Read Nguna Togoa Etafe North YOB 21 Bible Online

YOB 21 - Nguna Togoa Etafe North bible

YOB 21

¹Go Yob e pasadara, po naga,

²Kuga rogo soki navasaana aginau maga; Go ega vei navakavakale‐mu‐ana.

³Kuga ko soki, go kinau aga wo pasa; Go waina aga wo pasa sua, kuga moro pasa saudoa.

⁴Ma kinau, navululuana aginau e dip̃a naatam̃oli, kite? Go ekasana aga wo pei maritasoki parau doko?

⁵Kuga leosoki au, po saram̃akoto, Po doropusi nam̃elearumu ega toko nawokamu.

⁶Ragi waina a midoa ki nia, a dodosua, Go naruruuruana e dape soki nap̃okasigu.

⁷Ekasana tea sigisigileo maga eu mauri doko, Po do disu kasua ki namarimatuaana?

⁸Naworaworada eu pei tea lawoki‐laketokoana naraeda, Go naworada kivea ki namatada maga.

⁹Nasum̃a adeada maga eu doko p̃ia doko, namatakuana e dika, Go tiko ki Sup̃e e da atugi ra mau.

¹⁰Kau anoai adeada e do pavakawora pitip̃atip̃a; Kau goroi adeada e do pisola, go e da pisola sa mau.

¹¹Eu do lua ki piakirikiri adeada maga eu dapala navata sikai, Go natuda maga eu do sale.

¹²Eu do lega ki timbrel go harp, Po do laelaea nadaleo ni lokore.

¹³Eu doko p̃ia doko sara naaleatia ni namauriana adeada, Go eu siwo paki Sheol natam̃ateana.

¹⁴Ma eu ko do noa ki Sup̃e, eu naga, P̃a m̃elu dua ki gami pano; Nalakena au da masau atae napua anigo maga mau.

¹⁵Tea Kasua Mau e pei nasava, naga auga maneana suasua? Go au pe tapasavasa ki nia, au pe wia asa dapale sava?

¹⁶P̃a leo, nawiaana adeada e da doko nam̃elearuda mau, kite? Namidoaki‐p̃otae‐ana ki tea sigisigileo e du uvea ki nia.

¹⁷Nasulu ki tea sigisigileo e paka visa pei tea maripunueana? Namari‐sa‐ki‐da‐ana e paka visa pa parati ki da? Sup̃e e paka visa duri pitua ki narogokitesaana maga namaetoana aneana?

¹⁸Nara eu dapala nap̃olaga narae ni nalagi, Eu dapala nam̃otam̃ota waina nalagi atu e sui pulua ki nia pano.

¹⁹Nimu ku naga, Sup̃e e magi natuda maga daua ki namarinaleotageleana adeada. Ega lagati dua ra asa, naga euga tum̃ada atae a.

²⁰Namatada maga euga tum̃ada punusi namari‐sa‐ki‐da‐ana, Go euga tum̃ada munu namaritausuana ki Tea Kasua Mau.

²¹Nalakena euga wo midoa ki m̃ata ki tea ni nasum̃a adeada waina euga wo edakugoro ra, Ragi waina naveveana ni atelagi adeada maga euga wo pei tea taeluaana, kite?

²²Naatam̃oli sei ega vasa pisei ki Sup̃e naataeana, Nae waina e do pasa p̃otae tea vakilagi maga?

²³Tea sikai e mate, nakasuaana aneana e m̃anopunopu, E dogo kite p̃ia go e doko dam̃ate:

²⁴Tava‐nasusuna maga ero pura ki nam̃aladua, Go namarae navatuna e melumelu.

²⁵Go tea p̃ota sikai e mate nakokonaana ni naatana, Go e da katidogo te nawiaana mau.

²⁶Ero dua puti one nam̃otam̃ota ni natano, Go ula maga eu kovagoro ra.

²⁷Kuga leo, kinau a atae namidodoana animu maga, Go namidoaki‐p̃otae‐ana maga waina ku midoaki dip̃a m̃oli kinau asa.

²⁸Nalakena nimu ku naga, Nasum̃a ki tea maraki wai? Go tap̃aup̃au waina tea sigisigileo e pea doko asa wai?

²⁹Ku da do pusuusu ki tea maga waina eu do surata pae napua, kite? Go ku da saralomau nanoasokisokiana adeada maga mau, kite?

³⁰Naga naatam̃oli sa e pei tea mautiana naaleatia ni namarisakiana? Naga e pei tea vualuaana naaleatia ni namaritausuana?

³¹Sei ega wo noasai napua aneana paki naraena? Go sei ega wo lagati dua e tea waina e mari sua e?

³²Ma nae ega vei tea viragiana paki matigo pano, Go euga wo do pavaigoro matigona.

³³Nap̃eretano maga ni nap̃aloa euga wo gagadi paki nia, Go naatam̃oli maga euga wo maraka edakugoro e, Dapala tea laapa liu waina eu pea ki nia.

³⁴Go ekasana ku do pasa pakavakale au ki naleo p̃alo maga, Go navasadaraana animu maga eu pei nasorosoroana mau?