Read Nguna Togoa Etafe North YOB 30 Bible Online

YOB 30 - Nguna Togoa Etafe North bible

YOB 30

¹Ma ragi waia natureai maga eu mari saudoa kinau, Natureai maga waina tamada maga eu pe vei tea lawokiana sikoti koria maga ni navata ni shiip aginau, A pe ta masauna mau, nalakena a midoaki p̃alo ki da.

²Nakasuaana ni nam̃elearuda euga silae au nasava? Waina nakasuaana adeada e po pano puoli?

³Eu m̃agura nalakena natikaana go navitoloana; Eu do ariari natano garagara tokora sa go maso maladi.

⁴Eu do kiniti kotovi naulu nakau kokona, Go nakoa ni yuniper e pei navinaga adeada.

⁵Eu do pei tea kopasi‐lua‐ana m̃elu dua ki naatam̃oli maga; Eu do darasa goro ra dapala eu do darasa goro tea vanako.

⁶Eu doko nap̃aloa maligoligo maga doko, Valea maga ni natano go ni vatu laketoko maga.

⁷Eu do gaegae m̃aleoputo ni namalasi maga; Eu do saisai doko etano ni nataputea vivitip̃a maga.

⁸Eu pei lala natuna maga, go naatam̃oli p̃alo natuna maga; Eu pei tea kopasi‐lua‐ana m̃elu dua ki navanua pano.

⁹Go ragi waia kinau a po pei nalegaana adeada, Go a po pei naluluakia sikai paki da.

¹⁰Eu mamarago kinau, eu du em̃ae kinau, Go eu da do soki nataniuana naraegu mau.

¹¹Nalakena Sup̃e e po peresi natali aginau, po mari au a pakitano, Nara eu po nadi ki lua p̃auasi pano naraegu.

¹²Tea mari p̃aragoto maga eu duleana dip̃a au taleva ni matuagu; Eu dosiva ki nam̃ele natuagu maga, Go eu sike dip̃a au napua ni namarisakiana maga.

¹³Eu mari sa ki napua aginau, Eu mari narogokitesaana aginau e disu p̃arua, Go te naata e da dugoro ra mau.

¹⁴Eu rumai dapala eu pae malo mawora welewelea sikai: M̃aleoputo ni nasapurakiana eu dum̃ada malulua ki da paki nau.

¹⁵Tea mataukiana maga eu pei tea roaana paki nau, Eu kopasi lua nadodomadaganiana aginau dapala nalagi; Go natoko‐p̃ia‐ana aginau e sirinopu dapala napopouru sikai.

¹⁶Go ragi waia naatagu e pei tea takiana doko au; Naaleatia maga ni narogokitesaana eu puasoki au.

¹⁷Navatugu maga eu puri sasama au p̃ogi, Go navitivitinuana maga eu do ariari au, namaromaroana e dika.

¹⁸Nakasuaana warua ni nasasanaana sa aginau, e mari sugoro aginau e sa panop̃ota asa: E pivisigoro au dapala nanoa ni sugoro aginau.

¹⁹Sup̃e e nadi kinau pano paki nalepa, Go a po pei tea tapala nam̃otam̃ota go natanoapu.

²⁰A pioso paki‐go, go ku da pasadara au mau: A lawodu, go ku da leo punusi au mau.

²¹Ku dum̃am̃a doa ko po pei tea dodotika paki nau: Ku kopalele au namarimatuaana ni nam̃elearum̃a.

²²Ku dape dakati au paki nalagi, po mari au a porau asa; Go ku mari au a nunu puoli ki nalagi miala.

²³A atae naga p̃a wo piragi au paki namateana, Go paki matigo waina e magi tea mauri maga mamau puti pei tea tawonakiana.

²⁴Ma tea sikai ega ta sai ki nam̃elearuna m̃elu taua makaka mau, kite? Go doko namari‐sa‐ki‐nia‐ana ega ta kua pioso raki nasilaeana mau, kite?

²⁵Kinau a da dagisi tea waina e sua narogokitesaana mau, kite? Nap̃op̃ogu e da susue nalo ni tea tika mau, kite?

²⁶Ragi waina a leogoro tea wia, ragi wanogoe tea sa e umai; Go ragi waina a doko raki namarama, namaligo e umai.

²⁷Namaritagu maga eu do lotalota, po da do maromaro mau; Naaleatia maga ni narogokitesaana eu pa parati kinau.

²⁸A do malepu pano, elo e dika: A lawodu nasaisaiana, po kua pioso raki nasilaeana.

²⁹Kinau a pei tai ni koria mila maga, Go ta ni ostris maga.

³⁰Nawiligu e loa m̃elu dua kinau, Go navatugu maga eu pavaga ki navivitinuana.

³¹Nalakena tea wanogoe harp aginau e pei tea roaana po pei natagiana, Go lokore aginau e po pei nadaleo ni nalalagaarovaana.