Read Nguna Togoa Etafe North YOB 38 Bible Online

YOB 38 - Nguna Togoa Etafe North bible

YOB 38

¹Ragi wanogoe Yehovah e pasadara Yob m̃elu suitaviro, e naga,

²Naatam̃oli waia e pei sei waina e do melugoro namidoakip̃otae‐ana ki navasaana maga masale ki naataeana?

³P̃a tasoki namalom̃a dapala naatam̃oli; Nalakena aga wo pusuusu ki‐go, go p̃a vasadara au.

⁴Nigo ku doko esava ragi waina kinau a lawo ki maramana doko laketano kakana maga? Ku pe veani namidoaki‐atae‐ana, p̃a noasai a.

⁵Sei e dawona ki narowogiana kakana? Nigo ku atae a, kite? Kite sei e dowogi a ki namea totowo?

⁶Laketano kakana maga eu pei tea lawokiana paki esava? Kite sei e lawo ki vatu ni naweluki kakana,

⁷Doko ragi waina m̃asoe maga ni malip̃ogi eu mamau lega, Go Sup̃e natuna maga eu kola laelaea?

⁸Kite sei e kokoro p̃onoti natasi ki namata maga, Ragi waina e sara dave dapala e pe m̃elu dua ki nasum̃a ni kanao;

⁹Ragi waina a mari napopouru e pei sugoro kovagoro kakana, Go namaligo wono e maneana pei nakulukulu vivisi a,

¹⁰Po maneana dawona ki kokoi kakana maga, Po lawosoki tea walagoto maga go namata maga,

¹¹Po naga, Tokora wanogoe p̃a liliu asa; Go tokora wanogoe napeao lagilagi anigo maga euga wo pei tea vuasokiana asa?

¹²Nigo ku dip̃aki malip̃ogi pae naaleatia vea mau anigo pa pa, Po mari natolaana e atae naliana;

¹³Naga ega vuasoki namatap̃ago maga ni maramana, Po sila ki lua tea sigisigileo m̃elu dua ki nia pano, kite?

¹⁴E pei tea mariana e panop̃ota dakiusi naruku vulusokiana; Go sara naleo eu doko lina dakiusi tea suniana sikai:

¹⁵Go namarama ki tea sigisigileo maga e pei tea mautiana kiada, Go naruda sikeana e pei tea marip̃oriana.

¹⁶Nigo ku sili paki namata noai maga ni natasi, kite? Kite ku surata em̃ago tukituki maga ni epua kite?

¹⁷Namata‐pua maga ni namateana eu doko lina sua paki‐go, kite? Kite ku punusi sua namata‐pua maga ni melu ni namateana kite?

¹⁸Nigo ku midoaki atae naweleweleana ni maramana, kite? Ku pe atae tea mamau puti wanogoe, p̃a noasai a.

¹⁹Napua paki tokora tokoana ni maramana e doko esava, Go nalo ni namaligo, tokora kakana wai?

²⁰Naga p̃a surata usi a pano paki kokoi kakana, Go naga p̃a leoatae napua maga paki nasum̃a kakana?

²¹Nigo ku atae a, nalakena nigo ku pea pakilina, Go naveveana ni naaleatia anigo maga eu laapa!

²²Nigo ku sili paki ekopu ni nasum̃a ni naleo tauakiana maga ni sno, Kite ku punusu nasum̃a ni naleo tauakiana maga ni usa ni vatu,

²³Waina a mauti ra raki ragi ni namarisakiana, Raki naaleatia ni navivimariana go navakalo, kite?

²⁴Dapale sava namavu e do pei tea tap̃otawotaeana? Kite dapale sava nalagi ruatu e do pei tea tip̃aki‐lua‐ana pano usuraki maramana?

²⁵Sei e dae p̃asi napua nap̃ap̃a ni natave maga, Po mari napua sikai raki navila go tovae;

²⁶Naga ega mari usa ega p̃owo navanua sikai waina naatam̃oli e dika asa; Naga ega p̃owo masop̃alo tokora waina naatam̃oli e da doko asa doko mau;

²⁷Naga ega mari natano garagara go p̃alo ega maro; Go nam̃enau malakesa naga ega visou?

²⁸Usa e peani tama sikai, kite? Kite sei e pesi natuturu maga ni nasovaki?

²⁹Aise e m̃elu nap̃ele ni sei? Go frost tare ni elagi, sei e pisola ki nia?

³⁰Noai maga eu po kasua dapala vatu, Go narae ni epua e gagataki ki namamaladiana.

³¹Ku mariatae otisoki Pleiades, Kite peresi natali solisoli maga ni Orion, kite?

³²Ku mariatae piragi lua Masaroth ragi kakana, kite? Kite ku mariatae maraki Bear go natuna maga, kite?

³³Nigo ku atae natawonakiana maga ni nakoroatelagi maga, kite? Ku mariatae lawosoki namarakiana kakana maramana, kite?

³⁴Ku mariatae sike nadaleom̃a paki napopouru maga, Naga natave ni noai maga ega tap̃augoro ko, kite?

³⁵Ku mariatae dip̃aki lua navila maga naga euga vano; Naga euga noa ki‐go, Kinami nea, kite?

³⁶Sei e mari namanumatuaana e doko nap̃alau ni naatam̃oli? Kite sei e pitua ki namidoakiatae‐ana paki nap̃op̃ona?

³⁷Sei e mariatae peve napopouru maga ki namanumatuaana? Kite sei e mariatae lip̃aki nawili noai maga ni nakoroatelagi,

³⁸Ragi waina nam̃otam̃ota ni natano e kasua, Go nap̃eretano maga eu dum̃ada puluti kasua ki da?

³⁹P̃a wo magi laion goroi palako ki tea katip̃oraeana, Kite pagani laion tureai maga,

⁴⁰Ragi waina eu do one natano valeada maga, Kite do kusugoro doko tokora ni natokolokuana, kite?

⁴¹Sei e do dua reven navinaga aneana, Ragi waina tea vusavusa aneana maga eu do pioso paki Sup̃e, Po do pasara nalakena navitoloana?