Read Nguna Togoa Etafe North YOB 3 Bible Online

YOB 3 - Nguna Togoa Etafe North bible

YOB 3

¹Go edaku ki tea wanogoe Yob e p̃olagati nawokana, po pasa sa ki naaleatia ni navakilinaana aneana.

²Go Yob e pasa po naga,

³Naaleatia waina a pakilina asa ega vano puoli, Go p̃ogi waina e naga, Piakiki naanoai sikai e pakilina.

⁴Naaleatia wanogoe ega vei namaligo; Sup̃e ni elagi ega ta midoa ki nia mau, Go namarama ega ta maramalagati a mau.

⁵Namaligo go melu ni namateana eroga tap̃augoro e; Napopouru ega one goro e; Namaligoligo ni naaleatia ega vakamatakua ki nia.

⁶Go p̃ogi wanogoe namaligo wono ega vua parati ki nia: Ega ta saisai sikoti naaleatia maga ni natau mau; Ega ta pei tea veveana ega vei nakup̃a sikai ni atelagi maga mau.

⁷Ioro, p̃ogi wanogoe ega vei maso maladi; Nasamasamaana ega tika asa.

⁸Tea maga waina eu do pasa sa ki naaleatia, Euga moro pasa sa ki nia, Tea maga waina eu piviari atae pulevule leviathan.

⁹M̃asoe maga ni malip̃ogi kakana euga ta marama mau: Ega to leogoro namarama ma ega tika; Go ega ta punusi natola ni naaleatia mau:

¹⁰Nalakena e da mari p̃onoti nap̃ele ni p̃ilagu mau, Kite dasuru ki narogokitesaana paki namatagu mau.

¹¹Ekasana a da mate nap̃elena mau? Ekasana merogu e da siva ragi waina a m̃elu nap̃elena mau?

¹²Ekasana nap̃atua maga ero dapetape au? Go ekasana eu dua au susu maga naga aga susu asa?

¹³E pe ta dapala nogoe mau, a pe one natano po doko dam̃ate; A pe maturu, po peani namaromaroana:

¹⁴Sikoti nawota maga go tea vusum̃aki maga ni maramana, Waina eu dum̃ada madeada davagi piri tokora makaka maga;

¹⁵Kite sikoti tea maraki maga waina eu peani kold, Waina eu pakavuro nasum̃a adeada maga ki silver:

¹⁶Kite a pe takiusi tea solapesiana tasurukiana sikai m̃elu nagoroi, Dapala pipia maga waina eu da punusi namarama mau.

¹⁷Tokora wanogoe tea sigisigileo maga eu makoto ki namidiana asa; Go tokora wanogoe tea mawosa maga eu peani namaromaroana asa.

¹⁸Tokora wanogoe tea soliana maga eu mamau doko dam̃ate asa; Eu da dogo nadaleo ni tea suatoro mau.

¹⁹Tea vakitano go tea vakilagi eu mamau doko tokora wanogoe doko; Go tea suasua e pei tea veresiana e dum̃ana doko m̃elu dua ki tea maraki aneana.

²⁰Ekasana namarama e pei tea vituakiana paki tea rogokitesa, Go namauriana paki tea waina e kokona naatana?

²¹Waina e do leogoro namateana ma e da umai mau; Waina e do kilikili raki nia do liu naleo wia tasurukiana maga;

²²Waina eu samasama p̃arua po laelaea, Ragi waina eu pap̃ai matigo?

²³Ekasana namarama e pei tea vituakiana paki naata waina napua aneana e p̃olu, Go waina Sup̃e e kokoigoro e?

²⁴Nagiana aginau e pei navinaga aginau, Go nauruana aginau e pei tea takiana dakiusi noai.

²⁵Nalakena naleo waina a matau ki nia e pa parati kinau, Go tea waina a mataku asa e pakilina kinau.

²⁶A da matadorogo mau, Go a da peani natam̃ateana mau, Kite namaromaroana mau; Ma narogokitesaana mau e ko do pakilina.