Read Nguna Togoa Etafe North YOB 2 Bible Online

YOB 2 - Nguna Togoa Etafe North bible

YOB 2

¹Go naaleatia p̃ota sikai e pakilina ragi waina Sup̃e natuna maga eu moro umai naga euga lawodu narae ni Yehovah, go Satan ma e moro umai sikoti ra naga ega lawodu narae ni Yehovah.

²Go Yehovah e noa ki Satan, e naga, Ku pae esava umai? Go Satan e pasadara Yehovah, po naga, A papiliu maramana, go a surata usuraki asa po umai.

³Go Yehovah e noa ki Satan, e naga, Ku midoakiusiusi Yob tea suasua aginau, kite? Nalakena tea waina e dakiusi a e da doko maramana mau, naatam̃oli wialua go leana, waina e matau ki Sup̃e, po do daledao ki tea sa: nigo ku mari au a do mari dip̃a e, naga aga mari sa ki nia, nalakena ega tika, ma e ko do dape soki nawialuaana aneana.

⁴Go Satan e pasadara Yehovah, po naga, Nawili dip̃a nawili, io, naatam̃oli ega vitua ki tea mamau puti waina e peani a oli namauriana aneana.

⁵Ma ragi waia p̃a sai ki nam̃elearum̃a dip̃a navatuna go nap̃okasina, go nae ega wo pasa sa ki‐go naraem̃a.

⁶Go Yehovah e noa ki Satan, e naga, P̃a leo, nae e doko nam̃elearum̃a: ma tea sikai maau, p̃a mauti namauriana aneana.

⁷Go Satan e m̃elu dua ki narae ni Yehovah pano, po atugi Yob ki natoputopuana sa maga pae nam̃ele natuana pa pa paki nam̃asuaana.

⁸Go e dape matele sikai ni lasa ni naruku naga ega tum̃ana karasi a asa; go e dasake doko m̃aleoputo ni natanoapu doko.

⁹Go anagoroi e noa ki nia, e naga, Nigo ku ko do dape soki nawialuaana anigo, kite? P̃a vasa sa ki Sup̃e, po mate.

¹⁰Ma e noa ki nia, e naga, Nigo ku pasa dakiusi navasaana ki nagoroi manumatavusa sikai. Ekasava? Tuga to dape tea wia pae nam̃elearu ni Sup̃e, go tuga ta do dape tea sa mau, kite? Tea mamau puti wanogoe Yob e da mari naleo sa asa nagolena mau.

¹¹Go ragi waina Yob tana ri dolu eu dogo nalo ni tea sa mamau puti wanogoe waina e pakilina ki nia, eu sikasikai sarasara ra pae tokora tokoana adeada umai; Elifas naatam̃oli ni Teman, go Bildad naatam̃oli ni Shuah, go Sofar naatam̃oli ni Naamah: go eu dum̃ada datuta ki da naga euga umai dagi sikoti a, po pasa pakavakale a.

¹²Go ragi waina eu ko do du uvea, go eu leo sake po da leo atae a mau, eu sike nadaleoda po dagi; go eu sikasikai sarasara ra puap̃orae sugoro kovagoro adeada, po sapura ki nam̃otam̃ota pakilagi nap̃auda.

¹³Go dapala nogoe eu dasake doko natano sikoti a doko naaleatia larua go nap̃ogiana larua, go eu da noa te navasaana sikai paki nia mau: nalakena eu punusi naga narogokitesaana aneana e p̃arua pa.