Read Nguna Togoa Etafe North YOB 24 Bible Online

YOB 24 - Nguna Togoa Etafe North bible

YOB 24

¹Ekasana Tea Kasua Mau e da datuta ki ragi maga? Go ekasana tea maga waina eu atae a, eu da punusi naaleatia aneana maga mau?

²Te seara eu doko waina eu do disua ki kokoi maga; Eu do dape pavakoto navata maga, po do pagani ra.

³Eu puati lua ass ki namalepu pano, Eu dape oks ki nagoroi malepu ega vei nanadisokiana sikai.

⁴Eu dielua tea tika maga pa dua ki napua: Tea rogokitesa maga ni navanua eu mamau dokoloku.

⁵P̃a leo, eu dapala ass mila maga ni masop̃alo, Eu m̃elu pano paki nawosiana adeada, doko do laaga tea kaniana; Masop̃alo e do magi natuda maga pitua ki navinaga.

⁶Eu dum̃ada dagaukotovi nam̃enau vanua; Go eu awosi roara ni vaine ki tea sigisigileo.

⁷Eu m̃alam̃ala one p̃ogi mamau, tea suniana e dika, Eu da peani te nakulukulu ragi ni namaladiana mau.

⁸Eu memeu ki usa walapa maga ni tava maga, Go eu avi doko vatu laketoko, eu dika tokora sili.

⁹Eu pualua pipia malepu m̃elu dua ki p̃ilana, Po dape nanadisokiana sikai ki tea tika.

¹⁰Eu m̃alam̃ala pano masale ki tea suniana, Eu pitolo, doko do dapetape napu maga;

¹¹Eu do mari naroro ekopu ni roara ni oliva maga ki tea sigisigileo maga; Eu do pasi m̃oru ni navasokiana ni nawa ni vaine adeada, po do sua namadouana.

¹²Naatam̃oli maga eu do gi m̃elu natokoana, Go naata ni tea atugiana e do kuapioso; Ma Sup̃e e da daki dorogo paki natapasavasaana adeada mau.

¹³Te seara eu doko waina eu pilosi namarama; Waina eu da atae napua kakana maga mau, Go eu da doko malo‐usi‐ana kakana maga mau.

¹⁴Tea mari punue naatam̃oli e do duleana ragi ni namakotokotoana, E do mari punuvunue tea rogokitesa go tea tika; Go e do mari dapala tea vanako sikai p̃ogi.

¹⁵Go namata ni tea maripele e do leogoro raki ragi melu p̃alo, E do dum̃ana kulutigoro naraena, doko do naga, Te naata ega wo da punusi au mau.

¹⁶Eu do kili darave nasum̃a maga namaligo: Eu do dum̃ada kokoro p̃onoti ra aleati; Eu da atae namarama mau.

¹⁷Nalakena namarama e dakiusi melu ni namateana paki da; Nalakena eu atae tea ni namatakuana maga ni melu ni namateana.

¹⁸Ma eu do pei tea tapeluaana pano m̃araverave; Matele veaniana adeada e pei tea vasasakiana maramana: Tea vasi nawa ni vaine e da moro maradoa paki roara ni vaine adeada maga mau.

¹⁹Dapala waina nagaragaraana go navivitinuana ero do mari puoli ki noai maga ni sno: Dapala nogoe Sheol e do mari puoli ki tea maga waina eu mari naleo sa.

²⁰Nasum̃a ni kanao ega wo malio ki da; ula ega wo gani ra; Euga wo da moro pei tea midoakiana mau: Go nasigisigileoana ega wo makoto dapala nakau sikai.

²¹Eu do mari sa ki tea tim̃o waina e dika piakiki; Po da do mari tea wia paki nagoroi malepu mau.

²²Ma pae namarimatuaana aneana, Sup̃e e do sokari naaleatia maga ki tea marimatua ki naaleatia maga: Eu duleana ragi waina eu midoaki putua ki p̃arua ki namauriana adeada.

²³E dua ra natoko‐p̃ia‐ana, go eu pei tea silaeana doko; Go namatana maga ero do pavaigoro napua adeada maga.

²⁴Eu pei tea tapeana pakilagi; Ragi ega wo kiki, go euga wo puoli; Io, euga wo pei tea viragiana pakitano, Eu pei tea tapeluaana pano dapala tea laapa, Po pei tea taekotoviana dapala m̃okai maga ni korn.

²⁵Go e pe ta dapala nogoe mau, sei e pe wo noasokisoki naga kinau a pei tea vasa sorosoro sikai, Go naga navasaana aginau e pei tea p̃alo?