Read Nguna Togoa Etafe North YOB 32 Bible Online

YOB 32 - Nguna Togoa Etafe North bible

YOB 32

¹Nalakena tea wanogoe naatam̃oli dolu wanogoe eu makoto ki navasaana paki Yob, nalakena nae e dum̃ana leana namatana maga.

²Go namaetoana ki Elihu natu ni Barakel naatam̃oli ni Bus, tea ni nawora ni Ram, e pavaga dip̃a Yob, nalakena e dum̃ana mari leana ki nia narae ni Sup̃e.

³Go namaetoana aneana e pavaga dip̃a tana ri dolu, nalakena eu da pap̃ai te navasadaraana sikai mau, ma eu dip̃akotovi Yob.

⁴Go Elihu e ko da pasa paki Yob mau, nalakena nara eu matua do liu.

⁵Go ragi waina e punusi naga te navasadaraana sikai e da doko nawoka ni tea tolu maga wanogoe mau, namaetoana aneana e pavaga.

⁶Go Elihu natu ni Barakel naatam̃oli ni Bus, e pasa, po naga, Kinau a pei tea kiki, go nimu ku pei tea matua liu; Nalakena tea wanogoe a soki du, po mataku noakisai mu namidoaki‐p̃otae‐ana aginau.

⁷A naga, Naaleatia maga euga vasa, Go natau laapa euga vasa pisei ki namanumatuaana.

⁸Ma e pei naata ni naatam̃oli, namero ni Tea Kasua Mau, Waina e dua ra namidoaki‐ataeana.

⁹E da pei tea warua maga sikida waina eu manumatua mau, Kite tea matua maga waina eu midoaki‐atae tea waina e leana.

¹⁰Nalakena tea wanogoe a naga, Kuga taki dorogo paki nau; Go kinau ma aga wo noasai namidoaki‐p̃otae‐ana aginau.

¹¹Kuga leo, a doko raki navasaana animu maga, A daki nadaligagu paki navasapululu‐ana animu maga, Ragi waina ku leousiusi nasava waina kuga noa e.

¹²Go a daki dorogo paki mu, go kuga leo, Nimu ku da pasap̃ai Yob mau, Go ku da pasadara navasaana aneana maga mau.

¹³Kuga matamatua mase ku pe naga, Au po pap̃ai namanumatuaana; Sup̃e ega mari matua ki nia, ega ta pei naatam̃oli mau:

¹⁴Go aga wo da mari matana ki navasaana dapala tea maga wanogoe mau; Kite pasadara e ki nanoaana animu maga mau.

¹⁵Eu saram̃akoto, eu da moro pasadara mau: Eu da mariatae moro pasa te navasaana sikai mau.

¹⁶Go kinau aga vunuta nalakena nara eu da pasa, Nalakena eu lawodu dorogo po da moro pasadara mau, kite?

¹⁷Kinau ma aga wo pitua ki navasadaraana aginau, Kinau ma aga wo noasai namidoaki‐p̃otae‐ana aginau.

¹⁸Nalakena a pura ki navasaana maga; Nap̃alaugu e do maridie au.

¹⁹Kuga leo, nap̃op̃ogu e dakiusi waine waina e p̃ono; E dakiusi nawili vau, e m̃aladigi naga ega mapua.

²⁰Aga wo pasa naga aga vei tea vaka‐maromaro‐ki‐ana; Aga wo p̃olagati nagolena maga po pasadara.

²¹Aga wo da piragi narae mau; Kite pasa m̃om̃oa paki te naata mau.

²²Nalakena a mari sa pasa m̃om̃oa mau; Tea Tawona kinau e pe mari puoli kinau.