Read Nguna Togoa Etafe North YOB 40 Bible Online

YOB 40 - Nguna Togoa Etafe North bible

YOB 40

¹Go Yehovah e moro pasa paki Yob, e naga,

²Naata waina e do mari p̃auluulu paki Tea Kasua Mau, ega makoto asa, kite? Naata waina e do pasa kasua paki Sup̃e, ega wo pasadara naleo maga wanogoe.

³Go Yob e pasadara Yehovah, po naga,

⁴P̃a leo, kinau a pei tea kiki; Aga wo pasadara ko nasava? A doropusi nam̃elearugu nawokagu.

⁵A paka sikai pasa, go aga wo da moro pasadara mau; Io paka rua, ma aga wo da moro noa te navatuna mau.

⁶Ragi wanogoe Yehovah e pasadara Yob m̃elu suitaviro, e naga,

⁷Ragi waia p̃a tasoki namalom̃a dakiusi naatam̃oli: Aga vusuusu paki‐go, go p̃a vasadara au.

⁸P̃a wo mari navasap̃otaeana aginau ega vei tea m̃oli, kite? P̃a wo dip̃akotovi au, naga p̃a vei tea mari‐leana‐kiana, kite?

⁹Kite narum̃a e dakiusi naru ni Sup̃e, kite? Go nadaleom̃a e mariatae mari tovae ega kati dakiusi a, kite?

¹⁰P̃a tum̃am̃a dekei ki‐go ki navakilagi‐liu‐ana go ki nakasualiu‐ana; Po dum̃am̃a sugoro ko ki nadodomadaganiana go ki natatap̃auana.

¹¹P̃a taki lua namaetoana anigo: Go p̃a leo punusi sara tea leomadaga maga, po mari ra euga vakitano.

¹²P̃a leo punusi sara tea leomadaga maga, po mari ra euga vakitano; Go p̃a vasi soki tea sigisigileo maga ki natuam̃a tokora waina eu lawodu asa.

¹³P̃a tasuru ki da euga vei taua mamau nam̃otam̃ota ni natano; P̃a solisoki naraeda tokora sili ni etano.

¹⁴Ragi wanogoe aga wo noasai paki‐go naga nam̃elearum̃a ni matua ega tum̃ana mautipauri ko.

¹⁵Go p̃a leo, behemoth, waina kinau a mari a ma nigo; Nae e do gani nam̃enau dapala oks.

¹⁶P̃a leo, nakasuaana aneana e doko nawarena maga, Go namarimatuaana aneana e doko nap̃okasi ni nap̃elena.

¹⁷E do mari napuena e kasua dapala nakau sidar sikai: Nawa ni namaona eu dum̃ada pau soki ra.

¹⁸Navatuna maga eu dapala tea ni brass; Natawotuna maga eu dapala tea walagoto maga ni airon.

¹⁹Nae e pei naatulakeana ni nawosiana ki Sup̃e: Tea waina e mari a ega sikina mari lova aneana ega vaki m̃aladigi ki nia.

²⁰Tava maga eu do maneana pitua ki navinaga; Tokora waina nalo mila maga ni namalasi eu do p̃arowaro asa.

²¹E do one natano melu ni nakau lotus, Tokora ni natokolokuana ni nap̃alau nau, go malo vuravura.

²²Nakau lotus maga eu do melugoro e; Nakau willo maga ni nap̃ap̃a noaisara eu do dalivirigoro e.

²³P̃a leo, noaisara e pe sara peravera, nae e pe ta duruuru mau: Yordan e pe vuka pa pa paki nawokana e pe ta mataku mau.

²⁴Tea sikai ega vuasoki a ragi waina e do leleogoro, Kite puri sai nagisuna ki vaivai sikai, kite?