Read Nguna Togoa Etafe North YOB 8 Bible Online

YOB 8 - Nguna Togoa Etafe North bible

YOB 8

¹Go Bildad naatam̃oli ni Shuah e pasadara, po naga,

²Pa pa paki seve ragi p̃a wo pasa ki naleo maga wanogoe? Go pa pa paki seve ragi navasaana maga ni nawokam̃a euga wo dakiusi nalagi kasua sikai?

³Sup̃e e do p̃elukidoa navasap̃otaeana, kite? Tea Kasua Mau e do p̃elukidoa naleanaana, kite?

⁴Natum̃a maga eu pe mari naleo sa dip̃a e, Go nae e pe vitua ki da paki nam̃elearu ni natapiriana adeada:

⁵Nigo ku pe laaga parati ki Sup̃e, Po mari navavaraniana anigo paki Tea Kasua Mau;

⁶Ku pe tautau go leana; E pe wo manigo darapa, Po mari tokora tokoana ni namarinaleoleanaana anigo e pe wo disu p̃ia.

⁷Go ragi vea anigo e pe kiki, Ma ragi edaku anigo e pe wo disu p̃arua.

⁸Nalakena p̃a vusuusu ki tagona vea maga, a pavara ni ko asa, Po dum̃am̃a midoaki soki tea waina tamada maga eu leousiusi atae a:

⁹(Nalakena tu pei tea ni nanova, po da atae te navatuna mau, Nalakena naaleatia anigida maga doko maramana eu pei melu saikiana sikai:)

¹⁰Nara euga wo da pasa pisei ki‐go, po noakisai ko asa, Po lua ki navasaana maga m̃elu nap̃op̃oda, kite?

¹¹Nap̃araerae e mariatae pisou tokora waina nalepa e dika asa, kite? Nam̃enau matolu ni malo vuravura e mariatae ulua masale ki noai, kite?

¹²E pe mamalakesa doko po da pei tea tagaukotoviana mau, E pe wo kokolo ega vea ki sara nataputea maga.

¹³Napua maga ki tea mamau puti waina eu malio ki Sup̃e eu dapala nogoe; Go naleogoroana ki tea sigisigileo ega wo nunu puoli:

¹⁴Naviviariana aneana ega wo makoto, Navavatuana aneana e dakiusi nasum̃a ni kalao.

¹⁵Ega wo ovi soki nasum̃a aneana, ma ega wo da lawodu mau; Ega wo pua soki a, ma ega wo da du mau.

¹⁶E mamalakesa p̃ia narae ni elo, Go nasulina maga eu peravera usuraki roara aneana.

¹⁷Nakoana maga eu pivisigoro tagura ni vatu, E doko m̃aleoputo ni vatu maga doko.

¹⁸E pe vei tea mari‐puoli‐ki‐ana m̃elu dua ki naliana, E pe wo pasagoro e, po naga, A da punusi ko mau.

¹⁹P̃a leo, tea wanogoe e pei nasamasamaana ni napua aneana, Go tea p̃ota maga euga wo moro pisou m̃elu natano.

²⁰P̃a leo, Sup̃e ega wo da dip̃a doa naatam̃oli wialua sikai mau; Go ega wo da silae tea mari naleo sa maga mau.

²¹Ma ega wo mari nawokam̃a ega wo pura ki namuruana, Go nagolem̃a ki nakola‐laelaeaana.

²²Tea maga waina eu pilosi ko euga wo pei tea sugoroana ki namaliereana; Go tap̃aup̃au ki tea sigisigileo ega wo da moro doko mau.