Read Nguna Togoa Etafe North EKSODAS 40 Bible Online

EKSODAS 40 - Nguna Togoa Etafe North bible

EKSODAS 40

¹Go Yehovah e pasa paki Moses, po naga,

²Naaleatia vea ni atelagi vea p̃a sike nasum̃atokoana ni tap̃aup̃au ni nasaisaiana asa.

³Go p̃a lawo ki areka ni nanoasokisokiana ega toko asa, go p̃a kovagoro areka ki tea taugoro‐p̃otae.

⁴Go p̃a tape wede paki ekopu, po doropusi‐ovara ki naleo kakana maga; go p̃a tape nakau ni nasulu paki ekopu, po sawa ki dokoni nasulu kakana maga.

⁵Go p̃a toropusi wede ni naviriana ni kold agi tea ni nap̃o wia narae ni areka ni nanoasokisokiana, po sara ki tea tausiliki ni namata paki nasum̃atokoana.

⁶Go p̃a toropusi wede ni naviriana tap̃arakiana narae ni namata ni nasum̃atokoana ni tap̃aup̃au ni nasaisaiana.

⁷Go p̃a toropusi tea vavano namawota ni tap̃aup̃au ni nasaisaiana go ni wede ni naviriana, go p̃a toropusi noai asa.

⁸Go p̃a lawo ki roara daliviri, po sara ki tea tausiliki ni namata‐pua ni roara.

⁹Go p̃a tape naroro ni navuvuraiana, po puvurai ki nasum̃atokoana, go naleo mamau puti waina eu doko asa, po dapugoro e, go naleo kakana mamau puti, go ega wo dapu.

¹⁰Go p̃a vuvurai ki wede ni naviriana tap̃arakiana, go naloriki kakana mamau puti, po dapugoro wede ni naviriana: go wede ni naviriana ega wo dapu p̃arua liu.

¹¹Go p̃a vuvurai ki tea vavano go laketano kakana, po dapugoro e.

¹²Go p̃a viragi Aaron go natuna maga paki m̃aladigi ki namata ni tap̃aup̃au ni nasaisaiana, go p̃a sarue ra ki noai.

¹³Go p̃a sugoro Aaron ki sugoro tapu maga; go p̃a vuvurai ki nia, po dapugoro e, naga ega maginau suasua nawosiana ki tea viri.

¹⁴Go p̃a viragi natuna maga paki m̃aladigi, po sugoro ra ki sugoro tokop̃ai nawilida maga:

¹⁵Go p̃a vuvurai ki da, dapala waina ku puvurai ki tamada, naga euga maginau suasua nawosiana ki tea viri: go navuvurai‐ki‐da‐ana ega madeada pei navei‐tea‐viri‐ana pa pa ega tu du po du mau du usuraki tagona adeada maga.

¹⁶Moses e mari dapala nogoe: dapala tea mamau puti waina Yehovah e dip̃aki nia asa, e mari dapala nogoe.

¹⁷Go e pakilina atelagi vea ni natau kerua, naaleatia vea ni atelagi, naga nasum̃atokoana e pei tea sikeana asa.

¹⁸Go Moses e sike nasum̃atokoana, po doropusi laketano kakana maga, po lawo ki napapa kakana maga, po sai ki tea walagoto kakana maga, po sike tea lawodu kakana maga.

¹⁹Go e p̃elesa ki tap̃aup̃au dap̃augoro nasum̃atokoana, po doropusi tea tap̃au‐kovagoro e doko elagi asa; dapala waina Yehovah e dip̃aki Moses asa.

²⁰Go e dape nanoasokisokiana po doropusi a nawoka ni areka, po sai ki tea vavau dua ero doko areka, po doropusi tea tap̃augoro elagi ni areka:

²¹Go e dape areka paki ekopu ni nasum̃atokoana, po sara ki tea taugoro‐p̃otae ni tea tausiliki, po kovagoro areka ni nanoasokisokiana; dapala waina Yehovah e dip̃aki Moses asa.

²²Go e doropusi wede ekopu ni tap̃aup̃au ni nasaisaiana, taleva ni nasum̃atokoana waina e paki north, etaku ni tea taugoro‐p̃otae.

²³Go e doropusi‐ovara ki bred asa narae ni Yehovah; dapala waina Yehovah e dip̃aki Moses asa.

²⁴Go e lawo ki nakau ni nasulu ekopu ni tap̃aup̃au ni nasaisaiana, kivea ki wede, taleva ni nasum̃atokoana waina e paki sauth.

²⁵Go e sawa ki dokoni nasulu maga narae ni Yehovah; dapala waina Yehovah e dip̃aki Moses asa.

²⁶Go e doropusi wede ni naviriana ni kold ekopu ni tap̃aup̃au ni nasaisaiana narae ni tea taugoro‐p̃otae:

²⁷Go e dap̃ara ki tea ni nap̃o wia ni nasei lolo maga asa; dapala waina Yehovah e dip̃aki Moses asa.

²⁸Go e sara ki tea tausiliki ni namata paki nasum̃atokoana.

²⁹Go e lawo ki wede ni naviriana tap̃arakiana pisari namata ni nasum̃atokoana ni tap̃aup̃au ni nasaisaiana, po pitua ki naviriana tap̃arakiana asa go navituaana ni navinaga asa; dapala waina Yehovah e dip̃aki Moses asa.

³⁰Go e lawo ki tea vavano namawota ni tap̃aup̃au ni nasaisaiana go ni wede ni naviriana, po doropusi noai asa, naga euga vavavano asa.

³¹Go Moses go Aaron go natuna maga eu pavano ki nam̃elearuda go ki natuada asa;

³²Ragi waina eu paki ekopu ni tap̃aup̃au ni nasaisaiana, go ragi waina eu paki m̃aladigi ki wede ni naviriana, eu pavano: dapala waina Yehovah e dip̃aki Moses asa.

³³Go e sike roara dalivirigoro nasum̃atokoana go wede ni naviriana, po sara ki tea tausiliki ni namata‐pua ni roara. Go Moses e mari sua nawosiana.

³⁴Go napopouru e kovagoro tap̃aup̃au ni nasaisaiana, go nasamasamaana ni Yehovah e pakavuro nasum̃atokoana.

³⁵Go Moses e mari sa paki ekopu ni tap̃aup̃au ni nasaisaiana, nalakena napopouru e doko asa doko, go nasamasamaana ni Yehovah e pakavuro nasum̃atokoana.

³⁶Go ragi waina napopouru e pei tea tapeana sake m̃elu dua ki elagi ni nasum̃atokoana, Israel natuna maga eu surata pano, pae nasurataana adeada mamau puti:

³⁷Ma napopouru e pe ta pei tea tapeana sake mau, eu pe ta surata mau pa pa paki naaleatia waina e pei tea tapeana sake asa.

³⁸Nalakena napopouru ki Yehovah e doko elagi ni nasum̃atokoana aleati, go nakapu e doko asa p̃ogi, namata ni nasum̃a mamau ni Israel, pae nasurataana adeada mamau puti.