Read Nguna Togoa Etafe North YOB 15 Bible Online

YOB 15 - Nguna Togoa Etafe North bible

YOB 15

¹Go Elifas naatam̃oli ni Teman e pasadara, po naga,

²Naatam̃oli manumatua sikai ega lua ki naataeana p̃alo, Po dum̃ana pakavuro nap̃elena ki nalagi ruatu, kite?

³Ega vasa pusuusu ki navasaana p̃alo, Kite ki nanoaana maga waina eu da p̃ia ki te navatuna mau, kite?

⁴Io, nigo ku do mari puoli ki namatakuana, Go ku dugoro namidodoana narae ni Sup̃e.

⁵Nalakena nawokam̃a e do lua ki namarinaleotageleana anigo, Go ku matadoa namena ni tea mari‐manumatua.

⁶Nawokam̃a e dum̃ana dip̃akotovi ko, e da pei kinau mau: Go nagolem̃a maga ero do dum̃ada noasokisoki dip̃a ko.

⁷Nigo ku pei naatam̃oli vea maau waina ku pea pakilina maramana, kite? Kite ku pea doko pea ki tava maga, kite?

⁸Nigo ku dogo namidoaki‐p̃otaeana sili ki Sup̃e, kite? Go ku mauti namanumatuaana e pei anigo sikim̃a, kite?

⁹Nigo ku atae nasava waina kinami ma au da moro atae a mau? Ku midoaki atae nasava waina e da moro doko lina paki gami mau?

¹⁰Tea kapuara go namariki matua maga eu doko kiagami doko, Waina eu matua do liu tamam̃a.

¹¹Navasapakavakaleana maga ki Sup̃e, Go navasaana waina e do mari matemate paki‐go asa, eu da patakam̃a, kite?

¹²Ekasana nap̃op̃om̃a e do dape lua ko pano? Go ekasana namatam̃a ero do pilavila?

¹³Naga ku doa namaetoana anigo dip̃a Sup̃e, Po maga lua navasaana dapala nogoe maga m̃elu nawokam̃a?

¹⁴Naatam̃oli e pei nasava naga ega tautau? Go tea waina e pei tea visola‐kiana ki nagoroi, naga ega leana?

¹⁵P̃a leo, Sup̃e e da do pavatu tea tautau aneana maga mau; Go nakoroatelagi maga ma eu da dautau namatana mau.

¹⁶Go naatam̃oli e pei tea mamaragokiana go tea malasi, E do munu namarinaleotageleana dapala noai!

¹⁷P̃a rogo au, aga wo mari pisei ki‐go asa; Go tea waina a punusi sua e, aga wo noasai a:

¹⁸(Tea waina naatam̃oli manumatua maga eu atusi a, Waina tamada maga eu mari pakasa ki nia;

¹⁹Waina navanua e madeada pei tea vituakiana paki da, Go tea ni navanua p̃ota sikai e da surata asa mau:)

²⁰Naatam̃oli sigisigileo e do pitivitinu sara naaleatia ni namauriana aneana, Sara natau waina eu magi tea mari pavakoto pei tea tauakiana.

²¹Nadaleo ni tea vakamatakua maga e doko nadaligana maga; Ragi ni natam̃ateana tea mari p̃aragoto ega wo darup̃a ki nia:

²²E da leogoro naga ega liliu m̃elu dua ki namaligo mau, Go lova e maneana pei tea lawosokiana:

²³E do pasara naga ega kanikani, doko do naga, Navinaga wai? E atae naga naaleatia ni namaligo e doko raki nia, e pei m̃aladigi:

²⁴Narogokitesaana go nariesokiana ero mari a e mataku; Ero mari kasua ki nia dapala nawota sikai, tea mari‐m̃ataki‐ana raki navakalo.

²⁵Nalakena e sai ki nam̃elearuna dip̃a Sup̃e, Po dum̃ana mari lagilagi paki Tea Kasua Mau;

²⁶Doko do sava dip̃a e ki nanoa kasua; Ki nakokoro matolu sikai;

²⁷Nalakena e kovagoro naraena ki nam̃anopunopuana aneana, Po lulu‐ki‐goro natap̃oraeana ki nam̃aladua;

²⁸Po doko natokoana maga waina eu pei maso maladi, Go nasum̃a maga waina te naata e da doko ara doko mau, Waina eu po pei taua maga ni tea makaka maga.

²⁹Nalakena tea wanogoe ega wo da pei sogolapa mau, Go naloriki aneana maga euga wo da doko mau, kite pei tea sokariana maramana mau.

³⁰Ega wo da m̃elu dua ki namaligo mau; Mena ni nakapu ega wo mari arana maga euga kokolo, Go nalagi ega wo sui pulua ki napum̃ana.

³¹Ega ta pavatu tea p̃alo mau, doko do dum̃ana piragi sasap̃o ki nia: Nalakena nap̃aloana ega wo pei namoriana aneana.

³²Ega wo pei tea vakavuroana pea ki ragi aneana, Go arana ega wo da mamalakesa mau.

³³Ega wo parivaria‐ki‐lua nawa ni vaine mata dakiusi vaine, Go ega wo nadi ki lua napum̃ana dakiusi nakau oliva.

³⁴Nalakena taua ni naatam̃oli sigisigileo euga wo dim̃o, Go nakapu ega wo gani dinomi tap̃aup̃au maga ni ruku.

³⁵Eu dumau ki namarisakiana, eu diena ki namarisoreana, Go eu pisola ki namarinaleotageleana.