Read Nguna Togoa Etafe North YOB 35 Bible Online

YOB 35 - Nguna Togoa Etafe North bible

YOB 35

¹Go Elihu e moro pasa, e naga,

²Ku midoa ki nia naga tea wanogoe e leana, kite? Waina ku naga, Naleanaana aginau e p̃arua liu tea ki Sup̃e,

³Waina ku naga, Ega wo p̃ia ki‐go nasava? Go, Aga wo peani nasava p̃arua liu waina a pe mari naleo sa?

⁴Kinau aga wo pasadara mu, Nimu ma tam̃a ri maga.

⁵P̃a leo paki nakoroatelagi maga, po punusi; Go p̃a leo punusi napopouru maga, waina eu pakilagi liu ko.

⁶Ku pe mari naleo sa, ku pe mari nasava dip̃a e? Go natapiriana anigo maga eu pe laapa, Ku pe mari nasava paki nia?

⁷Ku pe leana, ku pe tua e nasava? Kite e pe tape nasava ki nam̃elearum̃a?

⁸Nasigisigileoana anigo ega sa ki naatam̃oli sikai dakiusi ko; Go namarinaleoleanaana anigo ega wia ki naatam̃oli natuna.

⁹Nalakena nalapalapaana ni nariesokiana maga, eu do kuapioso: Eu pioso raki nasilaeana nalakena naru ni tea mari kasua.

¹⁰Ma te naata e da noa, Sup̃e, Tea Tawona kinau wai? Waina e do pitua ki nalegaana maga p̃ogi,

¹¹Waina e do pasa pisei ki gida, naga tu atae liu nalo tuavati maga ni maramana, Po do mari gida naga tu manumatua liu manu maga ni namalopa?

¹²Eu pioso ma te navasadaraana e dika, Nalakena navei‐p̃op̃o‐vakilagi‐ana ki naatam̃oli sa maga.

¹³Sup̃e ega wo da dogo tea p̃alo mau, Go Tea Kasua Mau ega wo da midoa ki nia mau.

¹⁴Go p̃arua liu ragi waina ku noa naga ku da punusi a mau, Naga nalakena e doko naraena, go nigo ku doko raki nia!

¹⁵Ma nalakena e da mari navaratiana namaetoana aneana mau, Go nalakena e da midoa ki naleomadagaana mau;

¹⁶Nalakena tea wanogoe Yob e p̃olagati nawokana, po do pasa p̃alo; E pasa parau, naataeana e dika.