Read Nguna Togoa Etafe North YOB 14 Bible Online

YOB 14 - Nguna Togoa Etafe North bible

YOB 14

¹Naatam̃oli waina e pei tea visolakiana ki nagoroi, E pei tea ni naaleatia pisa maau, Go e pura ki narogokitesaana.

²E pum̃a dapala napum̃a sikai, go e pei tea tagaukotoviana: E pano dapala melu sikai, go e da moro doko mau.

³Go p̃a wo p̃olagati namatam̃a paki tea tapala nogoe, Po sili paki navasap̃otaeana dip̃a e, kite?

⁴Naata sei e mariatae mari naleo tautau sikai ega m̃elu naleo loa? Tea sikai maau e dika.

⁵Naaleatia aneana maga eu pei tea atae‐p̃otaeana, Naveveana ni atelagi aneana maga e doko kiam̃a, Go ku lawo soki kokoi aneana maga, Waina e mari sa liu sa mau;

⁶P̃a lolop̃ota ki nia naga ega maromaro, Pa pa naaleatia ni nawosi‐mawosaana aneana ega wo nopu.

⁷Nakau sikai e pe vei tea taeana e dowo, naleogoroana e pe toko, Naga e pe wo moro siria, go naga nawasina e pe wo da dika mau.

⁸Nakoana e pe to duai natano, Go nalakena e pe mate natano;

⁹Ma e pe sidogo nadam̃o ni noai, e pe wo moro siria, Po sai ki arana maga dakiusi tea lawoana sikai.

¹⁰Ma naatam̃oli e pe mate, e pe wo pano puoli: Io, naatam̃oli ega vitua ki namerona go nae wai?

¹¹Dapala waina noai maga ni natasi eu do nunu puoli, Go noaisara e dap̃a po garagara;

¹²Dapala nogoe naatam̃oli e one natano po da moro duleana mau: Ega wo da darapa, kite pei tea vulevuleana m̃elu dua ki namaturuana aneana mau, Pa pa nakoroatelagi ega wo da moro doko mau.

¹³Ako, ku pe tasuru ki nau Sheol, Ku pe tasuru ki nau tokora ni natokolokuana, Pa pa namaritausuana anigo e pe wo nopu; Ku pe maginau datuta ki ragi tatutakiana sikai, po midoaki nau, e pe wia!

¹⁴Naatam̃oli e pe mate, e pe wo moro mauri, kite.? E pe tapala nogoe, a pe mariatae soki du, Pa pa naaleatia maga ni namarinavakalo‐ana aginau eu pe wo nopu.

¹⁵Go ku pe masau p̃arua ki tea waina nam̃elearum̃a maga ero p̃osiwosi ki nia, Go ku pe vioso, a pe wo pasadara ko:

¹⁶Ma ku ko do peve navasiana aginau maga: Ku da do pavaigoro namarinaleosaana aginau, kite?

¹⁷Natapiriana aginau e pei tea vulusokiana nala sikai. Go ku otisoki namarinaleotageleana aginau.

¹⁸Tava maga ma eu dowo one natano, po da moro pei te navatuna, Go vatu laketoko e pei tea risua‐ki‐lua‐ana m̃elu dua ki naliana;

¹⁹Noai maga eu do sere vatu maga; Eu do lelep̃esi po do sere lua nam̃otam̃ota ni natano: Go dapala nogoe nigo ku do mari puoli ki naleogoroana ki naatam̃oli.

²⁰Ku mari kasua ki nia pitip̃atip̃a, go e do liu pano; Ku doa naraena, po dip̃aki lua e pano.

²¹Natuna maga eu po pei tea dodomadaganiana, go e da atae a mau; Go eu pei tea mariana eu pakitano, ma e da punusi a mau.

²²E dogo navitivitinuana ni nap̃atokoana e sikina, Go e do dum̃ana susue naatana.