Read Nguna Togoa Etafe North YOB 12 Bible Online

YOB 12 - Nguna Togoa Etafe North bible

YOB 12

¹Go Yob e pasadara, po naga,

²Ioro, nimu ku pei narei lomau, Go namanumatuaana ega wo mate sikoti mu.

³Ma kinau a peani namidoaki‐ataena dakiusi mu; Kinau a da pakitano ki mu mau: Sei e da atae naleo maga dapala nogoe mau?

⁴Kinau a dapala tea waina e pei tea muru‐ki‐saudoa‐ki‐ana sikai ki tea ni m̃aladigi ki nia, Kinau waina a pioso paki Sup̃e, go e pasadara au: Kinau naatam̃oli leana go wialua sikai, A po pei tea muru‐ki‐saudoaki‐ana.

⁵Tea waina e doko dam̃ate e midoaki p̃alo ki narogokitesaana; E doko raki tea maga waina nam̃eleda eu pa parasai.

⁶Tap̃aup̃au maga ki tea tape pavakoto maga eu peani natam̃ateana, Go tea maga waina eu mari p̃auluulu ki Sup̃e eu doko p̃ia doko; Tea vavatukiana adeada e doko nam̃elearuda.

⁷Ma p̃a vusuusu ki nalo tuavati maga, Go nara euga wo mari pisei ki‐go asa; Go ki manu maga ni namalopa, Go nara euga wo noa ki‐go asa:

⁸Kite p̃a vasa paki natano, Go ega wo pasa pisei ki‐go asa; Go naika maga ni natasi Euga wo noakisai ko asa.

⁹Tea maga mamau puti wanogoe seve tea kakada e da atae mau, Naga nam̃elearu ni Yehovah e mari tea wanogoe?

¹⁰Namauriana ki sara nalo mauri, go namero ni sara naatam̃oli, Eu doko nam̃elearuna.

¹¹Nadaliga e da do maridogo navasaana maga, Dapala waina namena e do mena dogo navinaga, kite?

¹²Namanumatuaana e sikoti tea matua maga, Go namidoaki‐atae‐ana e sikoti navarauana ni naaleatia maga.

¹³Namanumatuaana go namarimatuaana ero sikoti Sup̃e: Namidoaki‐p̃otae‐ana go namidoaki‐atae‐ana ero pei tea aneana.

¹⁴P̃a leo, e dakai, go e mari sa moro pei tea tavagiana mau; E kokoro go te naata e da mariatae p̃olagati mau.

¹⁵P̃a leo, e mauti noai maga, go eu dap̃a; Go e moro dip̃aki lua ra pano, go eu dap̃augoro navanua.

¹⁶Nakasuaana go namanumatuaana wia ero doko asa doko; Tea viragi‐sasap̃o‐ki‐ana go tea viragi‐sasap̃o ero pei tea aneana.

¹⁷E piragi lua pavakoto ki naatam̃oli midoaki p̃otae maga, Go e mari tea vasap̃otae maga eu pei tea manumatavusa maga.

¹⁸E peresi natali solisoli maga ki nawota maga, Po dasoki namaloda maga ki tea tasoki sikai.

¹⁹E piragi lua pavakoto ki tea viri maga, Po dap̃olosiwo ki tea vakilagi maga.

²⁰E mari lua navasaana ki tea vavatu‐ki‐ana maga, Po dape lua namidoaki‐atae‐ana ki tea matua maga.

²¹E daki namidoaki‐p̃alo‐ki‐ana paki tea maraki maga, Po peresi natali tasoki ki tea kasua.

²²E mari pakasa ki naleo vakipua maga ni namaligo, Po maramalagati melu ni namateana.

²³E mari nalauna maga eu disu po p̃arua, Po moro mari puoli ki da: E mari nalauna maga eu p̃elewelea, Po moro puasoki ra doko.

²⁴E dape lua namidoaki‐atae‐ana ki nawota maga ki narei maga ni maramana, Po mari ra eu surata sasap̃o masop̃alo sikai, tokora waina napua e dika asa.

²⁵Eu do dotogo namaligo, namarama e dika, Go e mari ra eu do darataara dakiusi naatam̃oli matamaloku sikai.