Read Nguna Togoa Etafe North YOB 27 Bible Online

YOB 27 - Nguna Togoa Etafe North bible

YOB 27

¹Go Yob e moro sokari naluluakia aneana, e naga,

²Sup̃e e mauri, waina e dape lua naleanaana aginau; Go Tea Kasua Mau, waina e mari naatagu e dogokitesa p̃arua;

³Ragi mamau waina namauriana aginau e pe toko au doko, Go namero ni Sup̃e e pe toko nagisugu maga doko:

⁴Nagolegu maga eroga wo da pasa natageleana mau, Go namenagu ega wo da noa nasorosoroana mau.

⁵Ega tu uvea kinau naga aga noa naga ku leana: Pa pa aga mate, aga wo da doropusi nawialuaana aginau pa dua kinau pano mau.

⁶A dape soki kasua ki namarinaleoleanaana aginau, Go aga wo da doropusi a pano mau: Nap̃op̃ogu e da pasa pinoa kinau te naaleatia ni namauriana aginau mau.

⁷Tea kokona kinau ega tapala tea sigisigileo, Go tea waina e duleana dip̃a au ega tapala tea tagele.

⁸Nalakena naleogoroana ki tea sigisigileo e pei nasava, E pe talua, ma Sup̃e e pe tape lua naatana?

⁹Sup̃e e pe wo dogo nakua‐piosoana aneana, Ragi waina nariesokiana e pe wo pakilina ki nia, kite?

¹⁰E pe wo samasama ni Tea Kasua Mau, Po pioso paki Sup̃e sara ragi, kite?

¹¹Aga wo mari pisei ki mu nalo ni nam̃elearu ni Sup̃e; Tea waina e doko sikoti Tea Kasua Mau aga wo da dasuru ki nia mau.

¹²Kuga leo, nimu ku mamau puti dum̃amu punusi a; Go ekasana ku po mamau puti pei tea p̃alo maga?

¹³Tea waia e pei matele ki tea sigisigileo sikai pae Sup̃e, Go e pei tea veaniana ki tea riesoki maga, waina eu do dape ra ki Tea Kasua Mau.

¹⁴Natuna maga eu pe wo disu po laapa, eu pe wo pei agi lova; Go naworana maga euga wo da puka ki navinaga mau.

¹⁵Tea aneana maga waina eu pe wo mauri doko, eu pe wo mate ki nasasanaana sa, Go nagoroi malepu aneana maga euga wo da lalagaarova mau.

¹⁶E pe wo pila daua ki silver dakiusi nasogosogo, Po doropusi daua ki tea suniana dakiusi naruku;

¹⁷E pe wo dalua, ma tea leana e pe wo suni a, Go tea tautau e pe wo dap̃otawotae silver aneana.

¹⁸Nasum̃a aneana waina e dum̃ana davagi a, e dakiusi nasum̃a ni kalao, Go e dakiusi tap̃aup̃au sikai waina tea vavaigoro e dum̃ana mari a.

¹⁹Ega wo pei sogolapa one natano, ma ega wo da pei tea saisaikiana mau; Ega wo p̃olagati namatana maga, go ega wo dika.

²⁰Tea mataukiana maga euga wo pa parati ki nia dapala noai maga; Suitaviro sikai ega wo dape panako e pano p̃ogi.

²¹Nalagi ruatu ega wo dape lua e pano, go ega wo pano; Nalagi atu ega wo sui pulua ki nia m̃elu dua ki naliana.

²²Nalakena Sup̃e ega wo nadi a, po da mari malemale mau: Ega wo masau naga ega sava dua ki nam̃elearuna.

²³Naatam̃oli maga euga wo p̃osawosagoro e, Go euga wo pasa saudoa ki nia pa dua ki naliana.