Read Nguna Togoa Etafe North YOB 34 Bible Online

YOB 34 - Nguna Togoa Etafe North bible

YOB 34

¹Go Elihu e moro pasa, e naga,

²Kuga rogo navasaana aginau maga, Nimu naatam̃oli manumatua maga: Go kuga taki nadaligamu paki nau, Nimu waina ku peani namidoakiatae‐ana.

³Nalakena nadaliga e do maridogo navasaana maga, Dapala waina namena e do mena dogo navinaga.

⁴Tuga tum̃agida matadoa tea waina e leana: Tuga tum̃agida atae tea waina e p̃ia.

⁵Yob e naga, Kinau a leana, Go Sup̃e e dape lua navasap̃otaeana aginau:

⁶A leana ma a pei tea mariana a pei tea sorosoro sikai; Wotu aginau e mari sa apu ma a dika natapiriana.

⁷Seve naatam̃oli e doko waina e dakiusi Yob, Waina e do munu namari‐saudoaki‐ana dapala noai?

⁸Waina e do saisai sikoti tea mari dagele maga, Po do surata sikoti naatam̃oli sigisigileo maga?

⁹Nalakena e naga, Naatam̃oli e pe maro Sup̃e, E pe ta pei tea silaeana te navatuna mau.

¹⁰Nalakena tea wanogoe kuga taki dorogo paki nau, Nimu naatam̃oli midoaki atae maga: Ega toko uvea ki Sup̃e naga ega mari nasigisigileoana; Go ki Tea Kasua Mau naga ega mari namarinaleotageleana.

¹¹Nalakena ega vae nawosiana ki naatam̃oli sikai, Ega wo lagati dua e asa, Go ega vae namariana aneana maga, Ega wo mari a paki nia.

¹²Sup̃e ega wo da mari nasigisigileoana mau, Go Tea Kasua Mau ega wo da p̃eluki‐doa navasap̃otaeana mau.

¹³Sei waina e mari a e pei tea tap̃au dap̃au maramana? Kite sei waina e mari dawona ki maramana mamau?

¹⁴E pe tum̃ana dape liliua ki naatana, Po saisai ki namerona dum̃ana paki nia;

¹⁵Sara nap̃okasi eu pe wo mate puoli puti, Go naatam̃oli e pe wo liliu paki nam̃otam̃ota ni natano.

¹⁶Go ku pe veani namidoaki‐ataeana, p̃a rogo tea waia: P̃a taki dorogo paki nadaleo ni navasaana aginau.

¹⁷Tea waina e pe vilosi naleanaana e pe wo maramara, kite? Go p̃a wo dip̃akotovi tea waina e leana po kasua, kite?

¹⁸E p̃ia naga euga noa ki nawota sikai, Nigo ku pei tea p̃alo, kite? Kite paki navarapule maga, Ku pei tea sigisigileo maga, kite?

¹⁹Go sei ega noa e paki tea waina e da do piragi narae ni tea vakilagi maga mau, Go waina e da do dodomadagani tea sogolapa p̃arua liu tea tika mau? Nalakena eu mamau puti pei nawosiana ni nam̃elearuna maga.

²⁰Ragi ni nawilimatana sikai euga mate, euga mate p̃ogi matua; Narei maga euga vei tea mariana euga m̃anaunau, po pano puoli, Go tea vakilagi maga euga vei tea tape‐lua‐ana pano, nam̃elearu ega tika asa.

²¹Nalakena namatana ero do leosoki napua maga ki naatam̃oli, Go e do leo punusi nasurataana aneana maga mamau puti.

²²Namaligo e dika sa, go melu ni namateana, Waina tea mari dagele maga euga tokoloku asa.

²³Ega wo da magi naatam̃oli mari natuta mau, Naga ega sili paki navasap̃otaeana narae ni Sup̃e.

²⁴E do mari p̃oraworae naatam̃oli kasua maga, naleousiusiana e dika, Go e do lawo ki tea p̃ota maga du oli ra.

²⁵Nalakena e atae nawosiana adeada maga; E do dap̃olosiwo ki da doko p̃ogi, Go eu do pei tea mari‐puoli‐kiana.

²⁶E do atugi ra lina narae ni naatam̃oli maga, Nalakena nasigisigileoana adeada maga;

²⁷Nalakena eu dawasi m̃elu dua ki narausi‐a‐ana, Po da masau midoaki parati ki napua aneana maga mau:

²⁸Eu mari nakua‐pioso‐ana ki tea tika e umai paki nia, Go e dogo natagiana ki tea rogokitesa.

²⁹E pe vunuta doko, sei ega tip̃akotovi a? Go e pe tasuru ki naraena, sei ega leo punusi a? E pe vaki nalauna sikai, kite naatam̃oli ega sikina:

³⁰Naga naatam̃oli sigisigileo ega ta maramara mau, Naga tea waina ega vuagoro narei ega tika.

³¹Te naata sikai e noa ki Sup̃e, naga, A po sua navaratiana, aga wo da moro mari naleo sa mau:

³²Tea waina a da punusi a mau, p̃a vasa pisei kinau asa: Go a pe mari dagele, a pe wo da moro mari a mau, kite?

³³Ega wo lagati dua ko ega tapala namasauana anigo, Waina ku karaikita e, kite? E one ako one naga nigo p̃a matadoa e, ega ta pei kinau mau: Nalakena tea wanogoe p̃a vasa ki tea waina ku atae a.

³⁴Naatam̃oli midoaki atae maga euga wo noa kinau, Go naatam̃oli manumatua waina e pe rogo au, ega wo naga:

³⁵Yob e do pasa, namidoaki‐ataeana e dika, Go navasaana aneana maga eu dika namanumatuaana.

³⁶Yob e pe vei tea maridogoana pa pa e pe nopu, e pe wia, Nalakena e pasa dapala naatam̃oli sigisigileo maga.

³⁷E do sokari natap̃aroana aneana ki navei‐p̃auluulu‐ana, E do dum̃ana dapap̃osawosa m̃aleoputo kakagida, Po do mari navasaana aneana maga eu laapa narae ni Sup̃e.