Read Nguna Togoa Etafe North YOB 5 Bible Online

YOB 5 - Nguna Togoa Etafe North bible

YOB 5

¹P̃a vioso; te naata sikai e doko waina ega vasadara ko, kite? Go p̃a wo maradoa paki seve tea ni tea tapu maga?

²Namaetoana ega wo atugi tea veilala, Go namaritausuana ega wo maripunue tea manumatavusa.

³A punusi tea veilala ragi waina e do sai ki nakoana: Ma m̃araverave a pasa sa ki tokora tokoana aneana.

⁴Natuna maga eu madu uvea ki namautipauriana, Eu pei tea marip̃oraworaeana namata‐pua, Go tea vualua ra e dika.

⁵Tea vitolo maga eu gani nalolovaeana aneana, Po do dape lua e m̃elu dua ki nataputea vivitip̃a, Go tea vuagoro maga eu maga raki naloriki aneana maga.

⁶Nalakena nariesokiana e da m̃elu nam̃otam̃ota umai mau, Go narogokitesaana e da p̃otu sake m̃elu natano mau;

⁷Ma naatam̃oli e pakilina pei nalakena lomau, Dapala waina riri ni nakapu maga eu do diriri pakilagi.

⁸Ma kinau aga wo laaga Sup̃e, Go aga wo pitua ki naleo aginau paki Sup̃e:

⁹Waina e do mari tea warua maga waina eu mari sap̃o pei tea leousiusiana; Tea ni namagaana maga waina eu mari sap̃o pei tea veveatae‐ana:

¹⁰Waina e do pitua ki usa paki maramana, Po do dip̃aki lua noai maga paki vanua maga:

¹¹E do sike tea vakitano maga eu pakilagi; Go tea maga waina eu do susue eu pei tea vuasakeana paki namautipauriana.

¹²E do daperavera ki namidoakip̃otae‐ana ki tea p̃op̃o tagele, Go nam̃elearuda maga eu mari sa marimatua mau.

¹³E do puasoki tea manumatua maga namarimanumatuaana adeada: Go namidoaki‐p̃otae‐ana ki tea mari dagele e pei sarapa.

¹⁴Eu sua namaligo aleati, Po do dotogo aleati matua dapala e pe vei p̃ogi.

¹⁵Ma e do mautipauri namalepu m̃elu dua ki lova, Go tea rogokitesa m̃elu dua ki nam̃elearu ni tea kasua.

¹⁶Nalakena tea wanogoe tea tika maga eu peani naleogoroana, Go nawoka ni tea mari dagele ega vei tea worogoana.

¹⁷P̃a leo, namaropaana ki naatam̃oli waina Sup̃e e do pasa kasua ki nia: Nalakena tea wanogoe p̃a ta midoaki p̃alo ki navarati‐piseiki‐ana ki Tea Kasua Maau mau.

¹⁸Nalakena e do mari e pei wotu, po do kalutigoro e; E do atu, go nam̃elearuna e do moro maripauri.

¹⁹Ega wo paka latesa pualua ko ragi ni nariesokiana; Io, ega vaka larua, go te nasaana sikai ega wo da pakilina ki‐go mau.

²⁰Ragi ni navitoloana ega wo daulua ko pa dua ki namateana; Go ragi ni navakalo pa dua ki namarimatuaana ki lova.

²¹P̃a wo pei tea tasurukiana pa dua ki navululuana ni namena; Go p̃a wo da matau ki namarisakiana mau ragi waina ega wo umai.

²²P̃a wo muru ki namarisakiana go ki navitoloana; Go p̃a wo da matau ki nalo mila maga ni navanua mau.

²³Nalakena p̃a wo pei ta ni vatu maga ni vanua; Go nalo mila maga ni namalasi euga wo matemate paki‐go.

²⁴Go p̃a wo atae naga tap̃aup̃au anigo e doko dam̃ate doko; Go p̃a wo pa punusi loga anigo, go te navatuna ega ta puoli asa mau.

²⁵Go p̃a wo atae naga naworaworam̃a euga wo laapa, Go naga naworam̃a euga wo dapala nam̃enau ni navanua.

²⁶P̃a wo kapuara p̃ia po paki matigom̃a pano, Dapala nam̃im̃igoroana sikai ni korn ragi kakana.

²⁷P̃a leo, tea wanogoe au leousiusi a go e pei lomau; P̃a rogo e, go nigo p̃a tum̃am̃a atae a.