Read Nguna Togoa Etafe North YOB 9 Bible Online

YOB 9 - Nguna Togoa Etafe North bible

YOB 9

¹Go Yob e pasadara, po naga,

²Io, e pei lomau, a atae a: Ma ega tapale sava naatam̃oli ega leana narae ni Sup̃e?

³E pe masauna naga ega vululu ki nia, E pe mari sa pasadara e te navatuna mau.

⁴Nae e pei p̃op̃o manumatua, go nakasuaana aneana e p̃arua: Sei e dum̃ana mari nap̃op̃ona e kasua dip̃a e, po disu p̃ia?

⁵Nae waina e disua ki tava maga, po dap̃olosiwo ki da namaetoana aneana, Go eu da atae a mau.

⁶Waina e durua ki lua maramana pa dua ki naliana, Go tip̃a kakana maga eu duruuru.

⁷Waina e dip̃aki elo go e da sake mau; Waina e pulusoki m̃asoe maga.

⁸Waina e sikina pitosi nakoroatelagi maga, Po pasi napeao maga ni natasi.

⁹Waina e mari Bear, go Orion, go Pleiades, Go em̃ago maga ni sauth.

¹⁰Waina e mari naleo warua maga, tea leousiusi‐sap̃o‐ana maga; Go tea ni namagaana maga waina eu mari sap̃o pei tea veveana.

¹¹P̃a leo, e do liu au, go a da punusi a mau: E surata pano ma a da leoatae a mau.

¹²P̃a leo, e do puapavakoto, go sei e mariatae dugoro e? Sei ega wo noa ki nia, Ku mari nasava?

¹³Sup̃e ega wo da dosa liliua ki namaetoana aneana mau; Tea silae maga ki Rahab eu do soki pakitano ki nia.

¹⁴Go kinau aga vasadara e ega tapale sava? Po matadoa navasaana aginau maga paki nia?

¹⁵A pe leana, ma a pe ta pasadara e mau; A pe mari navavaraniana paki tea vasap̃otae au.

¹⁶A pe vioso, go nae e pe vasadara au Ma a pe ta saralomau naga e pe taki dorogo paki nadaleogu mau.

¹⁷Nalakena e do marip̃oraworae au ki nalagi atu sikai, Po do mari wotu aginau maga eu laapa, nalakena e dika.

¹⁸E da doropusi au naga aga maromaaro mau, Ma e mari au a pura ki nakokonaana.

¹⁹E pe vei namaridogoana ni nakasuaana, p̃a leo, nae e pe kasua! Go e pe vei naleo sikai ni navasap̃otaeana, sei e pe mariatae pasa dip̃a e?

²⁰A pe leana, ma nawokagu e pe wo dip̃akotovi au: A pe wialua, ma e pe wo noasokisoki naga a dagele.

²¹Kinau a p̃ialua; a da dum̃agu midoa kinau mau; A sara‐tea‐p̃alo namauriana aginau.

²²Ma tea m̃oli; nalakena tea wanogoe a naga, E do mari puoli ki tea wialua go tea sigisigileo.

²³Namarisakiana e pe viragi namateana m̃araverave, E pe wo pasa saudoa ki narogokitesaana ki tea tautau.

²⁴Maramana e pei tea vituakiana paki nam̃elearu ni tea sigisigileo: E kulutigoro narae ni tea vasap̃otae kakana maga; Go e pe ta pei nae mau, e pe vei sei?

²⁵Naaleatia aginau maga eu do sava m̃araverave liu tea sava kasua sikai: Eu do sava pano, eu da do punusi tea wia mau.

²⁶Eu pano m̃araverave dakiusi rarua dakari maga: Dakiusi ikila waina e diri raki tea kaniana.

²⁷Ragi waina a naga, Aga wo malio ki narogokitesaana aginau, Aga wo doropusi navei‐rae‐saana aginau po marasike:

²⁸A matau ki sara narogokitesaana aginau maga, Nalakena a atae naga p̃a wo da noa naga sogi e puoli kinau mau.

²⁹Aga wo pei tea tip̃akotoviana; Go ekasana aga ko p̃osiwosi mawosa m̃oli?

³⁰A pe tum̃agu sarue au ki noai ni sno, Po mari nam̃elearugu maga ero pe tautau p̃ia;

³¹Ma nigo ku pe wo pupugi au m̃oru nalepa, Go sugoro aginau e pe wo mamarago kinau.

³²Nalakena e da pei naatam̃oli dakiusi au mau, naga aga vasadara e, Naga aroga rua umai paki navasap̃otaeana.

³³Tea surata papiliu namawota kakagami e pe toko, Waina e pe toropusi nam̃elearuna e pe toko sokota ki gami.

³⁴Waina e pe tape lua tiko aneana m̃elu dua kinau pano, Po da suasua naga namatakilakilakinia‐ana e pe mari au a pe mataku:

³⁵E pe tapala nogoe a pe vasa, po da matau ki nia mau; Ma e da dapala nogoe mau; kinau a sikigu doko.