Read Nguna Togoa Etafe North EKSODAS 34 Bible Online

EKSODAS 34 - Nguna Togoa Etafe North bible

EKSODAS 34

¹Go Yehovah e noa ki Moses, e naga, P̃a manigo dae tea welewelea dua ni vatu dakiusi tea vea, go aga wo midiri doko tea welewelea dua wanogoe navasaana maga waina eu doko tea welewelea dua vea waina ku mari p̃oraworae ra.

²Go p̃a vei tea marim̃atakiana sua raki malip̃ogi, go p̃a sake umai malip̃ogi paki tava Sinai, go p̃a lawodu raki nau tokora wanogoe nap̃au ni tava.

³Go te naata sikai ega ta sikoti ko sake umai mau, go te naata sikai ega ta pei tea vunusiana te tokora sikai ni tava mau; go navata maga ni shiip go ni naninani go navata maga ni kau euga ta ganikani narae ni tava wanogoe mau.

⁴Go e dae tea welewelea dua ni vatu dakiusi tea vea; go Moses e duleana malip̃ogi loaloa, po sake paki tava Sinai pano, dapala waina Yehovah e dip̃aki sua e, go e dape tea welewelea dua ni vatu ero doko nam̃elearuna.

⁵Go Yehovah e doko napopouru siwo, po lawodu sikoti a tokora wanogoe, po dogorogo ki nagisa ni Yehovah.

⁶Go Yehovah e liu naraena, po dogorogo, e naga, Yehovah, Yehovah, Sup̃e maritadodomi go saup̃ia, e daliali namaetoana, go e lapalapa nadodomiana go nalomauana;

⁷E do magi manu maga pavaigoro nadodomiana, e do dape lua namarinaleotageleana go natapiriana go namarinaleosaana: go waina ega wo da do noa naga sogi e puoli mau; e do parati natuda namarinaleotageleana ki tamada, go natuda natuda, tagona ketolu go kevati.

⁸Go Moses e mari m̃araverave, po kolo pakitano po suai natano.

⁹Go e naga, A pe vap̃ai nasaup̃iaana namatam̃a, Nawota O, Nawota ega vano m̃aleoputo kakagami, a pavara ni ko asa; nalakena eu pei narei ni noa kasua, go p̃a maginami midoakikorokoro namarinaleotageleana aginami go namarinaleosaana aginami, go p̃a viragi gami auga vei tea veanipiolikiana anigo.

¹⁰Go e naga, P̃a leo, kinau aga mari navasasokiana sikai: aga wo mari tea ni namagaana maga narae ni narei anigo mamau, waina eu ko da pei tea mariana te tokora sikai ni maramana mau, go te nalauna sikai mau: go narei mamau waina nigo ku doko m̃aleoputo kakada euga wo punusi nawosiana ki Yehovah, nalakena tea waina kinau a naga aga mari a sikoti ko e pei tea mataukiana.

¹¹P̃a manigo pavaigoro tea waina kinau a dip̃aki‐go asa masoso: p̃a leo, aga kopasi lua pa dua ki naraem̃a naworawora ni Amor, go naworawora ni Kanaan, go naworawora ni Heth, go naworawora ni Peris, go naworawora ni Hivah, go naworawora ni Yebus.

¹²P̃a tum̃am̃a pavaigoro ko, ku pe mari navasasokiana sikai paki naatatoko maga ni navanua waina nigo ku paki asa pano, e pe vei nasasa sikai m̃aleoputo kakam̃a:

¹³Ma kuga rakai wede ni naviriana adeada maga, po p̃oka p̃oraworae nasup̃e ni vatu adeada maga, go kuga takotokotovi Asherah adeada maga:

¹⁴Nalakena p̃a ta lotu ki te sup̃e p̃ota sikai mau: nalakena Yehovah, waina nagisana e pei Totowokasua, e pei Sup̃e totowo kasua:

¹⁵Ku pe mari navasasokiana sikai paki naatatoko maga ni navanua, go eu pe maripele dausi sup̃e adeada maga, po mari naviriana paki sup̃e adeada maga, go te naata e pe vitautau ako go ku pe kani naviriana aneana seara kakana;

¹⁶Go ku pe magi natum̃a naanoai maga piragi natuda nagoroi maga seara kakada, go natuda nagoroi maga eu pe maripele dausi sup̃e adeada maga, po mari natum̃a naanoai maga eu pe maripele dausi sup̃e adeada maga.

¹⁷P̃a ta manigo mari te sup̃e takiana sikai mau.

¹⁸P̃a to pavaigoro nasaisaiana ni bred waina leven e dika asa, ega tapala waina a dip̃aki‐go asa, ragi tatutakiana kakana atelagi Abib: nalakena atelagi Abib ku m̃elu dua ki Ityipt umai asa.

¹⁹Tea mamau puti waina eu pea pakilina eu pei aginau; go katel mamau puti anigo waina eu pei tea anoai, tea vea ni kau go ni shiip.

²⁰Go tea vea ni ass p̃a taulua e ki shiip natuna sikai: go ku pe ta daulua e mau, p̃a marip̃ori nanoana. Tea takalapa mamau puti ni natum̃a naanoai maga p̃a taulua ra. Go euga ta m̃alam̃ala aru pakilina naraegu mau.

²¹Naaleatia latesa p̃a to p̃osiwosi, ma naaleatia kelarua p̃a maromaro asa: ragi ni nasisinatano‐ana go ragi ni natagaukotoviana p̃a maromaro asa.

²²Go p̃a to manigo mari nasaisaiana ni wiik maga, tea ni takavea maga ni ragi ni natagaukotovi‐whiit‐ana, go nasaisaiana ni ragi ni nalolovaeana ragi edaku ni natau.

²³Naanoai mamau puti anigo euga vakilina paka tolu natau sikai narae ni Nawota Yehovah, Sup̃e ki Israel.

²⁴Nalakena aga wo kopasi lua nalauna maga pa dua ki naraem̃a, go aga wo mari kokoi anigo maga euga wo p̃arua: go te naata ega wo da masau navanua anigo mau, ragi waina p̃a wo sake pano naga p̃a vakilina narae ni Yehovah Sup̃e anigo paka tolu natau sikai.

²⁵P̃a ta pitua ki nada ni naviriana aginau pilake bred waina leven e doko asa mau; go naviriana ni nasaisaiana ni navakalauana ega ta doko raki malip̃ogi mau.

²⁶Tea vea ni takavea maga ni natano anigo p̃a to dape a umai paki nasum̃a ki Yehovah Sup̃e anigo. P̃a ta peni naninani natuna sikai milk ni p̃ilana mau.

²⁷Go Yehovah e noa ki Moses, e naga, P̃a manigo midiri navasaana maga wanogoe: nalakena a po mari pae nawoka ni navasaana maga wanogoe mari navasasokiana sikai paki‐go go paki Israel.

²⁸Go e doko tokora wanogoe sikoti Yehovah naaleatia rualima pati go nap̃ogiana rualima pati: e da gani navinaga mau, go e da munu noai mau. Go e midiri doko tea welewelea dua wanogoe navasaana maga ni navasasokiana, navasaana rualima sikai wanogoe.

²⁹Go e pakilina, ragi waina Moses e pae tava Sinai siwo umai, go tea welewelea dua ni navasasokiana ero doko nam̃elearu ni Moses, ragi waina e pae tava siwo umai, naga Moses e da atae mau naga nawili ni naraena e dawarawara nalakena e pasa pusum̃aki paki nia.

³⁰Go Aaron go Israel natuna mamau puti eu punusi Moses, go p̃a leo, nawili ni naraena e dawarawara; go eu mataku naga euga umai paki m̃aladigi ki nia.

³¹Go Moses e pioso paki da; go Aaron go tea maraki mamau puti ni navata eu liliu umai punusi a: go Moses e pasa ki da.

³²Go edaku ki e dapala nogoe Israel natuna mamau puti eu rumai paki m̃aladigi: go e dip̃aki da tea mamau puti waina Yehovah e pasa pusum̃aki paki nia ara tava Sinai.

³³Go ragi waina Moses e pasa pusum̃aki sua paki da, e doropusi nakulukulu taugoro‐rae sikai naraena.

³⁴Ma ragi waina Moses e paki ekopu paki narae ni Yehovah naga ega vasa pusum̃aki paki nia, e dape lua nakulukulu taugoro‐rae, pa pa e paki katama; go e paki katama po pasa paki Israel natuna maga tea waina e pei tea tip̃akiana asa;

³⁵Go Israel natuna maga eu punusi narae ni Moses, naga nawili ni narae ni Moses e dawarawara: go Moses e moro doropusi nakulukulu taugoro‐rae naraena, pa pa e paki ekopu naga ega vasa pusum̃aki paki nia.