Read Nguna Togoa Etafe North YOB 20 Bible Online

YOB 20 - Nguna Togoa Etafe North bible

YOB 20

¹Go Sofar tea ni Naamah e pasadara, po naga,

²Nalakena tea wanogoe namidodoana aginau maga eu mari au aga vasa, Nalakena napariana waina e doko nap̃alaugu.

³A dogo navasadaoana waina e mari au a maliere, Go nalagi waina e dika naataeana e mari au aga vasadara.

⁴Ku da atae naga pae ragi ni tuai, Pae ragi waina naatam̃oli e pea pei tea tawonakiana maramana,

⁵Naga nasamasamaana ki tea sigisigileo e doko ragi vuru, Go nalaelaeaana ki tea mari naleo sa e pei tea ni ragi kiki sa, kite?

⁶Navakilagiana aneana e pe sake paki nakoroatelagi maga, Go nap̃auna e pe va parati ki napopouru maga;

⁷Ma e pe wo pano puoli dapala nataena: Tea maga waina eu pea punusi a euga wo naga, Nae wai?

⁸Ega wo diri pano dapala nap̃erea sikai, po da moro pei tea vap̃aiana mau: Go ega wo pei tea kopasi‐lua‐ana pano, dakiusi navunusiana sikai ni p̃ogi.

⁹Namata ni tea waina e pea punusi a, ega wo da moro punusi a mau; Go tokora tokoana aneana ma ega wo da moro leo punusi a mau.

¹⁰Natuna maga euga wo pavara nasaup̃iaana ki tea tika maga, Go nam̃elearuna eroga wo pitua ki liliua ki nasogolapaana aneana.

¹¹Navatuna maga eu pura ki nakasuaana ni navei‐natureaiana aneana, Ma euga wo mamau ma nae one nam̃otam̃ota ni natano.

¹²Nasigisigileoana e pe gagadi nawokana, E pe tasuru ki nia etano ni namenana;

¹³E pe mauti a, po da doropusi a mau, Go e pe tapesoki a nawokana;

¹⁴Ma navinaga aneana waina e doko namaritana e po malasi, Po pei nakokonae ni m̃aata maga nap̃alauna.

¹⁵E dinomi nasogolapaana maga, go ega wo moro lua ki da: Sup̃e ega wo mari ra euga wo dave m̃elu dua ki nap̃elena pano.

¹⁶Ega wo dum̃ili noai ni namateana ni m̃aata kiki maga: Namena ni m̃aata sa sikai ega wo mari punue a.

¹⁷Ega wo da leo punusi noaisara maga mau, Nap̃ap̃a maga waina eu do sara ki honi go ki batar.

¹⁸Ega wo lagati pitua ki tea waina e p̃osiwosi ki nia, po da dinomi a mau; Dapala naloriki aneana maga, navitua‐liliua‐kiana ega tapala nogoe, Go ega wo da peani nalaelaeaana asa mau.

¹⁹Nalakena e diesoki po doropusi tea tika; Go e dape lua pavakoto nasum̃a sikai waina e da davagi a mau.

²⁰Nalakena e da atae namaromaroana nap̃alauna mau, Ega wo da mauti te navatuna waina e maro asa mau.

²¹Te navatuna e da pei tea toropusiana e doko waina nae e da dinomi a mau; Nalakena tea wanogoe natoko‐p̃iaana aneana ega wo da doko parau mau.

²²Doko navukaana ni navatakana aneana, ega wo sua nariesokipuluti‐ana: Nam̃elearu ni sara naata waina eu dogokitesa, ega wo pa parati ki nia.

²³Ega vei naga ega vakavuro nap̃elena ega vuka p̃arua, Naga Sup̃e ega nadi ki navivitinuana ni namaetoana aneana asa, Po mari a ega p̃owo asa ega vei navinaga aneana.

²⁴Ega wo sava dua ki nalikau ni airon, Go naasu ni brass ega wo dipe sai a.

²⁵Ega rosa lua e ega m̃elu dua ki nap̃atokona: Namatap̃agona lidalida ega m̃elu dua ki namaritana; Tea ni namatakuana maga euga wo pa parati ki nia.

²⁶Namaligo mau e maneana pei tea tauakiana ega vei naloriki aneana maga: Nakapu sikai waina naatam̃oli e da sui a mau ega wo gani a; Ega wo gani puoli ki tea waina e ko doko tap̃aup̃au aneana doko.

²⁷Nakoroatelagi maga euga wo mari pakasa ki namarinaleotageleana aneana, Go maramana ega wo duleana dip̃a e.

²⁸Tea veaniana maga ni nasum̃a aneana euga wo pei tea tapeluaana pano, Euga wo sara pano naaleatia ni namaritausuana ki Sup̃e.

²⁹Tea wanogoe ega vei matele ki tea sigisigileo pae Sup̃e, Go ega vei p̃aumaso waina Sup̃e e maneana dawona ki nia.