Read Nguna Togoa Etafe North EKSODAS 39 Bible Online

EKSODAS 39 - Nguna Togoa Etafe North bible

EKSODAS 39

¹Go eu mari sugoro vausim̃atakiana maga ni tea kesakesa, go tea miala‐kesakesa, go tea miala‐kalakala wanogoe, agi nasuasuaana ekopu ni tokora tapu, go eu mari sugoro tapu maga agi Aaron; dapala waina Yehovah e dip̃aki Moses asa.

²Go e mari efod ni kold, ni tea kesakesa, go tea miala‐kesakesa, go tea miala‐kalakala, go linen vilokiana wia.

³Go eu duki kold e pei tea welewelea manivenive maga, po masip̃oraworae a e pei nalolu maga, naga euga wosiwosi a m̃aleoputo ni tea kesakesa, go m̃aleoputo ni tea miala‐kesakesa, go m̃aleoputo ni tea miala‐kalakala, go m̃aleoputo ni linen wia, nawosiana ki tea vau‐midiria mataisau.

⁴Eu maneana mari napauna dua, tea tasokatakiana: e pei tea tasokatakiana doko namatap̃agona dua:

⁵Go tasoki midiria vausiana ki mataisau, waina e doko asa, waina e dasoki a asa, e pei tea sikai maau ma nae, go e dapala nawosiana kakana; ni kold ni tea kesakesa, go tea miala‐kesakesa, go tea miala‐kalakala, go linen vilokiana wia; dapala waina Yehovah e dip̃aki Moses asa.

⁶Go eu p̃osiwosi vatu ni natap̃alakisi dua, ero pei tea taligoroana ki tea taligoro maga ni kold, ero pei tea tae‐midiriana dapala natae‐midiriana maga ni tea vulusoki sikai, pae nagisa maga ni Israel natuna maga.

⁷Go e doropusi ra ero doko napau dua ni efod, naga eroga magi Israel natuna maga pei vatu ni namidoakilagatiana; dapala waina Yehovah e dip̃aki Moses asa.

⁸Go e mari tea taurum̃a, nawosiana ki tea vau‐midiria mataisau, e dapala nawosiana ni efod; e pei tea ni kold, tea ni tea kesakesa, go tea miala‐kesakesa, go tea miala‐kalakala, go linen vilokiana wia.

⁹E pei p̃alavati; eu mari tea taurum̃a e pei tea vekeruakiana: nakisitotowoana sikai e pei navarauana kakana, go nakisitotowoana sikai naweleweleana kakana, e pei tea vekeruakiana.

¹⁰Go eu pakavuro paki asa ovara pati ni vatu: ovara sikai ni sardius, topas, go karbunkel e pei ovara vea.

¹¹Go ovara kerua, emerald sikai, safir sikai, go daimond sikai.

¹²Go ovara ketolu, yasinth sikai, akate sikai, go amethust sikai.

¹³Go ovara kevati, berul sikai, go natap̃alakisi sikai, go yasper sikai: eu pei tea taligoroana ki tea taligoro maga ni kold doko navakavuroana kakada maga.

¹⁴Go vatu maga wanogoe eu pae nagisa maga ni Israel natuna maga, rualima sikai tamate dua, pae nagisada maga; dapala natae‐midiriana maga ni tea vulusoki sikai, sara naatam̃oli pae nagisada sikasikai sarasara ra agi naworaworana rualima sikai tamate dua.

¹⁵Go eu mari ero doko tea taurum̃a namori dua dapala viria dua, nawosiana ni tea viriana ni kold tautau.

¹⁶Go eu mari tea taligoro dua ni kold, go rig dua ni kold; go eu doropusi rig dua wanogoe ero doko namatap̃ago dua ni tea taurum̃a.

¹⁷Go eu doropusi namori viriana dua ni kold wanogoe ero doko rig dua waina ero doko namatap̃ago dua ni tea taurum̃a.

¹⁸Go namatap̃ago dua kerua ni namori viriana dua eu doropusi ra ero doko tea taligoro dua wanogoe, go eu doropusi ra ero doko napau dua ni efod, paki kivea kakana.

¹⁹Go eu mari rig dua ni kold, po doropusi ra ero doko namatap̃ago dua ni tea taurum̃a, doko nadigina waina e paki taleva ni efod waina e paki ekopu.

²⁰Go eu mari rig dua ni kold, po doropusi ra ero doko napau dua ni efod etano, paki kivea kakana, m̃aladigi ki natasokatakiana kakana, elagi ni tasoki midiria vausiana ki mataisau ni efod.

²¹Go eu duti tea taurum̃a pae rig kakana dua paki rig dua ni efod ki natali sikai ni tea kesakesa, naga ega toko tasoki midiria vausiana ki mataisau ni efod, go naga tea taurum̃a ega ta pei tea veresiana m̃elu dua ki efod mau; dapala waina Yehovah e dip̃aki Moses asa.

²²Go e mari sugoro varau ni efod nawosiana ki tea vausi; e pei tea kesakesa mau;

²³Go malo masai ni sugoro e doko m̃aleoputo kakana, dapala malo masai ni sugoro sikai ni navakalo, nadigi ni malo masai e pilake tea silae sikai daliviri, naga ega ta mawora mau.

²⁴Go eu mari eu doko namatap̃ago maga ni sugoro pomekranet maga ni tea kesakesa, go tea miala‐kesakesa, go tea miala‐kalakala, go linen vilokiana.

²⁵Go eu mari bell maga ni kold tautau, po doropusi bell maga namawota ni pomekranet maga doko namatap̃ago maga ni sugoro daliviri, namawota ni pomekranet maga;

²⁶Bell sikai go pomekranet sikai, doko namatap̃ago maga ni sugoro daliviri, naga ega suasua asa; dapala waina Yehovah e dip̃aki Moses asa.

²⁷Go eu mari sugoro tokop̃ai nawilida maga ni linen wia nawosiana ki tea vausi agi Aaron, go agi natuna maga, go tap̃au vivisiana ni linen wia,

²⁸Go tap̃au vivisiana varau maga ni linen wia, go vasiana vuru maga ni linen, ni linen vilokiana wia,

²⁹Go tasoki ni linen vilokiana wia, go tea kesakesa, go tea miala‐kesakesa, go tea miala‐kalakala, nawosiana ki tea turi‐midiria; dapala waina Yehovah e dip̃aki Moses asa.

³⁰Go eu mari tea welewelea ni diadem tapu ni kold tautau, po midiri doko asa midiriana sikai, dapala natae‐midiriana maga ni tea vulusoki sikai, TEA TAPU KI YEHOVAH.

³¹Go eu duti doko asa natali sikai ni tea kesakesa, naga ega oti a paki tap̃au vivisiana elagi; dapala waina Yehovah e dip̃aki Moses asa.

³²Go nawosiana mamau ni nasum̃atokoana ni tap̃aup̃au ni nasaisaiana e pei tea marisuaana: go Israel natuna maga eu mari dapala tea mamau puti waina Yehovah e dip̃aki Moses asa, eu mari dapala nogoe.

³³Go eu dape nasum̃atokoana umai paki Moses, Tap̃aup̃au, go naleo kakana mamau puti, tagau matap̃ago‐rua kakana maga, napapa kakana maga, tea walagoto kakana maga, tea lawodu kakana maga, go laketano kakana maga;

³⁴Go tea tap̃au‐kovagoro ni nawili maga ni shiip anoai maga tea pupugiana miala, go tea tap̃aukovagoro ni nawili maga ni siil maga, go tea taugoro‐p̃otae ni tea tausiliki;

³⁵Areka ni nanoasokisokiana, go tea vavau kakana dua, go tea tap̃augoro;

³⁶Wede, naloriki kakana mamau puti, go bred tokorae;

³⁷Nakau ni nasulu tautau, nasulu kakana maga, nasulu maga waina euga vei tea ovarakiana, go naloriki kakana mamau puti, go naroro ni namarama;

³⁸Go wede ni naviriana ni kold, go naroro ni navuvuraiana, go tea ni nap̃o wia, go tea tausiliki ni namata ni Tap̃aup̃au;

³⁹Wede ni naviriana ni brass, go koro ni brass kakana, tea vavau kakana dua, go naloriki kakana mamau puti, tea vavano go laketano kakana;

⁴⁰Tea taugoro maga ni roara, tea lawodu kakana maga, go laketano kakana maga, go tea tausiliki agi namata‐pua ni roara, namea kakana maga, go pin kakana maga, go naloriki mamau puti ni nasuasuaana ni nasum̃atokoana, agi tap̃aup̃au ni nasaisaiana;

⁴¹Sugoro vausim̃atakiana maga agi nasuasuaana ekopu ni tokora tapu, go sugoro tapu maga agi Aaron tea viri, go sugoro maga ki natuna maga, naga euga suasua nawosiana ki tea viri.

⁴²Dapala tea mamau puti waina Yehovah e dip̃aki Moses asa, dapala nogoe Israel natuna maga eu mari nawosiana mamau.

⁴³Go Moses e punusi nawosiana mamau, go kuga leo, eu mari sua e; dapala waina Yehovah e pitip̃aki asa, dapala nogoe eu mari sua e: go Moses e pasa m̃ata ki da.