Read Nguna Togoa Etafe North YOB 10 Bible Online

YOB 10 - Nguna Togoa Etafe North bible

YOB 10

¹Naatagu e mamale ki namauriana aginau; Aga wo da soki narogokitesaana aginau mau; Aga wo pasa nakokonaana ni naatagu.

²Aga wo noa ki Sup̃e naga, P̃a ta dip̃akotovi au mau; P̃a visei kinau aga atae tea waina ku mari dip̃a au asa.

³Ku midoaki nia naga e p̃ia naga p̃a to riesoki, Naga p̃a midoaki p̃alo ki nawosiana ni nam̃elearum̃a maga, Po maramalagati namidoaki‐p̃otaeana ki tea sigisigileo, kite .

⁴Namatam̃a ero pei namata maga ni nap̃okasi, kite? Ku do leosai dakiusi waina naatam̃oli e do leosai, kite?

⁵Naaleatia anigo maga eu dapala naaleatia maga ki naatam̃oli? Kite natau anigo maga eu dapala natau maga ki naatam̃oli?

⁶Naga ku do laaga namarinaleotageleana aginau, Po do leousiusi namarinaleosaana aginau?

⁷Go ku atae naga a da sigisigileo mau; Go naga tea waina ega vualua m̃elu dua ki nam̃elearum̃a e dika.

⁸Nam̃elearum̃a maga ero dum̃ada mari dawona kinau, Po dasokota kinau; Ma sala waia ku masauna naga p̃a maradoa, Po mari sa kinau, kite?

⁹P̃a midoaki nia, a pavara ni ko asa, Naga ku mari au ki naruku; Go p̃a wo moro mari au aga liliu paki nam̃otam̃ota, kite?

¹⁰Ku da daki lua au dakiusi milk, Po da mari au a gagataki dakiusi tsis, kite?

¹¹Ku kovagoro au ki nawili go ki nap̃okasi, Po pau saisai kinau ki navatu maga go ki naawa maga.

¹²Ku dua au namauriana go nasaup̃iaana, Go namidoaki‐parati‐ki‐ana anigo e pavaigoro naatagu.

¹³Ma ku dasuru ki tea maga wanogoe nap̃op̃om̃a; A atae naga tea wanogoe ku midoaki soki a doko:

¹⁴A pe mari naleo sa, ku pe leo soki au, Go ku pe wo da maginau pasakorokoro namarinaleotageleana aginau mau.

¹⁵A pe sigisigileo, awi e pe vei aginau; Go a pe leana, ma a pe ta sike nap̃augu mau, Nalakena a pura ki namaliereana; Go a matamaloku ki narogokitesaana aginau.

¹⁶Go nap̃augu e pe tum̃ana sike a, Ma ku pe to palako kinau dakiusi laion sikai: Po do moro mari tea ni namagaana maga dip̃a au.

¹⁷Ku mari pau ki tea noasokisoki anigo maga dip̃a au, Po mari namaritausuana anigo e disu p̃arua paki nau; Taua maga ni namari‐navakalo‐ana eu darup̃a kinau.

¹⁸Ekasana ku piragi au dave m̃elu nasum̃a ni kanao? A pe vitua ki namerogu, go te namata e pe ta punusi au mau,

¹⁹A pe vei dapala waina a pe ta doko mau; A pe vei tea tapetapeana m̃elu nasum̃a ki kanao paki matigo pano.

²⁰Naaleatia maga ni namauriana aginau eu da pisa maau mau, kite? P̃a makoto kinau, p̃a toropusi au naga aga marasike,

²¹Ega vea ki aga vano po da moro liliu umai mau, Aga vaki navanua ni namaligo go ni melu ni namateana;

²²Navanua sikai ni namaligo wono, namaligo mau; Navanua sikai ni malu ni namateana, go ni navinovinoiana, Tokora waina namarama e dakiusi namaligo asa.