Read Nguna Togoa Etafe North YOB 16 Bible Online

YOB 16 - Nguna Togoa Etafe North bible

YOB 16

¹Go Yob e pasadara, po naga,

²A dogo sua tea tapala nogoe maga laapa: Nimu ku mamau puti pei tea vasapakavakale sa maga.

³Navasaana p̃alo maga euga wo nopu, kite? Kite nasava e mari ko naga ku do pasa?

⁴Kinau ma a mariatae moro pasa dakiusi mu; Naatamu e pe oli naatagu, A pe mariatae daua ki navasaana maga dip̃a mu, Po ligiligi p̃au paki mu.

⁵Nawokagu e pe mariatae mari ko ku pe kasua, Go navasapakavakaleana ni nagolegu maga e pe mariatae dosa liliua ki narogokitesaana animu.

⁶A pe vasa, ma narogokitesaana aginau e pe ta dosa liliu mau: Go a pe soki doko, ma a pe veani namaromaroana nasava asa?

⁷Sup̃e e mari au a po mawosa: E mari nasum̃a aginau e po pei maso maladi.

⁸E pakavuro au ki nasakurukuruana, E pei tea noasokisoki sikai dip̃a au: Go nam̃aguraana aginau e duleana dip̃a au, E do noasokisoki paki naraegu.

⁹E puap̃oraworae au ki namaritausuana aneana, e pilosi au; E do kati napatina paki nau: Tea kokona ki nau e do pakali namatana maga au.

¹⁰Eu maga paki nau ki nawokada; Eu dapagi napupugu pilake navivisuori‐ana: Eu dum̃ada saisai ki da dip̃a au.

¹¹Sup̃e e pitua ki nau paki naatam̃oli sa, Po nadi ki nau paki nam̃elearu ni tea sigisigileo.

¹²A dam̃ate doko, go e p̃ori lovae au; Go e puati nanoagu, po p̃okap̃oroworosi au: Go e lawo ki nau a pei wotu tipeana aneana.

¹³Tea tipe aneana maga eu kelugoro au sara tokora, E puri‐p̃orae nap̃elekevatugu maga, po da do mari malemale mau; E ligisi nakokonaegu natano.

¹⁴E mari p̃oraworae au ki malo mawora go ki malo mawora; E sava dip̃a au dapala m̃aau sikai.

¹⁵A duri nakulukulu ni sak e dokogoro nawiligu, Go a silivaki napati ni nap̃augu nam̃otam̃ota.

¹⁶Naraegu e mimiala ki nakaiana, Go melu ni namateana e doko nawili matagu maga;

¹⁷Ma namaripavakotoana e da doko nam̃elearugu maga mau, Go natapasavasaana aginau e dautau.

¹⁸Natano O, p̃a ta donigoro nadagu mau, Go nakuapiosoana aginau ega ta pap̃ai malo tokoana mau.

¹⁹P̃a leo, tea noasokisoki aginau e doko nakoroatelagi, Go tea waina ega maginau pasasokisoki e doko elagi.

²⁰Tagu ri maga eu do pasa saudoa ki nau: Namatagu e lip̃a ki naririmatagu maga paki Sup̃e;

²¹Tea sikai e pe mariatae magi naata sikai pululu paki Sup̃e, Dapala naatam̃oli sikai e pe magi tea ni m̃aladigi ki nia pululu, e pe wia!

²²Nalakena natau maga eu da laapa mau eu ko puoli, Go aga wo pano po da moro liliu umai mau.