Read Nguna Togoa Etafe North YOB 29 Bible Online

YOB 29 - Nguna Togoa Etafe North bible

YOB 29

¹Go Yob e moro pasa sokari naluluakia aneana, e naga,

²Awi, a pe toko dapala a pea doko atelagi vea maga, Doko naaleatia maga waina Sup̃e e pea pavaigoro au;

³Ragi waina nasulu aneana e maramalagati nap̃augu, Go doko namarama aneana a surata duaduru namaligo;

⁴Doko naaleatia maga ni naveinatureai‐ana aginau, Ragi waina Sup̃e e kovagoro tap̃aup̃au aginau;

⁵Ragi waina Tea Kasua Mau e ko doko sikoti au doko, Go natugu maga eu doko dalivirigoro au;

⁶Ragi waina natuagu ero pei tea sarueana ki nam̃aladua, Go vatu laketoko e do maginau sara ki naroro!

⁷Ragi waina a m̃elu pano paki namata‐pua ni natokoana, Ragi waina a mari m̃ata ki malo tasake aginau tokora welewelea,

⁸Natureai maga eu punusi au, po sili, Go tea matua maga eu duleana po lawodu;

⁹Tea maraki maga eu punuta ki navasaana, Po doropusi nam̃elearuda e doko nawokada;

¹⁰Nadaleo ni tea vakilagi maga e makoto, Go namenada e puluti namaga ni nawokada.

¹¹Ragi waina nadaliga e dogo au, e pasa p̃ia kinau; Go ragi waina namata e punusi au, e noasokisoki au.

¹²Nalakena a pualua tea tika ragi waina e kuapioso, Go namalepu ragi waina e dika tea waina ega silae a.

¹³Navasap̃iakiana ki tea waina e pei m̃aladigi naga ega mate puoli, e umai paki nau: Go a mari nap̃op̃o ni nagoroi malepu naga e lega ki nalaelaeaana.

¹⁴A suni namarinaleoleanaana, go e sugoro au: Navasap̃otaeana aginau e dapala sugoro kovagoro sikai go tap̃au sikai.

¹⁵A pei namata ni tea kesa, Go a pei nam̃ele natua ni tea vei pito.

¹⁶A pei tama ni tea rogokitesa: Go naleo ki naata waina a da atae a mau, a maneana leousiusi a.

¹⁷Go a mari p̃ori nasi ni tea sigisigileo, Po pualua tea katip̃oraeana m̃elu dua ki napatina.

¹⁸Naaleatia maga wanogoe a naga, Aga wo mate vetegu, Go aga wo mari naaleatia aginau maga euga wo laapa dapala naworaone:

¹⁹Nakoagu e pei tea saikiana paki noai maga, Go nasovaki e doko aragu p̃ogi mamau:

²⁰Nasamasamaana aginau e pau doko au, Go naasu aginau e pei tea maripau‐kiana nam̃elearugu.

²¹Naatam̃oli maga eu daki nadaligada paki nau, Eu punuta po doko raki namidoaki‐p̃otae‐ana aginau.

²²Edaku ki navasaana aginau maga eu da moro pasa mau; Go nanoaana aginau e duturu ara.

²³Eu leogoro au dapala eu do leogoro usa; Go eu maga ki nawokada dapala eu do maga raki usa edaku.

²⁴A matamurumuru paki da ragi waina eu dika nasaralomauana; Go namarama ni naraegu eu da mari a e pakitano mau.

²⁵A matadoa napua adeada, po pei nawota doko, Go a doko dapala tea maramara sikai m̃aleoputo ni taua navakalo, Dapala tea sikai waina e do pasa pakavakale tea susue maga.