Read Nguna Togoa Etafe North YOB 33 Bible Online

YOB 33 - Nguna Togoa Etafe North bible

YOB 33

¹Ma Yob, p̃a rogo nanoaana aginau, a pavara ni ko asa, Po daki dorogo paki navasaana aginau maga.

²P̃a leo, aga wo maga, Namenagu ega wo pasa nawokagu.

³Navasaana aginau ega wo noa naleanaana ni nap̃op̃ogu: Go nagolegu eroga wo lua ki naataeana doko natautauana.

⁴Naata ni Sup̃e e mari dawona ki nau, Go namero ni Tea Kasua Mau e dua au namauriana.

⁵Ku pe mariatae, p̃a vasadara au; P̃a mari matana ki navasaana anigo naraegu, p̃a lawodu.

⁶P̃a leo, toro pataka sikai narae ni Sup̃e: Kinau ma a pei tea mari‐dawonaki‐ana m̃elu naruku.

⁷P̃a leo, namatakilakila‐kinau‐ana ega wo da mari ko p̃a mataku, Go nam̃elearugu ega wo da madaga doko ako mau.

⁸Ma nigo ku dum̃am̃a pasa nadaligagu, Go a dogo nadaleo ni navasaana anigo maga, ku naga,

⁹Kinau a dautau, a dika natapiriana; sogi e da liko au mau, Go namarinaleotageleana e da doko au mau:

¹⁰P̃a leo, e do laaga nalakena maga dip̃a au, E midoa ki nia naga a pei tea kokona ki nia;

¹¹E do alasoki natuagu doko nakau maga, E do leosoki napua aginau maga mamau puti.

¹²P̃a leo, tea waina ku noa e, e da leana mau; Aga wo noa ki‐go naga Sup̃e e pei tea warua liu naatam̃oli.

¹³Ekasana ku do pululu ki nia, doko do naga, Ega wo da pasadara te navasaana aginau mau?

¹⁴Sup̃e e do pasa sala sikai, go sala kerua, Ma naatam̃oli e da midoaki atae a mau.

¹⁵Doko nap̃erea, navunusiana sikai ni p̃ogi, Ragi waina namaturu‐daratara‐ana e doko naatam̃oli maga, Ragi waina eu do matamaturu doko nawewele adeada maga;

¹⁶Ragi wanogoe e do durisai nadaliga ni naatam̃oli maga, Po do dapavanau ra, doko do mari ra eu mataku,

¹⁷Naga ega mari naatam̃oli ega liliu m̃elu dua ki namidoakimasau‐ana aneana. Go naga ega taelua navei‐p̃op̃ovakilagi‐ana kiana;

¹⁸E do mauti naatana m̃elu dua ki m̃orutano, Go namauriana aneana naga lova ega ta mari puoli ki nia mau.

¹⁹Naatam̃oli e do pei tea varatiana ki navitivitinuana doko nawewele aneana, Go ki napariana pitip̃atip̃a doko navatuna maga:

²⁰Namauriana aneana e do mamarago ki navinaga, Go naatana ki navinaga lolo.

²¹Nap̃okasina e mavunuvunu, e da moro pei tea vunusiana mau; Go navatuna maga waina eu da pea pei tea vunusiana mau, eu do sasama.

²²Naatana e do paki m̃aladigi ki m̃orutano, Go namauriana aneana paki tea mari puoli maga.

²³Tea tautauana sikai e pe maneana doko, Tea vasadoa sikai, tea sikai ni manu sikai, Waina ega visei ki naatam̃oli tea waina e leana ki nia;

²⁴Go e pe saup̃ia ki nia, e pe naga, P̃a mauti a m̃elu dua ki m̃orutano, A po maneana pap̃ai naulu ni natauluaana;

²⁵Nap̃okasina ega moro p̃ia liu nap̃okasi ni piakiki; Ega liliu paki naaleatia ni naveinatureai‐ana aneana:

²⁶Naatam̃oli ega wo pavara paki Sup̃e, go ega saup̃ia ki nia; Ega wo punusi naraena ki nasamasamaana; Nalakena e liliu ki naleanaana aneana paki naatam̃oli.

²⁷Go ega wo lega narae ni naatam̃oli maga, po naga, A mari naleo sa po p̃elu‐ki‐doa tea waina e leana, Go e da lagati dua au asa mau:

²⁸E pualua naatagu m̃elu dua ki m̃orutano, Go namauriana aginau ega wo leo punusi namarama.

²⁹P̃a leo, tea mamau puti wanogoe Sup̃e e do mari a, Paka rua go paka tolu, paki naatam̃oli,

³⁰Naga ega viragi lua naatana m̃elu dua ki m̃orutano, Naga ega vei tea maramalagatiana ki namarama ni namauriana.

³¹P̃a midoa ki parati ki Yob O, p̃a taki dorogo paki nau: P̃a vunuta, go kinau aga wo pasa.

³²Ku pe veani te navasaana, p̃a vasadara au: P̃a vasa, nalakena a masauna naga aga mari leana ki‐go.

³³Ku pe tika, p̃a taki dorogo paki nau: P̃a vunuta, go aga wo pasa pisei ki‐go namanumatuaana.