Read Nguna Togoa Etafe North YOB 19 Bible Online

YOB 19 - Nguna Togoa Etafe North bible

YOB 19

¹Go Yob e pasadara, po naga,

²Kuga wo mari naatagu ega rogokitesa pa pa paki seve ragi, Po duki p̃oroworosi au ki navasaana maga?

³Sala kerualima waia ku pasa pinoa ki nau: Ku da maliere pasa kasua ki nau mau, kite?

⁴Go e pe vei lomau naga a pe sasap̃o, Ma nasasap̃oana aginau e pe toko au doko.

⁵Ku pe tum̃amu mari mu ku pe vakilagi nalakena kinau, Po pasa dip̃a au navasa‐pinoakinau‐ana:

⁶Kuga atae naga e pei Sup̃e waina e doa sa kinau, Po puagoro au ki kup̃ena aneana.

⁷A pe kuapioso, po naga, Namarikasua‐ki‐ana! A pe ta pei tea vasadaraana mau: A pioso kasua raki nasilaeana, Ma navasap̃otaeana e dika.

⁸E p̃aakagoro napua aginau naga a mari sa pano, Go e lawo ki namaligo e doko napua aginau maga doko.

⁹E sawo lua nasamasamaana aginau m̃elu dua ki nau pano, Po dape lua vauvau m̃elu dua ki nap̃augu.

¹⁰E p̃oka p̃oraworae au daliviri go a da doko: Go e paku lua naleogoroana aginau dapala nakau sikai.

¹¹E mari namaetoana aneana e pavaga dip̃a au, Go e midoa ki nau naga a pei tea kokona ki nia sikai.

¹²Taua navakalo aneana maga eu mamau umai, Po sike pakilagi napua adeada dip̃a au, Po m̃enaki dalivirigoro tap̃aup̃au aginau.

¹³E doropusi taigu maga eu doko uvea ki nau, A pei tea p̃ota sikai paki tea atae au maga.

¹⁴Tea ni m̃aladigi ki nau eu doropusi au, Go tagu ri maga eu malio ki nau.

¹⁵Tea maga waina eu m̃enaki doko nasum̃a aginau, go tea suasua nagoroi aginau maga, Eu midoa ki nau naga a pei nam̃enaki‐atatoko sikai: a pei tea ni navanua p̃ota sikai namatada.

¹⁶A pioso paki tea suasua aginau, Ma navasadaraana e dika; Go a moro pavara ni a ki nawokagu.

¹⁷Namerogu e pei tea p̃ota paki nagoroi aginau, Go navavaraniana aginau paki p̃ilagu natuna maga.

¹⁸Piakirikiri maga eu midoa ki p̃alo ki nau; A pe tuleana, eu pe vasa saudoa ki nau.

¹⁹Naatam̃oli maga ni natam̃ateana aginau eu doropusi dao au: Go tea dodomiana aginau maga eu maradoa dip̃a au.

²⁰Navatugu maga eu puluti nawiligu go nap̃okasigu, Go a mauri ki nawili ni napatigu maga mau.

²¹Kuga dodomi au, kuga dodomi au, nimu tagu ri maga O; Nalakena nam̃elearu ni Sup̃e e kisidogo au.

²²Ekasana ku do kopalele au dakiusi Sup̃e? Ekasana ku do dapusukao kinau?

²³Oh, navasaana aginau maga eu pe vei tea midiriana! Eu pe vei tea midiriana sua tusi sikai!

²⁴Eu pe vei tea tae‐midiriana doko vatu laketoko, Ki pen sikai ni airon, go ki led, e pe wia!

²⁵Ma kinau a atae naga tea taulua au e mauri, Go naga ega wo duleana naaleatia edaku mau, po lawodu nam̃otam̃ota ni natano.

²⁶Go nawiligu e pe meso puoli, Ma nap̃okasigu e pe wo leo punusi Sup̃e:

²⁷Aga wo punusi a ega vei aginau, Go kinau sikigu namatagu eroga wo leo punusi a. Nap̃op̃ogu e do sirinopu nap̃alaugu!

²⁸Ku pe naga, Tuga wo kopalele asa! Go naga, Nakoa ni naleo wanogoe e pei tea vap̃aiana asa;

²⁹Kuga matau ki lova: Nalakena namaritausuana e do piragi navaratiana maga ni lova, Naga kuga atae naga navasap̃otaeana sikai e doko.