Read Nguna Togoa Etafe North YOB 39 Bible Online

YOB 39 - Nguna Togoa Etafe North bible

YOB 39

¹Nigo ku atae ragi ni navisolaana ni naninani mila maga ni napatira, kite? Kite ku midoaki parati ki ragi waina diir goroi maga euga visola, kite?

²Ku mariatae noa leana ki atelagi adeada maga waina eu diena asa, kite? Kite ku atae ragi adeada naga euga visola, kite?

³Eu dum̃ada kola, eu dapetape natuda, Eu doro dua ki navitinuana adeada maga.

⁴Natuda maga eu peani nakasuaana, eu doko namalasi wia; Eu m̃elu pano, po da moro umai te ragi mau.

⁵Sei e mari ass mila e dum̃ana pano? Kite sei e kakaro lua natali solisoli maga ni ass mila?

⁶Waina a dua e masop̃alo e pei nasum̃a aneana, Go navanua ni natasimena e pei tokora tokoana aneana.

⁷E da midoaki namarip̃araiana ni natokoana mau, Go e da dogo naviosoana maga ki tea suatoro mau.

⁸Tava maga mamau puti eu pei malo kaniana aneana, Go e do laaga sara nataputea go nakau mamalakesa usuraki ara.

⁹Oks mila ega wo suasua manigo p̃osiwosi, kite? Kite ega wo doko kelu anigo doko, kite?

¹⁰Ku mariatae soli oks mila ega sisi natano, kite? Kite ega wo karo natano dausi ko, kite?

¹¹P̃a wo pavatu asa nalakena nakasuaana aneana e p̃arua, kite? Kite p̃a wo pitua ki nawosiana anigo paki nia ega manigo mari a, kite?

¹²P̃a wo pavatu asa naga ega tape korn anigo umai, Po daua ki nia malo wokalesue anigo, kite?

¹³Nalivaru ni ostris ero do parivari ki naleomadagaana; Ma nalivaruna go nam̃auna ero pei tea ni nadodomiana, kite?

¹⁴Nalakena e do nadi ki atoluna maga natano, Naga euga tape navivitinuana ni nam̃otam̃ota ni natano,

¹⁵Po do malio ki nia naga natua e pe marip̃orosi ra, Kite naga nalo tuavati ni namalasi e pe vasi ra.

¹⁶E do mari kasua paki natuna maga, dapala eu pe ta pei tea aneana maga mau: Nawosiana aneana e pei tea p̃alo ma e da mataku mau;

¹⁷Nalakena Sup̃e e mauti namanumatuaana kiana, Go e da dua e namidoaki‐atae‐ana mau.

¹⁸Ragi waina e do dum̃ana dakati a naga ega sava, E do muru ki saudoa ki horse go tea sakesaake asa.

¹⁹Nigo ku dua horse nakasuaana aneana, kite? Nigo ku kovagoro nanoana ki nam̃au kuvakuva kakana, kite?

²⁰Nigo ku mari a e sokamidi dapala midiri, kite? Toro ni naviragusuana aneana e pei tea mataukiana.

²¹E do kili pesi nap̃aloa, e do maro sake ki nakasuaana aneana: E do dave pano naga ega sua nalikau maga ni navakalo.

²²E do mari saudoa ki namatakuana, go e da p̃ilake mau; Go e da do liliu pa dua ki lova mau.

²³P̃olaga e do dap̃arap̃ara asa, Go naio vilavila, go naio varau.

²⁴E do dinomi natano ki namaetoana go ki namaritausuana; Go e da do saralomau nadaleo ni paiga mau.

²⁵Ragi waina paiga e do dagi, e do naga, Aha! E do sidogo nap̃o ni naviviatuana em̃ae, Nasaruruana ni m̃aau maga, go nararasaana.

²⁶Mala e do diri ki namanumatuaana anigo, Po do sai ki nalivaruna maga paki sauth, kite?

²⁷Ikila e do sake pakilagi ki natip̃akiana anigo, Po do mari vetena elagi mau kite?

²⁸E doko vatu laketoko, e pei tokora tokoana aneana, Doko nam̃asua ni napatira, go tokora kasua.

²⁹Tokora wanogoe e do leo laaga tea katip̃oraeana asa; Namatana maga ero do leo punusi a uvea.

³⁰Natuna maga eu do dum̃ili nada: Go tokora waina nap̃atoko mate e doko asa, Tokora wanogoe nae ma e doko asa.