Read Nguna Togoa Etafe North EKSODAS 6 Bible Online

EKSODAS 6 - Nguna Togoa Etafe North bible

EKSODAS 6

¹Go Yehovah e noa ki Moses, e naga, Ragi waia p̃a wo punusi tea waina aga wo mari a paki Faraoh: nalakena ega wo suasua ki da ki nam̃elearu kasua sikai naga euga vano, go ega wo kopasi lua ra ki nam̃elearu kasua sikai m̃elu dua ki navanua aneana pano.

²Go Sup̃e e pasa paki Moses, po noa ki nia, e naga, Kinau a pei YEHOVAH:

³Go a pakilina ki Abraham, ki Isaak, go ki Yakob, po naga, A pei Sup̃e Kasua Mau, ma a da pei tea ataeana paki da pae nagisagu YEHOVAH mau.

⁴Go a lawo soki navasasokiana aginau paki da, naga aga tua ra navanua ni Kanaan, navanua ni nam̃enaki‐atatokoana adeada maga, waina eu m̃enaki atatoko asa.

⁵Go kinau a dogo nagigiana ki Israel natuna maga, waina naka ni Ityipt eu mari ra eu p̃osiwosi; go a midoa ki navasasokiana aginau.

⁶Nalakena tea wanogoe, p̃a noa ki Israel natuna maga, p̃a naga, Kinau a pei Yehovah, go aga wo piragi lua mu m̃elu dua ki etano ni natapetapeana maga ki naka ni Ityipt, go aga wo pualua mu m̃elu dua ki nawosiana adeada, go aga wo daulua mu ki aru saikiana sikai, go ki navasap̃otaeana warua maga:

⁷Go aga wo piragi mu kuga wo pei narei aginau, go aga wo pei Sup̃e animu: go kuga wo atae naga kinau a pei Yehovah Sup̃e animu, waina a piragi lua mu m̃elu dua ki etano ni natapetapeana maga ki naka ni Ityipt.

⁸Go aga wo piragi mu umai paki navanua, waina a sike nam̃elearugu naga aga tua Abraham, Isaak, go Yakob asa; go aga wo dua mu asa ega wo pei naveaniana animu: kinau a pei Yehovah.

⁹Go Moses e pasa dapala nogoe paki Israel natuna maga: ma eu da dogo parati ki Moses mau nalakena narogokitesaana ni nap̃op̃oda, go nalakena nawosiana kasua.

¹⁰Go Yehovah e pasa paki Moses, po naga,

¹¹P̃a vaki ekopu, po pasa ki Faraoh nawota ni Ityipt, naga ega suasua ki Israel natuna maga naga euga m̃elu dua ki navanua aneana pano.

¹²Go Moses e pasa narae ni Yehovah, po naga, Pa leo, Israel natuna maga eu da dogo parati ki nau mau; go Faraoh ega wo dogo au dapale sava, waina kinau a da pei tea vasa m̃asoko mau?

¹³Go Yehovah e pasa paki Moses go paki Aaron, po dua ra natip̃akiana sikai paki Israel natuna maga, go paki Faraoh nawota ni Ityipt, naga eroga viragi lua Israel natuna maga euga m̃elu dua ki navanua ni Ityipt umai.

¹⁴Tea maga waia eu pei nap̃au ni nasum̃a maga ni tamada maga: Reuben natuna naanoai maga Israel natuna takalapa; Hanok, go Pallu, Hesron, go Karmi: tea maga wanogoe eu pei Reuben naworana maga.

¹⁵Go Simeon natuna naanoai maga; Yemuel, go Yamin, go Ohad, go Yakin, go Sohar, go Shaul natu ni nagoroi sikai ni naworawora ni Kanaan: tea maga wanogoe eu pei Simeon naworana maga.

¹⁶Go tea maga waia eu pei nagisa maga ni Levi natuna naanoai maga pae navakilinaana adeada maga; Cershon, go Kohath, go Merari: go natau maga ni namauriana ki Levi eu pei natau p̃onotia sikai rualima takuna dolu tamate larua.

¹⁷Cershon natuna naanoai maga; Libni go Shimei, pae naworada maga.

¹⁸Go Kohath natuna naanoai maga; Amram, go Ishar, go Hebron, go Ussiel: go natau maga ni namauriana ki Kohath eu pei natau p̃onotia sikai rualima takuna dolu tamate dolu.

¹⁹Go Merari natuna naanoai maga; Mahli go Mushi. Tea maga wanogoe eu pei Levi naworana maga naworada maga pae navakilinaana adeada maga.

²⁰Go Amram e piragi Yokebed, gore ni tamana, e pei anagoroi; go e maneana dape Aaron go Moses: go natau maga ni namauriana ki Amram eu pei natau p̃onotia sikai rualima takuna dolu tamate larua.

²¹Go Ishar natuna naanoai maga; Korah, go Nefek, go Sikri.

²²Go Ussiel natuna naanoai maga; Mishael, go Elsafan, go Sithri.

²³Go Aaron e piragi Elisheba, natu ni Amminadab, gore ni Nahshon, e pei anagoroi; go e maneana dape Nadab go Abihu, Eleasar go Ithamar.

²⁴Go Korah natuna naanoai maga; Assir, go Elkanah, go Abiasaf; tea maga wanogoe eu pei Korah naworana maga naworada maga.

²⁵Go Eleasar Aaron natuna e piragi Putiel natuna nagoroi maga sikai kakada e pei anagoroi; go e maneana dape Finehas. Tea maga wanogoe eu pei nap̃au ni nasum̃a maga ni tamada maga ni naworawora ni Levi pae naworada maga.

²⁶Nara ero pei Aaron go Moses, waina Yehovah e noa ki da, e naga, Koroga viragi lua Israel natuna maga euga m̃elu dua ki navanua ni Ityipt umai pae taua adeada maga.

²⁷Nara ero pei tea waina ero pasa ki Faraoh nawota ni Ityipt, naga eroga viragi lua Israel natuna maga euga m̃elu dua ki Ityipt umai: nara ero pei Moses go Aaron wanogoe.

²⁸Go e pakilina naaleatia waina Yehovah e pasa paki Moses navanua ni Ityipt,

²⁹Naga Yehovah e pasa paki Moses, po naga, Kinau a pei Yehovah: p̃a vasa paki Faraoh nawota ni Ityipt tea mamau puti waina kinau aga wo do pasa paki‐go asa.

³⁰Go Moses e noa narae ni Yehovah, e naga, P̃a leo, kinau a da pei tea tovadaviviana ki nagolegu mau, go Faraoh ega wo dogo parati ki nau dapale sava?