Read Nguna Togoa Etafe North YOB 36 Bible Online

YOB 36 - Nguna Togoa Etafe North bible

YOB 36

¹Go Elihu e moro pasa, e naga,

²P̃a soki au ragi kiki, go aga wo mari pisei ki‐go: Nalakena aga ko magi Sup̃e pasa te navasaana.

³Aga wo piragi naataeana aginau pae uvea umai, Go aga wo pasa leana ki Tea Tawona kinau.

⁴Navasaana aginau maga eu da pei nasorosoroana mau: Tea waina e p̃ialua ki naataeana e sikoti ko doko.

⁵P̃a leo, Sup̃e e kasua, go e da do dip̃a doa te naata mau: E pei tea marimatua doko nakasuaana ni namanumatuaana.

⁶E da do mauti namauriana ki tea sigisigileo mau: Ma e do dua tea rogokitesa navasap̃otaeana leana.

⁷E da do lolop̃ota ki tea leana maga mau: Ma e do lawo ki da eu dasake sikoti nawota maga, doko malo tasake pa pa po du mau du, Go eu pei tea sikeana pakilagi.

⁸Go eu pe vei tea soliana ki namori maga, Po pei tea vuasokiana natali maga ni narogokitesaana;

⁹Ragi wanogoe e do pisei ki da nawosiana adeada, Go natapiriana adeada maga, waina eu dum̃ada mari lagilagi asa.

¹⁰Go e do durisai nadaligada paki natapavanauana, Po do pitip̃aki naga euga maradoa m̃elu dua ki namarinaleotageleana.

¹¹Eu pe rogo parati ki nia po do maneana suasua, Eu pe toko p̃ia doko sara naaleatia ni namauriana adeada, Po peani nalaelaeaana sara natau adeada maga.

¹²Ma eu pe ta dogo parati ki nia mau, Eu pe mate puoli ki lova, eu pe mate naataeana e dika.

¹³Ma tea maga waina eu sigisigileo nap̃op̃oda, eu do daua ki namaetoana: Eu da do pioso raki nasilaeana mau, ragi waina e do solisoki ra.

¹⁴Eu mate ragi ni navei‐natureaiana adeada, Nara ma tea loa maga eu pei taua puoli.

¹⁵E do pualua tea rogokitesa ki narogokitesaana aneana, Po do durisai nadaligada ki nariesoki‐ra‐ana.

¹⁶Go e masauna naga ega viragi lua ko m̃elu dua ki narogokitesaana pano paki tokora welewelea sikai, Tokora waina nariesokiana e dika asa; Go naga tea waina ega vei tea ovarakiana wede anigo, ega vura ki nam̃aladua.

¹⁷Ma nigo ku pura ki navasap̃otaeana ni tea sigisigileo maga; Navasap̃otaeana go navaratiana leana ero puati ko.

¹⁸P̃a vavaigoro naga namaritausuana ega ta mari ko p̃a vasa saudoa mau; Go naga nawaruaana ni naulu ni natauluaana ega ta mari ko p̃a tawasi mau.

¹⁹Nakuapiosoana anigo ega mauti ko m̃elu dua ki narogokitesaana, Go nakasuaana mamau ni namarimatuaana anigo, kite?

²⁰P̃a ta do masau p̃arua ki p̃ogi mau, Ragi waina naatam̃oli maga eu do pei tea taeluaana asa.

²¹P̃a vavaigoro, p̃a ta maradoa paki namarinaleotageleana mau: Nalakena nigo ku dum̃am̃a matadoa tea waia, ku da matadoa narogokitesaana mau.

²²P̃a leo, Sup̃e e pei tea vakilagi namarimatuaana aneana: Sei waina e pei tea vasapiseiki sikai dakiusi a?

²³Sei waina e dip̃aki nia napua aneana? Kite sei waina ega noa, Nigo ku mari naleo sa?

²⁴P̃a midoa ki nia naga p̃a samasama ni nawosiana aneana, Waina naatam̃oli maga eu do lega nalegaana maga asa.

²⁵Naatam̃oli maga mamau puti eu punusi a; Naatam̃oli e do leo punusi a pae uvea.

²⁶P̃a leo, Sup̃e e p̃arua, go tu da atae a mau; Natau aneana maga eu mari sap̃o pei tea veve‐atae‐ana.

²⁷E do puati natuturu maga ni noai sake pakilagi, E do mari usa e do lawolawo m̃elu namavu aneana:

²⁸Waina napopouru maga eu do daki nia, Po do lawolawo p̃arua paki naatam̃oli.

²⁹Sei waina e mariatae midoaki atae nawelesakiana ni napopouru maga, Go tovae maga waina eu do kati m̃elu tap̃aup̃au aneana?

³⁰P̃a leo, e do p̃elesa ki namarama aneana dum̃ana dalivirigoro e; Go e do dap̃augoro epua maga ni natasi.

³¹Nalakena pae tea maga wanogoe e do pasap̃otae narei maga; E do pitua ki p̃arua ki navinaga.

³²E do kuluti nam̃elearuna maga ki navila; Po do pitip̃aki paki asa naga ega vila.

³³Nasaruruana kakana e do dogorogo ki nia, Naga e dotowo kasua ki namaetoana dip̃a namarinaleotageleana.