Read Nguna Togoa Etafe North YOB 4 Bible Online

YOB 4 - Nguna Togoa Etafe North bible

YOB 4

¹Go Elifas naatam̃oli ni Teman e pasadara, po naga,

²Naata sikai e pe maridogo pasa paki‐go ku pe wo maeto, kite? Ma sei e mariatae dum̃ana soki a ega ta pasa mau?

³P̃a leo, nigo ku dapavanau tea laapa, Go ku mari nam̃elearu manainai maga eu kasua.

⁴Navasaana anigo e silae tea waina e dapilagona, Go ku mari nap̃atua malovalova maga eu kasua.

⁵Ma ragi waia e po pa parati ki‐go, go nigo ku dodosua; E po kisidogo ko, go nigo ku m̃anaunau.

⁶Namatau‐ki‐Sup̃e‐ana anigo e da pei nasaralomauana anigo mau, Go naleogoroana anigo nawialuaana ni napua anigo maga, kite?

⁷P̃a midoaki parati ki, a pavara ni ko asa, Naata sikai e mate puoli sogi e dika asa, kite? Kite tea leana e pei tea toropusiana, kite?

⁸A punusi naga tea maga waina eu do sisi namarinaleotageleana, Po do sapura ki namarisakiana, Eu do dagaukotovi sokota ki da.

⁹Ki namero ni Sup̃e eu mate puoli, Go ki suidaka ni namaetoana aneana eu sirinopu.

¹⁰Nauruana ni laion, go nadaleo ni laion maeto, Go napati ni laion tureai maga eu pei tea marip̃oriana.

¹¹Laion matua e mate nalakena e dika tea katip̃oraeana, Go laion goroi natuna maga eu pei daperavera.

¹²Naleo sikai e panako umai pakilina kinau, Go nadaligagu e dape natalakolakoana kakana.

¹³E doko namidoakiana ni navunusiana maga ni p̃ogi, Ragi waina namaturuana e dowo naatam̃oli maga.

¹⁴Namatakuana e pakilina kinau, go naruuruana, Waina e mari navatugu maga eu parivari.

¹⁵Nalagi sikai e sau duagoto naraegu; Nalolu ni nap̃atokogu e sisikara.

¹⁶E du dorogo, ma a da leop̃otae naleo‐punusi‐ana kakana mau; Nunu sikai e doko kivea ki namatagu: Navunutaana e doko go a dogo nadaleo sikai, e naga,

¹⁷Naatam̃oli waina e mate atae e leana liu Sup̃e, kite? Naatam̃oli sikai e dautau dakiusi Tea Maridawona ki nia, kite?

¹⁸P̃a leo, e da do pavatu tea suasua aneana maga mau; Go e do midoaki dip̃a agelo aneana maga nasasap̃oana:

¹⁹Ma p̃arua liu tea maga waina eu doko nasum̃a maga ni naruku doko, Waina laketano kakada e doko nam̃otam̃ota ni natano, Waina eu pei tea mari‐p̃orosi‐ana dakiusi tuluki!

²⁰Doko namawota ni malip̃ogi go ni ragi melu, eu pei tea marip̃oraworaeana: Eu mate puoli, go te naata e da midoa ki nia mau.

²¹Navakilagi‐liu‐ana adeada e da pei tea vuati‐lua‐ana kiada, kite? Eu mate, e da pei ki namanumatuaana mau.