Read Nguna Togoa Etafe North YOB 13 Bible Online

YOB 13 - Nguna Togoa Etafe North bible

YOB 13

¹P̃a leo, namatagu e punusi sua tea mamau puti wanogoe, Nadaligagu e dogo sua po midoaki atae a.

²Tea waina nimu ku atae a, Tea wanogoe kinau ma a atae a: A da panop̃ota ki mu mau.

³Ma a masauna naga aga vasa paki Tea Kasua Mau, Go a masauna naga aga vasa pululu ki Sup̃e.

⁴Ma nimu ku pei tea turi nasorosoroana maga, Ku mamau puti pei tea mari pauri p̃alo maga.

⁵Ako, ku pe mamau puti punuta e pe wia! Go e pe vei namanumatuaana animu.

⁶Kuga rogo navululuana aginau, Go kuga taki dorogo paki navavaraniana maga ni nagolegu maga.

⁷Kuga wo magi Sup̃e pasa dagele, Po maneana pasa sorosoro, kite?

⁸Kuga wo pei tea viragi naraena, kite? Kuga wo magi Sup̃e pululu, kite?

⁹Ega wo p̃ia ki mu ragi waina ega leousiusi mu, kite? Kite kuga wo piragi sasap̃o ki nia dapala tea sikai e piragi sasap̃o ki naatam̃oli, kite?

¹⁰Ku pe sili ki na‐viragi‐rae‐ana, E pe wo pasa kasua ki mu lomau.

¹¹Natatap̃auana aneana ega wo da mari mu kuga mataku, Go namatakilakila‐ki‐nia‐ana ega wo da dowo paki mu, kite?

¹²Navasa‐manumatuaana animu maga eu pei naluluakia maga ni natano‐apu, Navasakorokoroana animu maga eu pei nakokoro maga ni naruku.

¹³Kuga vunuta, kuga toropusi au naga aga vasa, Go tea waina ega vakilina kinau, ega vakilina.

¹⁴Aga wo dape nap̃okasigu ega toko napatigu, Po doropusi namauriana ega toko nam̃elearugu.

¹⁵E pe atugi au, a pe wo dika naleogoroana. Ma aga wo mari navululuana aginau naraena.

¹⁶Go tea wanogoe ega wo pei namautipauri‐au‐ana; Nalakena naatam̃oli sigisigileo sikai e mari sa umai paki naraena mau.

¹⁷Kuga rogo soki navasaana aginau maga, Go nanoaana aginau ega toko nadaligamu maga.

¹⁸Kuga leo, a mari m̃ata ki sua ki navululuana aginau; A atae naga aga wo pei tea mari‐leana‐ki‐ana.

¹⁹Naata sikai e pe toko waina e pe wo pululu dip̃a au, kite? Nalakena a pe wo punuta po mate.

²⁰Ma naleo dua maau eroga vei tea vituakiana paki nau, Go aga wo da dum̃agu dasuru kinau pa dua ki naraem̃a mau:

²¹P̃a rosa liliua ki nam̃elearum̃a ega vaki em̃ae kinau; Go namatakilakila‐ki‐go‐ana ega ta mari au aga mataku mau.

²²Go ragi wanogoe p̃a vioso, go aga wo pasadara; Kite kinau aga vasa, go p̃a vasadara au.

²³Namarinaleotageleana aginau maga go namarinaleosaana aginau maga eu pisa? P̃a mari au aga atae natapiriana aginau go namarinaleosaana aginau.

²⁴Ekasana ku dasuru ki naraem̃a, Po midoa ki nau naga a pei tea kokona ki‐go sikai?

²⁵P̃a wo mari kasua ki naulu nakau sikai waina nalagi e sui pulua ki nia, kite? Go p̃a wo kopasi nap̃olaga kokolo, kite?

²⁶Nalakena ku midiri naleo kokona maga dip̃a au, Po mari au a peanipioli ki namarinaleotageleana maga ni ragi ni navei‐natureai‐ana aginau:

²⁷Ku alasoki natuagu doko nakau maga, Po do leosoki napua aginau maga mamau puti; Ku lawo soki tea kokoigoro sikai doko nam̃ago maga ni nam̃ele natuagu:

²⁸Go a dapala naleo madada sikai waina e do mavunuvunu, Dapala tea suniana sikai waina tuluki e gani a.