Read Nguna Togoa Etafe North YOB 22 Bible Online

YOB 22 - Nguna Togoa Etafe North bible

YOB 22

¹Go Elifas naatam̃oli ni Teman e pasadara, po naga,

²Naatam̃oli sikai e mariatae pei tea wia paki Sup̃e, kite? Tea waina e pe manumatua e pe tum̃ana mari tea wia paki nia.

³E pei namaroana ki Tea Kasua Mau ku pe leana, kite? Kite e maneana pei tea taluaana ku pe mari napua anigo maga eu pe wialua, kite?

⁴E pei nalakena namatau‐ki‐niaana anigo naga e do pasa kasua ki‐go, Po do sili paki navasap̃otaeana dip̃a ko, kite?

⁵Nasigisigileoana anigo e da p̃arua mau, kite? Nanopuana ni namarinaleotageleana anigo maga e dika.

⁶Nalakena ku dape m̃oli ki nanadisokiana maga ki taim̃a, Po duatilua tea suniana maga ki tea m̃alam̃ala.

⁷Ku da dua tea mawosa noai naga ega munu, Go ku mauti navinaga pa dua ki tea vitolo.

⁸Naatam̃oli marimatua e peani navanua; Go naatam̃oli vei tea dodomadaganiana e doko asa doko.

⁹Ku dip̃aki lua nagoroi malepu maga eu p̃alo pano, Go naru ni namalepu maga eu pei tea mari‐kotoviana.

¹⁰Nalakena tea wanogoe vaivai maga eu dalivirigoro ko, Go namatakuana m̃araverave e dap̃augoro ko.

¹¹Kite namaligo, naga ku mari sa leosai mau, Go natave ni noai maga eu donigoro ko.

¹²Sup̃e e da doko elagi ni nakoroatelagi mau, kite? Go p̃a leo punusi navakilagiana ni m̃asoe maga, eu doko elagi mau!

¹³Go nigo ku naga, Sup̃e e atae nasava? E mariatae pasap̃otae duaduru namaligo wono, kite?

¹⁴Napopouru matolu maga eu donigoro e, go e da leosai mau; Go e do surata natalitaliviriana ni nakoroatelagi.

¹⁵P̃a wo do pavaigoro napua ni tuai, Waina naatam̃oli sigisigileo maga eu pea surata asa, kite?

¹⁶Eu pei tea taeluaana pano pea ki ragi adeada, Laketano adeada e sara pano dapala noaisara sikai:

¹⁷Eu noa ki Sup̃e, eu naga, P̃a m̃elu dua ki gami pano; Go naga, Tea Kasua Mau ega maginami mari nasava?

¹⁸Ma e pakavuro nasum̃a adeada maga ki naleo wia maga: Ma namidoaki‐p̃otae‐ana ki tea sigisigileo e doko uvea ki nia.

¹⁹Tea leana maga eu punusi a go eu laelaea; Go tea tautau maga eu muru ki saudoa ki da:

²⁰Doko do naga, Tea kokona ki gami eu pei tea taeluaana, Go namagovai kakada waina e doko, nakapu vavaga e gani puoli ki nia.

²¹P̃a tum̃am̃a atae m̃ata ki Sup̃e, go p̃a toko natam̃ateana: Go dapala nogoe nawiaana ega wo umai paki‐go.

²²P̃a tape, a pavara ni ko asa, nawotaeana m̃elu nawokana, Po daua ki navasaana aneana maga nap̃op̃om̃a.

²³Ku pe moro maradoa paki Tea Kasua Mau, ku pe wo moro p̃ia; Ku pe mari namarinaleotageleana e pe toko uvea ki tap̃aup̃au anigo maga,

²⁴Go ku pe mari naloriki tauakiana anigo e pe toko nam̃otam̃ota ni natano, Go kold ni Ofir e pe toko napara ni noaisara maga;

²⁵Tea Kasua Mau e pe wo pei naloriki tauakiana anigo, Go silver wia masauniana anigo.

²⁶Go ragi wanogoe p̃a wo peani namaroana doko Tea Kasua Mau, Go p̃a wo sike naraem̃a paki Sup̃e.

²⁷P̃a wo mari natapasavasaana anigo paki nia, go nae ega wo dogo ako; Go p̃a wo lagati pitua ki nasaiana anigo maga.

²⁸P̃a wo pasa dawona ki naleo sikai, go ega wo manigo pei tea lawosokiana; Go namarama ega wo maramalagati napua anigo maga.

²⁹Eu pe mari ko p̃a vakitano, ku pe wo naga, Aga vei tea tape‐sake‐ana; Go ega wo mautipauri naatam̃oli vei p̃op̃ovakitano.

³⁰Ega wo pualua tea waina e da dika tea sa mau: Nigo p̃a wo pei tea vualuaana ki natautauana ni nam̃elearum̃a maga.