Read Nguna Togoa Etafe North EKSODAS 37 Bible Online

EKSODAS 37 - Nguna Togoa Etafe North bible

EKSODAS 37

¹Go Besabel e mari areka ni nakau akasia: kubit dua go namagovai e pei navarauana kakana, go kubit sikai go namagovai naweleweleana kakana, go kubit sikai go namagovai navakilagiana kakana:

²Go e pulutigoro e ki kold tautau nawokana go natakuna, po maneana mari navivina sikai daliviri.

³Go e maneana daki rig ni kold eu pati, eu doko natuana pati; go rig dua ero doko navidina sikai, go rig dua ero doko navidina kerua.

⁴Go e mari tea vavau dua ni nakau akasia, po pulutigoro ra ki kold.

⁵Go e sai ki tea vavau dua wanogoe paki rig maga waina eu doko navidi dua ni areka, naga euga vausi areka ara.

⁶Go e mari tea tap̃augoro sikai ni kold tautau: kubit dua go namagovai e pei navarauana kakana, go kubit sikai go namagovai naweleweleana kakana.

⁷Go e mari kerub dua ni kold; e mari ra ero pei nawosiana malo wono, ero du namatap̃ago dua ni tea tap̃augoro;

⁸Kerub sikai e du namatap̃agona sikai, go kerub sikai e du namatap̃agona kerua; e mari kerub dua wanogoe ero pei tea sikai maau ma tea tap̃augoro ero du namatap̃agona dua.

⁹Go kerub dua wanogoe ero do darasike nalivaruda dua pakilagi, po do kovagoro tea tap̃augoro ki nalivaruda maga, go naraeda ero dum̃ada paki naraeda; narae ni kerub dua wanogoe ero do leo paki tea tap̃augoro.

¹⁰Go e mari wede ni nakau akasia: kubit dua e pei navarauana kakana, go kubit sikai naweleweleana kakana, go kubit sikai go namagovai navakilagiana kakana:

¹¹Go e pulutigoro e ki kold tautau, po maneana mari navivina sikai ni kold daliviri.

¹²Go e maneana mari kelu sikai ni naweleweleana ni nam̃elearu sikai daliviri, po magi kelu kakana mari navivina sikai ni kold daliviri.

¹³Go e maneana daki rig ni kold eu pati, po doropusi rig maga wanogoe eu doko naweluki pati waina eu doko natuana pati.

¹⁴Rig maga wanogoe eu doko m̃aladigi ki kelu, eu pei nalia maga agi tea vavau dua naga euga vausi wede ara.

¹⁵Go e mari tea vavau dua ni nakau akasia, po pulutigoro ra ki kold, naga euga vausi wede ara.

¹⁶Go e mari naloriki maga waina eu doko wede, dish kakana maga, go spun kakana maga, go boul kakana maga, go flakon kakana maga, waina euga tataki ara, eu pei tea ni kold tautau.

¹⁷Go e mari nakau ni nasulu ni kold tautau: nawosiana malo wono e mari nakau ni nasulu asa, nalakena go nakauna; lasa kakana maga, kolopuna maga, go napum̃ana maga, eu pei tea sikai maau ma nae:

¹⁸Go ara latesa eu pae taleva dua kakana; ara dolu ni nakau ni nasulu eu pae taleva sikai kakana, go ara dolu ni nakau ni nasulu eu pae taleva kerua kakana:

¹⁹Lasa dolu tea mariana dakiusi napum̃a ni amond naga eu doko ara sikai, kolopu sikai go napum̃a sikai; go lasa dolu tea mariana dakiusi napum̃a ni amond maga eu doko ara kerua, kolopu sikai go napum̃a sikai: e dapala nogoe agi ara latesa waina eu pae nakau ni nasulu.

²⁰Go lasa pati tea mariana dakiusi napum̃a ni amond maga eu doko nakau ni nasulu, kolopuna maga, go napum̃ana maga:

²¹Go kolopu sikai e doko etano ni ara dua e pei tea sikai maau ma nae, go kolopu sikai e doko etano ni ara dua e pei tea sikai maau ma nae, go kolopu sikai e doko etano ni ara dua e pei tea sikai maau ma nae, agi ara latesa waina eu pae nakau ni nasulu.

²²Kolopuda maga go arada maga eu pei tea sikai maau ma nae: tea mamau kakana e pei nawosiana malo wono sikai ni kold tautau.

²³Go e mari nasulu kakana maga, eu larua, go odaki kakana maga, go siloa ni meru kakana maga, eu pei tea ni kold tautau.

²⁴Talenta sikai ni kold tautau e mari a asa, go naloriki kakana mamau puti.

²⁵Go e mari wede ni natap̃arakiana ni tea ni nap̃o wia ni nakau akasia: kubit sikai e pei navarauana kakana, go kubit sikai naweleweleana kakana, e pei p̃alavati; go kubit dua e pei navakilagiana kakana; napati kakana maga eu pei tea sikai maau ma nae.

²⁶Go e kalutigoro e ki kold tautau, elagi kakana, go nalakena maga daliviri, go napati kakana maga; go e maneana mari navivina sikai ni kold daliviri.

²⁷Go e maneana mari rig ni kold edua etano ni navivina, ero doko vidina dua, ero doko navidina dua, ero pei nalia maga ni tea vavau dua naga euga vausi a ara.

²⁸Go e mari tea vavau dua ni nakau akasia, po pulutigoro ra ki kold.

²⁹Go e mari naroro ni navuvuraiana tapu, go tea ni nap̃o wia tautau ni nasei lolo maga, nawosiana ki tea mari naroro lolo mataisau.