Read Nguna Togoa Etafe North YOB 41 Bible Online

YOB 41 - Nguna Togoa Etafe North bible

YOB 41

¹Ku mariatae puati lua leviathan ki tea tagau sikai ni naika, kite? Kite solisoki namenana ki natali sikai, kite?

²Ku mariatae sara ki namea sikai nagisuna, Kite puri sasama nasina ki tagau sikai, kite?

³Ega wo mari navavaraniana laapa paki‐go, kite? Kite ega wo pasa m̃osim̃osi ko, kite?

⁴Ega wo mari navasasokiana sikai paki‐go, Naga p̃a vuati a ega manigo suasua doko mau doko, kite?

⁵P̃a wo p̃aro ki nia dapala manu sikai, kite? Kite p̃a wo magi naatara anigo maga likoti a, kite?

⁶Tea araika maga euga mari a ega vei nakaniana sikai, kite? Tea vakokoto maga euga tum̃ada madeada dap̃otae a, kite?

⁷Ku mariatae mari nawilina ega vura ki tea tagau maga ni airon, Kite nap̃auna ki naio maga, kite?

⁸P̃a nadi ki nam̃elearum̃a asa; P̃a wo midoaki navivimariana, po da moro mari a mau!

⁹P̃a leo, naleogoroana ki naatam̃oli e pei tea p̃alo: E pe vunusi a, e pe wo da m̃anaunau asa mau, kite?

¹⁰Tea vei rae kasua waina ega viviari pulevule a e dika: Go naata sei e mariatae lawodugoro au?

¹¹Sei e pea dua au, naga aga vitua dip̃a paki nia? Naleo maga mamau puti waina eu doko etano ni nakoroatelagi mamau eu pei tea aginau.

¹²Aga wo da punuta nalo ni natawotuna maga mau, Kite nakasuaana warua aneana, kite torona.

¹³Sei e mariatae duatilua tea kovagoro aneana kiana? Sei e mariatae puri sai sokota ki nap̃olaga dua kakana?

¹⁴Sei e mariatae p̃olagati nawoka ni nasina? Napatina maga eu pei tea mataukiana.

¹⁵Naunana kasua maga eu pei nasamasamaana aneana, Eu dum̃ada puluti ra dapala eu pei vei tea vulusokiana.

¹⁶Sikai e dip̃a sokari kerua, Go namalopa e dika namawota kakada.

¹⁷Eu dum̃ada dasokasokata ki da; Eu dum̃ada puluti ra, eu mari sa pei tea tap̃otaeana mau.

¹⁸Nametueana kakana maga eu do pila, Go namatana maga ero dapala natola ni malip̃ogi.

¹⁹Nasulu soro maga eu m̃elu nawokana, Go riri nakapu eu do diriri.

²⁰Naasua e do m̃elu nagisuna, Dapala pot lotalota go nau soro.

²¹Namerona e do dokoni nam̃elevara vavaga maga, Go mena ni nakapu e do m̃elu nawokana.

²²Nakasuaana e doko nanoaana doko, Go namatakilakilaana e do dam̃alua naraena.

²³Tagotago ni nap̃okasina eu dum̃ada puluti ra; Eu dam̃ae soki a; eu mari sa pei tea risua‐ki‐ana mau.

²⁴Nam̃ona e kasua dapala vatu sikai; E kasua dapala vatumaa ni etano.

²⁵Ragi waina e duleana, tea marimatua maga eu mataku: Nalakena nasaram̃akotoana eu pinovinoi.

²⁶Eu pe wokati a ki lova, e pe ta pei te navatuna mau; Kite naio, kite natip̃a, kite nalua.

²⁷E midoa ki nia naga airon e pei nap̃olaga, Go brass e pei nakau madada.

²⁸Natip̃a e mari sa mari a ega sava mau: Vatu puluaki maga eu dapala nap̃olaga m̃oli paki nia.

²⁹Naap̃e maga eu pei tea midoakiana naga eu pei nap̃olaga: E muru ki saudoa ki nanuanuakiana ni naio.

³⁰Nap̃elena e dakiusi matele makali maga ni lasa ni naruku: E dum̃ana p̃elesa ki nia nalepa dapala naleo wokalesue sikai.

³¹E do mari epua e do lotalota dapala pot sikai: E do mari natasi e dapala naroro lolo.

³²E do mari napua e do maramalaga edaku ki nia; Eu pe midoa ki nia naga nam̃orua e dare.

³³Tea waina e dakiusi a e da doko maramana mau, Waina e pei tea mariana e dika namatakuana.

³⁴E do leo punusi sara naleo vakilagi maga: E pei nawota dap̃au sara tea vakamatakua natuna maga.