Read Nguna Togoa Etafe North YOB 31 Bible Online

YOB 31 - Nguna Togoa Etafe North bible

YOB 31

¹A mari navasasokiana sikai paki namatagu maga, Naga aga ta do leo punusi nagoroi atara sikai.

²Nalakena matele veaniana aginau e pe vei nasava pae Sup̃e ni elagi, Go tea veanipiolikiana aginau pae Tea Kasua Mau ni tokora vakilagi?

³Namarisakiana e da dowo paki tea sigisigileo, Go nasaana paki tea mari dagelegele maga mau, kite?

⁴Nae e da do punusi napua aginau maga, Po da do peve parati ki navasiana aginau maga mau, kite?

⁵A pe surata sikoti nasorosoroana, Go nam̃ele natuagu e pe mari m̃araverave paki namarisoreana;

⁶(P̃a mari au aga vei tea rowogiana lasa rowogi leana, Naga Sup̃e ega atae m̃ata ki nawialuaana aginau;)

⁷Navasiana aginau e pe tawasi m̃elu dua ki napua, Go nap̃op̃ogu e pe surata dausi namatagu maga, Go te naloaana sikai e pe vuluti nam̃elearugu maga:

⁸P̃a mari au aga sapura ki, go tea p̃ota ega kanikani; Go tea waina ega visou vanua aginau, ega vei tea vaku‐lua‐ana.

⁹Nap̃op̃ogu e pe vei tea surueana paki te nagoroi sikai, Go a pe kusugoro namata nasum̃a ki tea ni m̃aladigi kinau:

¹⁰P̃a mari nagoroi aginau ega magi tea p̃ota sikai mani, Go ega vei narup̃a ki tea p̃ota maga.

¹¹Nalakena e pe vei natageleana warua sikai; E pe vei namarinaleotageleana sikai waina e pe vataka ni navaratiana ki tea vasap̃otae maga:

¹²Nalakena e pe vei nakapu sikai waina e pe kani puoli pa pa paki Namarisakiana, Go waina e pe vaku lua naleo veaniana aginau maga mamau puti.

¹³A pe tip̃adoa navululuana ki tea suasua naanoai aginau, kite tea suasua nagoroi aginau, Ragi waina ero pe mari navululuana adeada paki nau:

¹⁴A pe wo mari nasava ragi waina Sup̃e e pe wo duleana? Go ragi waina e pe wo umai punusi au, a pe wo pasadara e ki nasava?

¹⁵Tea waina e dawona kinau nasum̃a ni kanao e da moro dawona ki nia mau, kite? Go e da pei tea sikai maau waina e dawona ki puti gida nasum̃a ni kanao mau, kite?

¹⁶A pe mauti tea tika ki namasauana adeada, Kite a pe mari namata ni nagoroi malepu ero pe sere losiwo;

¹⁷Kite a pe masikigu gani navinaga aginau, Go namalepu e pe ta gani te seara kakada mau;

¹⁸(Nalakena pae ragi ni navusavusaana aginau a pakale a dapala a pe vei tamana, Go a pei tea maraki pisei ki aneana pae nap̃ele ni p̃ilagu;)

¹⁹A pe vunusi tea sikai e pe mate puoli nalakena tea suniana e dika, Kite tea rogokitesa e pe ta peani tea sugoro e mau;

²⁰Nawarena e pe ta pasa m̃ata kinau mau, Go e pe ta dape navivitinuana ki nam̃au ni shiip aginau mau;

²¹A pe sike nam̃elearugu dip̃a namalepu maga, Nalakena a pe vunusi tea silae au namata‐pua:

²²P̃a mari napaugu ega maroe, Go narugu ega vei tea marikotovi‐ana.

²³Nalakena a matau ki namarisakiana pae Sup̃e, Go a mari sa lawodu narae ni natatap̃auana aneana.

²⁴A pe mari kold e pe vei navavatuana aginau, Kite noa naga kold tautau e pe vei nasaralomauana aginau;

²⁵A pe samasama nalakena nasogolapaana aginau e pe warua, Kite nalakena nam̃elearugu e pe talua naleo laapa;

²⁶A pe leo punusi elo ragi waina e pe to dara, Kite atelagi ragi waina e pe to surata nalagaana;

²⁷Go nap̃op̃ogu e pe vei tea surueana, Go nawokagu e pe tum̃ili nam̃elearugu:

²⁸E pe moro pei namarinaleotageleana sikai waina e pe vataka Ni navaratiana ki tea vasap̃otae maga: Nalakena a pe vasagoro sua Sup̃e ni elagi.

²⁹A pe laelaea namarisakiana ki tea waina e pe vilosi au, Kite dum̃agu dape au sake, tea sa e pe va parati ki nia;

³⁰(Go a da suasua naga nawokagu ega mari naleo sa mau, Doko do datago namauriana aneana ki navasasakiana sikai:)

³¹Naatam̃oli maga ni tap̃aup̃au aginau eu pe ta noa naga, Sei e doko waina e da puka ki navinaga aneana mau?

³²Nam̃enaki e da maturu katama mau; A p̃olagati namata ni nasum̃a aginau paki tea vanovano;

³³A pe mari dapala naatam̃oli maga, po dum̃agu kovagoro natapiriana aginau maga, Doko do dasuru ki namarinaleotageleana aginau nap̃alaugu;

³⁴Nalakena a matau ki tea laapa, Go nalakena namidoaki‐p̃alo‐kiana ki naworawora maga, e mari au a mataku p̃arua, Dapala waina a punuta po da paki katama pano mau.

³⁵Awi, a pe veani tea sikai waina e pe rogo au! (P̃a leo, namasauana aginau e pei naga Tea Kasua Mau ega vasadara au;) Go a pe veani tusi ni navasadip̃aana waina tea vululu kinau e pe midiri a!

³⁶A pe tapetape a doko napaugu; A pe otisoki a doko au dapala vauvau sikai.

³⁷A pe noasai paki nia naveveana ni navasiana aginau maga; A pe vaki m̃aladigi ki nia dapala tea maraki sikai.

³⁸Natano aginau e pe kua pioso dip̃a au, Go nasalena maga eu pe mamau dagi;

³⁹A pe kani nawa kakana maga masale ki navakokotoana, Kite a pe mari talakeana maga eu pe tape puoli ki namauriana adeada:

⁴⁰P̃a mari tea makalikali maga euga visou oli whiit, Go nam̃enau sa oli barle. Navasaana maga ki Yob eu nopu.