Read Nguna Togoa Etafe North YOB 23 Bible Online

YOB 23 - Nguna Togoa Etafe North bible

YOB 23

¹Go Yob e pasadara, po naga,

²Ma narogokitesaana aginau e kokonae au: Nalakena aleati go p̃ogi nam̃elearuna e madaga liu doko au.

³Awi, a pe atae tokora waina e doko asa doko, Naga a pe mariatae pa punusi a malo tasake aneana!

⁴A pe mari navululuana aginau naraena, Po pakavuro nawokagu ki navasausiusi‐ana maga.

⁵A pe atae navasaana maga waina e pe vasadara au asa, Po midoaki atae tea waina e pe noa kinau asa.

⁶E pe wo pululu ki nau nawaruaana ni nakasuaana aneana, kite? Ee; e pe wo daki dorogo paki nau.

⁷Tokora wanogoe tea leana e pe mariatae pusum̃aki paki nia; Go dapala nogoe a pe vaka sikai maau pei tea vualuaana m̃elu dua ki tea vasap̃otae au.

⁸P̃a leo, a paki kivea, ma e da doko tokora wanogoe; Go paki kiedaku, ma a da lop̃ai a mau:

⁹A laaga asa taleva ni mawiri, ma a da pap̃ai a mau: E dokoloku taleva ni matua, go a mari sa punusi a mau.

¹⁰Nalakena e atae napua waina aga vae asa; Ragi waina aga vei tea maridogoana sua, aga wo m̃elu umai dapala kold.

¹¹Nam̃ele natuagu e pasokisoki navasiana aneana maga; A pavaigoro napua aneana, po da dawasi mau.

¹²A da sukasuka m̃elu dua ki natip̃akiana ni nagolena maga mau; A paisoki nanoaana maga ni nawokana doko nap̃op̃ogu.

¹³Ma namidodoana aneana e da panop̃ota mau, go sei e mariatae doa e? Go tea waina naatana e pe masauna, tea wanogoe e do mari a.

¹⁴Ega wo pakavuro tea waina e maginau pei tea tawonakiana: Go tea tapalana laapa waina eu doko kiana.

¹⁵Nalakena tea wanogoe kinau a m̃anaunau naraena; Ragi waina a midoakiusiusi a, a matau ki nia.

¹⁶Nalakena Sup̃e e mari nap̃op̃ogu e manainai, Go Tea Kasua Mau e mari au a mataku.

¹⁷A pei tea kokoro‐p̃onoti‐ana ki namaligo, Go namaligoligo e kovagoro naraegu.