Read Nguna Togoa Etafe North EKSODAS 36 Bible Online

EKSODAS 36 - Nguna Togoa Etafe North bible

EKSODAS 36

¹Go Besalel go Oholiab eroga wosiwosi, go sara naatam̃oli vei p̃op̃o manumatua, waina Yehovah e doropusi namanumatuaana go namidoakiataeana doko ara naga euga wosiwosi atae sara nawosiana ni nasuasuaana ni tokora tapu, ega tapala tea mamau puti waina Yehovah e po pitip̃aki asa.

²Go Moses e soso Besalel go Oholiab, go sara naatam̃oli vei p̃op̃o manumatua, waina Yehovah e doropusi namanumatuaana doko nap̃op̃oda, tea mamau puti waina nap̃op̃oda e sike ra naga euga umai paki nawosiana naga euga mari a;

³Go eu dape m̃elu dua ki narae ni Moses navituaana mamau, waina Israel natuna maga eu dape a umai agi nawosiana ni nasuasuaana ni tokora tapu, naga euga mari a asa. Go nara eu moro dape umai paki nia navituaana suasuakiana seara sara malip̃ogi.

⁴Go tea manumatua mamau puti waina eu do p̃osiwosi sara nawosiana ni tokora tapu eu rumai, sara naatam̃oli eu pae nawosiana adeada waina nara eu do p̃osiwosi asa umai;

⁵Go eu noa ki Moses, eu naga, Narei eu dape umai tea warua liu p̃arua ki tea waina e pataka ni nasuasuaana ni nawosiana waina Yehovah e pitip̃aki asa naga tuga mari a.

⁶Go Moses e pitip̃aki, go eu mari a e pei tea rogorogokiana usuraki tokora ni nam̃enakiana, po naga, Te naanoai sikai go te nagoroi sikai ega ta moro mari te nawosiana sikai agi navituaana ni tokora tapu mau. Go narei eu pei tea tugoroana makoto ki natape‐umai‐ana.

⁷Nalakena nasokoana waina e doko e patakada agi nawosiana mamau naga euga mari a asa, go naga seara ega tupele.

⁸Go sara tea vei p̃op̃o manumatua m̃aleoputo ni tea maga waina eu do p̃osiwosi nawosiana eu mari nasum̃atokoana ki tea kovagoro rualima sikai; eu mari ra eu pei tea ni linen vilokiana wia, go tea kesakesa, go tea miala‐kesakesa, go tea miala‐kalakala, eu pilake kerub maga, nawosiana ki tea vau‐midiria mataisau.

⁹Navarauana ni tea kovagoro sikai e pei kubit rualima dua tamate latolu, go naweleweleana ni tea kovagoro sikai kubit pati: tea kovagoro mamau puti eu pei totowo sikai.

¹⁰Go e dasokata ki tea kovagoro lima eu dum̃ada likoliko ara: go tea kovagoro lima kerua e dasokata ki da eu dum̃ada likoliko ara.

¹¹Go e mari tea sarasoki maga ni tea kesakesa eu doko nadigi ni tea kovagoro sikai eu pae tatakisi tokora ni natasokatakiana: e mari dapala nogoe e doko nadigi ni tea kovagoro waina e doko etaku tokora ni natasokatakiana kerua.

¹²E mari tea sarasoki rualima lima eu doko tea kovagoro sikai, go tea sarasoki rualima lima eu doko nadigi ni tea kovagoro waina e doko tokora ni natasokatakiana kerua: tea sarasoki maga eu dum̃ada doko p̃ai ra.

¹³Go e mari tagau matap̃ago‐rua ni kold rualima lima, po dasokata ki tea kovagoro maga ki tagau matap̃ago‐rua maga, sikai e liko sikai: go nasum̃atokoana e pei tea sikai maau.

¹⁴Go e mari tea kovagoro maga ni nam̃au ni naninani maga naga euga vei tap̃aup̃au sikai, dap̃augoro nasum̃atokoana: e mari ra eu pei tea kovagoro rualima sikai tamate sikai.

¹⁵Navarauana ni tea kovagoro sikai e pei kubit rualima dolu, go kubit pati e pei naweleweleana ni tea kovagoro sikai: tea kovagoro rualima sikai tamate sikai wanogoe eu pei totowo sikai.

¹⁶Go e dasokata ki tea kovagoro lima eu doko mamau, go tea kovagoro latesa eu doko mamau.

¹⁷Go e mari tea sarasoki rualima lima eu doko nadigi ni tea kovagoro waina e doko etaku tokora ni natasokatakiana, go e mari tea sarasoki rualima lima eu doko nadigi ni tea kovagoro waina e doko etaku tokora ni natasokatakiana kerua.

¹⁸Go e mari tagau matap̃ago‐rua ni brass rualima lima naga euga tasokata ki tap̃aup̃au, naga ega vei tea sikai maau.

¹⁹Go e magi tap̃aup̃au mari tea tap̃au‐kovagoro sikai ni nawili maga ni shiip anoai maga tea pupugiana miala, go tea tap̃aukovagoro sikai ni nawili maga ni siil maga elagi.

²⁰Go e mari napapa matolu maga agi nasum̃atokoana ni nakau akasia, waina eu lawodu.

²¹Kubit rualima sikai e pei navarauana ni napapa sikai, go kubit sikai go namagovai e pei naweleweleana ni napapa sikai.

²²Konakona dua ero doko napapa sikai, ero doko pitata: e mari dapala nogoe agi napapa mamau puti ni nasum̃atokoana.

²³Go e mari napapa maga wanogoe agi nasum̃atokoana; napapa rualima dua agi taleva ni sauth waina e paki sauth:

²⁴Go e mari laketano ni silver rualima pati eu doko etano ni napapa rualima dua wanogoe; laketano dua etano ni napapa sikai agi konakona dua kakana, go laketano dua etano ni napapa sikai agi konakona dua kakana.

²⁵Go agi taleva kerua ni nasum̃atokoana, taleva ni north, e mari napapa rualima dua,

²⁶Go laketano kakada ni silver rualima pati; laketano dua etano ni napapa sikai, go laketano dua etano ni napapa sikai.

²⁷Go agi etaku ni nasum̃atokoana waina e paki taleva ni elo musu, e mari napapa latesa.

²⁸Go e mari napapa dua agi naweluki dua ni nasum̃atokoana ero doko natakuna.

²⁹Go ero pataka ni tea rua etano, go dapala nogoe ero pei tea mamau pa pa paki nap̃auna pa pa paki rig sikai: e mari dapala nogoe magi sokata ki da, magi naweluki dua.

³⁰Go napapa latolu eu doko, go laketano kakada maga ni silver, laketano rualima sikai tamate latesa; laketano duarua etano ni napapa sikasikai sarasara ra.

³¹Go e mari tea walagoto maga ni nakau akasia; elima agi napapa maga ni taleva sikai ni nasum̃atokoana,

³²Go tea walagoto lima agi napapa maga ni taleva kerua ni nasum̃atokoana, go tea walagoto lima agi napapa maga ni taleva ni nasum̃atokoana agi natakuna waina e paki taleva ni elo musu.

³³Go e mari tea walagoto ni m̃aleoputo e duagoto m̃aleoputo ni napapa maga pae namatap̃agona pa pa paki namatap̃agona.

³⁴Go e pulutigoro napapa maga ki kold, go e mari rig kakada maga ni kold eu pei nalia maga agi tea walagoto maga, go e pulutigoro tea walagoto maga ki kold.

³⁵Go e mari tea taugorop̃otae ni tea kesakesa, go tea miala‐kesakesa, go tea miala‐kalakala, go linen vilokiana wia: e mari a e pilake kerub maga, nawosiana ki tea vau‐midiria mataisau.

³⁶Go e maneana mari tea lawodu pati ni akasia, po pulutigoro ra ki kold: tagau kakada maga eu pei tea ni kold; go e madeada daki laketano pati ni silver.

³⁷Go e mari tea tausiliki sikai agi namata ni Tap̃aup̃au, ni tea kesakesa, go tea miala‐kesakesa, go tea miala‐kalakala, go linen vilokiana wia, nawosiana ki tea turi‐midiria;

³⁸Go tea lawodu lima kakana go tagau kakada maga: go e pulutigoro nap̃auda maga go tea tasokataki kakada maga ki kold: go laketano kakada lima eu pei tea ni brass.