Read Nguna Togoa Etafe North YOB 37 Bible Online

YOB 37 - Nguna Togoa Etafe North bible

YOB 37

¹Go nalo ni tea wanogoe nap̃op̃ogu e do duruuru asa, Go e do soka dave m̃elu dua ki naliana.

²Kuga taki dorogo paki nasaruruana ni nadaleona, Go nataururuana waina e do m̃elu nawokana.

³E do dip̃aki lua e, e sokapule etano ni nakoroatelagi mamau, Go navila aneana e pano paki namatap̃ago maga ni maramana.

⁴Edaku ki tea wanogoe nadaleo sikai e do uru; Tovae e do kati, e pei nadaleo ni natatap̃auana aneana: Go e da do dugoro ra mau ragi waina nadaleona e do pei tea rogoana.

⁵Sup̃e e do mari tovae e do kati p̃arua; E do mari tea ni namagaana maga, Waina tu mari sa midoaki atae ra mau.

⁶Nalakena e do noa ki sno, P̃a to lawolawo natano; Go e moro noa e ki narikiti, go ki usa walapa aneana.

⁷E do pulusokigoro nam̃elearu ni sara naatam̃oli; Naga naatam̃oli mamau puti euga atae nawosiana aneana.

⁸Ragi wanogoe nalo tuavati maga eu do sili valea maga, Po doko tokora adeada maga doko.

⁹Suitaviro e do m̃elu em̃ago ni sauth umai: Go namamaladiana e do m̃elu dua ki north.

¹⁰E pei namero ni Sup̃e waina e do pitua ki aise: Go noai welewelea maga eu do gagataki kasua.

¹¹Go e do mari napopouru matolu e madaga ki noai; E do dip̃aki lua napopouru ni navila aneana pano usuraki sara tokora:

¹²E do pei tea vuadoaana ki nawowolauana aneana, Naga ega vakavuro tea mamau puti waina e do dip̃aki da asa, Usuraki narae ni maramana aneana:

¹³E pe vei natapavanauana, kite e pe magi navanua aneana, Kite e pe vei nadodomiana, ma e do mari a e pakilina.

¹⁴P̃a taki dorogo paki tea waia, Yob O; P̃a tu dorogo, po midoakiusiusi nawosiana ni namagaana maga ki Sup̃e.

¹⁵Nigo ku atae takana waina Sup̃e e do dua ra natip̃akiana aneana, Po do mari navila e do pila m̃elu napopouru aneana, kite?

¹⁶Nigo ku atae takana waina napopouru maga eu do dau, Nawosiana ni namagaana maga ki tea waina e p̃ialua ki naataeana, kite?

¹⁷Dapale sava tea suniana anigo maga eu do mari ko ku do pivitinu, Ragi waina navanua e du dorogo nalakena nalagi ni sauth?

¹⁸Nigo ku mariatae sai ki nakoroatelagi, Waina e kasua dapala titiro takiana sikai, Dapala waina nae e do mari a, kite?

¹⁹P̃a visei ki gida tea waina tuga wo noa ki nia asa; Nalakena tu mari sa mari m̃ata ki navasaana anigida nalakena namidodoana maligo.

²⁰Ega vei tea noaana paki nia naga a masau pasa, kite? Kite naatam̃oli e pe wo masauna naga e pe vei tea tinomiana, kite?

²¹Go naatam̃oli maga eu da punusi namarama waina e do marama elagi mau: Ma nalagi e do liu pano, po do mari dautau ki da.

²²Namarama wia e do m̃elu north umai: Natatap̃auana mataukiana e doko sikoti Sup̃e.

²³Nalo ni Tea Kasua Mau, tu mari sa leousiusi atae a; E pakilagi liu nalo ni namarimatuaana go naleanaana: Tea maraki ni namarinaleoleanaana ega wo da diesoki mau.

²⁴Nalakena tea wanogoe naatam̃oli maga eu matau ki nia: E da midoaki tea maga waina eu dum̃ada midoaki da naga eu manumatua mau.