Read Nguna Togoa Etafe North YOB 28 Bible Online

YOB 28 - Nguna Togoa Etafe North bible

YOB 28

¹Nalakena m̃oru sikai ni silver e doko, Go tokora sikai waina eu mari dautau ki kold asa.

²Airon e do pei tea tapeluaana m̃elu dua ki natano, Go brass e do pei tea veniana m̃elu vatu.

³Naatam̃oli maga eu do mari kotovi namaligo, po do laaga parati ki vatu wia maga, Epua ni nap̃alau ni namaligo wono, go ni melu ni namateana.

⁴Eu do kili m̃oru maga uvea ki tokora tokoana ki naatam̃oli; Eu da do pei tea midoakiana ki tea surata maga mau; Eu do pei tea liko‐doro‐ana uvea ki naatam̃oli, eu do dau salesaale.

⁵Natano e do pitua ki navinaga: Go etano ki nia e do lota ki nakapu vavaga.

⁶Vatu kakana maga eu pei malo tokoana ni safir maga, Go nam̃otam̃ota ni kold e doko asa doko.

⁷Napua paki asa te manu katip̃orae e da atae a mau, Go namata ni falkon e da punusi a mau:

⁸Nalo tuavati katip̃orae maga eu da pasi a mau, Go laion vakamatakua e da surata duagoto asa mau.

⁹Naatam̃oli e do sai ki nam̃elearuna paki vatu ni nakapu; E do paku dap̃olosiwo ki nakoa maga ni tava warua maga.

¹⁰E do dae pua nap̃ap̃a noaisara maga vatu laketoko maga; Go namatana e do punusi sara naleo masauniana.

¹¹E do marigoro nap̃ap̃a noai maga naga euga ta do sara mau; Go e do piragi lua naleo tasurukiana maga umai paki namarama.

¹²Ma namanumatuaana ega vei tea vap̃aiana esava? Go tokora ni namidoaki‐atae‐ana wai?

¹³Naatam̃oli e da atae naulu kakana mau; Go e da pei tea vap̃aiana navanua ki tea mauri mau.

¹⁴Epua e naga, E da doko au doko mau: Go natasi e naga, E da doko sikoti au doko mau.

¹⁵E mari sa pei tea suasuakiana dip̃a kold, Go silver e mari sa pei tea rowogiana ega vei naulu kakana.

¹⁶Naulu kakana e mari sa pei tea noap̃otaeana ma kold ni Ofir, Kite vatu natap̃alakisi masauniana, kite safir.

¹⁷Kold go klass ero da patakana mau: Go e da mariatae pei tea vituakiana raki naloriki wia maga ni kold tautau mau.

¹⁸Euga wo da pasa lagati koral kite krustalo mau: Nalakena naulu ni namanumatuaana e pakilagi liu rubi maga.

¹⁹Topas ni Ethiopia e da dakiusi a mau, Go kold e mari sa pakotovi a mau.

²⁰Go namanumatuaana e do pae esava umai? Go tokora ni namidoaki‐atae‐ana wai?

²¹E pei tea tasurukiana paki namata ni tea mauri maga mamau puti, Po pei tea tap̃augoroana paki manu maga ni namalopa.

²²Namarisakiana go Namateana ero do naga, Aro dogo narogorogoana kakana ki nadaligagami.

²³Sup̃e e dum̃ana midoaki atae napua kakana, Go e dum̃ana atae tokora waina e doko asa doko.

²⁴Nalakena nae e do leo paki namatap̃ago maga ni maramana, Go e do leo punusi sara naleo usuraki etano ni nakoroatelagi mamau;

²⁵Ragi waina e dowogi namadagaana ni nalagi; Po dowogi noai maga ki tea rowogi.

²⁶Ragi waina e magi usa mari natawonakiana sikai, Go napua sikai raki navila go tovae:

²⁷Ragi wanogoe e punusi a, po noasai a; E lawosoki a, po leousiusi a.

²⁸Go e noa ki naatam̃oli, e naga, P̃a leo, namatau‐ki‐Sup̃e‐ana e pei namanumatuaana; Go namidoaki‐atae‐ana e pei naga p̃a m̃elu dua ki tea sa.