Read Nguna Togoa Etafe North YOB 6 Bible Online

YOB 6 - Nguna Togoa Etafe North bible

YOB 6

¹Go Yob e pasadara, po naga,

²Ako, eu pe rowogi narogokitesaana aginau Go namarisakiana aginau lasa rowogi sikai maau!

³E pe wo pei tea vap̃aiana naga e madaga liu naworaone ni natasi maga: Nalakena tea wanogoe a po pasa magamaga p̃alo.

⁴Nalakena nalua maga ki Tea Kasua Mau eu lawo au, Naatagu e do munu noai ni namateana kakada: Namatau‐ki‐Sup̃e‐ana maga eu do dum̃ada lawo ki da dip̃a au.

⁵Ass mila e do kai ragi waina e peani nam̃enau, kite? Oks e do mua ragi waina e do ganikani, kite?

⁶Navinaga malamala e mariatae pei tea kaniana natasimena e dika asa, kite? Malo tare ni atolu e pei navinaga lolo, kite?

⁷Naleo maga wanogoe naatagu e nunu sa ki da; Eu pei navinaga mamaragokiana paki nau.

⁸Ako, sei ega tua au tea waina a datago asa? Sup̃e e pe suasua dua au tea waina a do leogoro asa e pe wia!

⁹E pe vei namasauana ki Sup̃e naga ega mari p̃orosi au; Naga ega sai ki nam̃elearuna po daelua au!

¹⁰A pe veani navakavakaleana; A pe laelaea navitinuana nadodomiana e dika asa: Nalakena a da pasagoro navasaana maga ki Tea Tapu mau.

¹¹Nakasuaana aginau e pei nasava naga aga ko do leogoro? Nasava e doko raki namauriana aginau naga aga vei maritasokiparau?

¹²Nakasuaana aginau e pei nakasuaana ni vatu, kite? Kite nap̃okasigu e pei brass, kite?

¹³E da pei naga te nasilaeana e da doko au mau, kite? Go naga nawosiwosiana e da sava m̃elu dua kinau pano mau, kite?

¹⁴E one naatam̃oli one naga ega visei ki nadodomiana paki tana waina naatana e sirinopu, Waina e naga ega toropusi namatau‐ki‐Tea‐Kasua‐Mau‐ana.

¹⁵Ma taigu maga eu mari malauweluki, dapala noaisara sikai, Dapala nap̃ap̃a noai maga waina eu pano puoli;

¹⁶Waina eu loa nalakena aise, Waina sno e sili doko ara:

¹⁷Ragi ni navivitinuana eu sara: Ragi ni sui eu nunu puoli.

¹⁸Tea musamusa maga waina eu pae napua kakada eu dawasi; Eu sake paki masop̃alo pano, po puoli.

¹⁹Tea musamusa maga ni Tema eu leo, Taua maga ni Sheba eu leogoro ara.

²⁰Eu matamaliere nalakena eu peani naleogoroana; Eu rumai paki asa po saram̃akoto.

²¹Go nimu ku po dapala tea waina e da doko mau; Ku punusi tea mataukiana sikai po mataku.

²²Kinau a naga, Kuga tua au, kite? Kite, Ki naloriki animu kuga oli au asa, kite?

²³Kite, Kuga vualua au m̃elu dua ki nam̃elearu ni tea kokona? Kite, Kuga taulua au m̃elu dua ki nam̃elearu ni tea riesoki maga, kite?

²⁴Kuga vasa pisei ki nau, go aga vunuta: Go kuga mari au aga midoaki atae tea waina a sasap̃o asa.

²⁵Navasaana maga ni naleanaana eu marimatua! Ma navasa‐p̃okati‐ana animu e pei nasava?

²⁶Nimu ku midoa ki nia naga kuga vasa p̃okati navasaana, Go navasaana maga ki tea tika naleogoroana eu dapala nalagi, kite?

²⁷Io, nimu ku masauna naga kuga nadi ki gole paki namalepu, Po do pakokoto tamu.

²⁸Nalakena tea wanogoe kuga suasua naga kuga leo punusi au; Nalakena aga wo da sorosoro naraemu mau.

²⁹Kuga maradoa, a pavara ni mu asa, namarinaleotageleana ega tika; Io, kuga moro maradoa, navululuana aginau e leana.

³⁰Namarinaleotageleana e doko namenagu, kite? Namidodoana aginau e mari sap̃o atae p̃otae naleo sa maga, kite?