Read Nguna Togoa Etafe North YOB 42 Bible Online

YOB 42 - Nguna Togoa Etafe North bible

YOB 42

¹Ragi wanogoe Yob e pasadara Yehovah, po naga,

²A atae naga pae ako naleo maga mamau puti eu pei tea mariataeana, Go naga te namidoaki‐soki‐ana anigo sikai e mari sa pei tea tugoroana mau.

³E pei sei waina e dika naataeana po melugoro namidoaki‐p̃otae‐ana? Nalakena tea wanogoe a po pasa ki tea waina a da midoaki atae a mau, Tea ni namagaana maga waina eu p̃arua ki nau, waina a da atae ra mau.

⁴P̃a taki dorogo, a pavara ni ko asa, go aga wo pasa; Aga wo pusuusu paki‐go, go p̃a noa ki sai au asa.

⁵Sala vea nadaligagu e dogo narogorogoana nalo kakam̃a; Ma sala waia namatagu e punusi ko.

⁶Nalakena tea wanogoe a dum̃agu mamarago ki nau, Go a midoaki doa doko nam̃otam̃ota go natanoapu.

⁷Go e doko, edaku ki naga Yehovah e pasa ki sua ki navasaana maga wanogoe paki Yob, naga Yehovah e pasa paki Elifas naatam̃oli ni Teman, e naga, Namaetoana aginau e pavaga dip̃a ko, go dip̃a tam̃a dua: nalakena nimu ku da pasa tea leana nalo kakagu dapala Yob, tea suasua aginau mau.

⁸Go nalakena tea wanogoe kuga manimu dape kau anoai larua go shiip anoai larua, po pa punusi Yob tea suasua aginau, po dum̃amu manimu mari naviriana ni navituaana tap̃arakiana sikai; go Yob, tea suasua aginau, ega wo manimu pavara; nalakena aga wo midoaki m̃ata ki nia, naga aga ta mari paki mu ega tapala namanumatavusaana animu mau; nalakena nimu ku da pasa tea leana nalo kakagu dapala Yob tea suasua aginau mau.

⁹Go dapala nogoe Elifas naatam̃oli ni Teman, go Bildad naatam̃oli ni Shuah, go Sofar naatam̃oli ni Naamah, eu pano po mari dapala waina Yehovah e dip̃aki da asa: go Yehovah e midoaki m̃ata ki Yob.

¹⁰Go Yehovah e piragi liliua ki Yob waina e pei tea viragi‐lua‐pavakotokiana, ragi waina e magi tana ri maga pavara: go Yehovah e dua Yob paka rua pataka ni tea mamau puti waina e pea peani a.

¹¹Go taina maga, go gorena maga, go tea maga waina eu pea atae a sala vea, eu mamau puti umai punusi a, go eu saisai sikoti a po ganikani nasum̃a aneana: go eu dagisi a, po pasa pakavakale a nalo ni tea sa mamau puti waina Yehovah e mari a e pakilina ki nia: go sara naatam̃oli eu sikasikai dua e matele sikai ni m̃ane go rig sikai ni kold.

¹²Go dapala nogoe Yehovah e pasa p̃ia ki Yob, go ragi edaku aneana e po p̃ia p̃arua liu ragi vea: go e peani shiip tivilia sikai go manu pati, go kamel manu latesa, go oks manu dua, go ass goroi manu sikai.

¹³Go e peani natuna naanoai larua go natuna nagoroi dolu.

¹⁴Go takalapa e salagisana ki Yemimah; go kerua nagisana Kesiah; go ketolu nagisana Keren‐hapuk.

¹⁵Go te nagoroi waina e pei rae wia dapala Yob natuna nagoroi maga, e da pei tea vap̃aiana usuraki navanua mamau mau: go tamada e dua ra tea veanipiolikiana m̃aleoputo ni goreda maga.

¹⁶Go edaku ki tea maga wanogoe Yob e mauri doko natau p̃onotia sikai rualima takuna pati, po punusi natuna maga, go natuna maga natuda maga, pa pa paki tagona kevati.

¹⁷Go Yob e mate, e matua po pura ki naaleatia maga.