokora tapu narae ni Yehovah, go ragi waina ega tave umai, naga ega ta mate mau.

³⁶Go p̃a mari tea welewelea sikai ni kold tautau, go p̃a tae midiri asa, dapala natae‐midiriana maga ni tea vulusoki sikai, TEA TAPU KI YEHOVAH.

³⁷Go p̃a toropusi a ega toko natali sikai ni tea kesakesa, go ega toko tap̃au vivisiana; ega toko kivea ni tap̃au vivisiana.

³⁸Go ega toko narae ni Aaron, go Aaron ega tapetape namarinaleotageleana ni tea tapu maga waina Israel natuna maga euga wo dapugoro e doko navituaana tapu adeada mamau puti; go ega toko naraena sara ragi, naga euga vei tea saup̃iakiana narae ni Yehovah.

³⁹Go p̃a vausi midiria duakotokotovi a sugoro tokop̃ai nawilina ni linen wia, go p̃a mari tap̃au vivisiana sikai ni linen wia, go p̃a mari tasoki sikai, nawosiana ki tea turi‐midiria.

⁴⁰Go p̃a magi Aaron natuna maga mari sugoro maga tokop̃ai nawilida, go p̃a madeada mari tasoki maga, go p̃a madeada mari tap̃au vivisiana varau ni nasamasamaana go ni narekeikiana.

⁴¹Go p̃a sugoro taim̃a Aaron ara, go natuna maga sikoti a; go p̃a vuvurai ki da, po pakavuro nam̃elearuda, po dapugoro ra, naga euga maginau suasua nawosiana ki tea viri.

⁴²Go p̃a madeada mari vasiana vuru maga ni linen waina euga kovagoro nap̃okasi ni nam̃alam̃alaana adeada, euga vae nawareda pa pa paki namaoda:

⁴³Go euga toko Aaron go natuna maga, ragi waina euga vaki ekopu ni tap̃aup̃au ni nasaisaiana, kite ragi waina euga umai paki m̃aladigi ki wede ni naviriana naga euga suasua tokora tapu; naga euga ta dapetape namarinaleotageleana, po mate mau: ega vei natawonakiana sikai waina ega tu du po du mau du paki nia go paki naworaworana maga waina euga wo edakugoro e.