Read Nguna Togoa Etafe North YOB 17 Bible Online

YOB 17 - Nguna Togoa Etafe North bible

YOB 17

¹Naatagu e mavunuvunu, Naaleatia aginau maga eu nopu, Matigo sikina e doko raki nau.

²Tea vasa saudoa maga eu dalivirigoro au, Go namatagu e doko namarip̃auluulu‐ana adeada doko.

³P̃a tum̃am̃a maginau doropusi nanadisokiana sikai; Naatam̃oli sei waina ega wo maginau pei tea tu oli?

⁴Ku kokoro nap̃op̃oda dip̃a namidoaki‐atae‐ana: Nalakena tea wanogoe p̃a wo da sike ra pakilagi mau.

⁵Eu dakiusi naata waina e pitautau tana ri maga paki nakaniana sikai, Go namata ni natuna maga eu maligo ki navitoloana.

⁶E mari au a pei naluluakia sikai ni nalauna laapa; Go a po pei tea mamaragokiana sikai narae ni naatam̃oli maga.

⁷Namatagu e m̃odave nalakena narogokitesaana, Go sara natawotugu maga eu dapala melu sikai.

⁸Tea leana maga euga wo saram̃akoto asa, Go tea tautau ega wo dum̃ana pugoni a dip̃a tea sigisigileo.

⁹Ma tea leana ega wo do surata sokisoki napua aneana, Go tea waina nam̃elearuna maga ero dautau, ega wo kasua po kasua liu.

¹⁰Ma nimu kuga liliu umai, Nimu mamau puti kuga moro umai: Go aga wo da pap̃ai tea manumatua sikai m̃aleoputo kakamu mau.

¹¹Naaleatia aginau maga eu pano sua, Namidoakiana aginau maga eu makoto, Go namidodoana maga ni nap̃op̃ogu.

¹²Eu mari p̃ogi e pei aleati: Eu naga, Namarama e m̃aladigi ki namaligo.

¹³A pe to leogoro, Sheol e pe wo pei nasum̃a aginau: A po p̃elesa ki nawewelegu namaligo.

¹⁴A po noa ki matigo, Ku pei tamagu; Go ku ula, Ku pei p̃ilagu, go goregu.

¹⁵Nalakena tea wanogoe, naleogoroana aginau wai? Go naatam̃oli sei waina ega wo punusi a?

¹⁶Ega wo siwo paki tea walagoto maga ni Sheol pano, kite? Aroga wo dua puti siwo paki nam̃otam̃ota pano, kite?