Read Nguna Togoa Etafe North YOB 1 Bible Online

YOB 1 - Nguna Togoa Etafe North bible

YOB 1

¹Naatam̃oli sikai e doko navanua ni Us, nagisana Yob; go naatam̃oli wanogoe e p̃ialua go e leana, go e matau ki Sup̃e, po daledao ki tea sa.

²Go natuna naanoai larua go natuna nagoroi dolu eu maneana pakilina.

³Go e peani shiip manu larua, go kamel manu dolu, go oks manu sikai, go ass goroi p̃onotia lima, go tea ni nasum̃a aneana eu laapa liu; go dapala nogoe naatam̃oli wanogoe e p̃arua do liu naka ni ist mamau puti.

⁴Go natuna naanoai maga eu pano po mari nakaniana sikai nasum̃a adeada sikasikai naaleatia aneana; go eu dip̃aki lua po pitautau goreda dolu umai naga euga mamau ganikani po munu.

⁵Go e doko ragi waina naaleatia maga ni nakaniana adeada eu nopu, naga Yob e dip̃aki lua po dapugoro ra, go e duleana malip̃ogi loaloa, po pitua ki naviriana tap̃arakiana maga pataka ni naveveana adeada sarasara ra: nalakena Yob e naga, Mase natugu maga eu pe mari naleo sa, po pasa sa ki Sup̃e nap̃op̃oda. Go Yob e mari dapala nogoe pitip̃atip̃a.

⁶Go naaleatia sikai e pakilina ragi waina Sup̃e natuna maga eu rumai naga euga lawodu narae ni Yehovah, go Satan nae ma e umai, e doko m̃aleoputo kakada.

⁷Go Yehovah e noa ki Satan, e naga, Ku pae esava umai? Go Satan e pasadara Yehovah, po naga, A papiliu maramana go a surata usuraki asa po umai.

⁸Go Yehovah e noa ki Satan, e naga, Ku midoakiusiusi Yob tea suasua aginau, kite? Nalakena tea waina e dakiusi a e da doko maramana mau, naatam̃oli wialua go leana, waina e matau ki Sup̃e, po daledao ki tea sa.

⁹Go Satan e pasadara Yehovah, po naga, Yob e matau ki m̃oli ki Sup̃e, kite?

¹⁰Nigo ku da kokoigoro e ma nasum̃a aneana, go sara naleo aneana daliviri, kite? Ku pasa p̃ia ki nawosiana ni nam̃elearuna, go naloriki aneana maga eu disu po laapa navanua.

¹¹Ma ragi waia p̃a sai ki nam̃elearum̃a paki tea mamau puti waina e peani a, go nae ega wo pasa sa ki‐go naraem̃a.

¹²Go Yehovah e noa ki Satan, e naga, P̃a leo, tea mamau puti waina e peani a e doko navei‐nawota‐ana anigo; ma tea sikai maau, p̃a ta sai ki nam̃elearum̃a paki nap̃atokona mau. Go Satan e m̃elu dua ki narae ni Yehovah po pano.

¹³Go e pakilina naaleatia sikai, ragi waina natuna naanoai maga go natuna nagoroi maga eu do ganikani po do munu waine nasum̃a ki taida takalapa,

¹⁴Naga tea tautauana sikai e umai punusi Yob, po naga, Oks maga eu sisi natano, go ass maga eu ganikani pisari ra:

¹⁵Go tea ni Siba eu dowo ara po puati ra pano; io, go eu atugi tea suasua maga ki nawoka ni lova; go kinau a sikigu pei tea sava po umai naga aga noakisai ko asa.

¹⁶Ragi waina e ko do pasa, tea p̃ota sikai e umai, po naga, Nakapu vavaga ki Sup̃e e dowo pae nakoroatelagi umai, po dap̃ara ki shiip, go tea suasua maga, po gani dinomi ra; go kinau a sikigu pei tea sava po umai naga aga noakisai ko asa.

¹⁷Ragi waina e ko do pasa, tea p̃ota sikai e moro umai, po naga, Tea ni Kaldea maga eu mari taua dolu, go eu dowo paki kamel maga po puati ra pano, io go eu atugi tea suasua maga ki nawoka ni lova; go kinau a sikigu pei tea sava po umai naga aga noakisai ko asa.

¹⁸Ragi waina e ko do pasa, tea p̃ota sikai e moro umai, po naga, Natum̃a naanoai maga go natum̃a nagoroi maga eu ganikani po munu waine nasum̃a ki taida takalapa:

¹⁹Go p̃a leo, nalagi atu sikai e pae masop̃alo umai, po atugi naweluki pati ni nasum̃a wanogoe, go e dowo po nadi soki natureai maga, go eu mate; go kinau a sikigu pei tea sava po umai naga aga noakisai ko asa.

²⁰Go Yob e duleana, po puap̃orae sugoro kovagoro aneana, po masi lua nalolu ni nap̃auna, po kolo suai natano po lotu;

²¹Go e naga, A m̃alam̃ala m̃elu nap̃ele ni p̃ilagu, go aga wo m̃alam̃ala liliu: Yehovah e pitua, go Yehovah e dape lua; nagisa ni Yehovah ega vei tea vasap̃iakiana.

²²Tea mamau puti wanogoe Yob e da mari te naleo sa asa mau, go e da pasa sa ki Yehovah asa mau.