Read Nguna Togoa Etafe North SALAMO 10 Bible Online

SALAMO 10 - Nguna Togoa Etafe North bible

SALAMO 10

¹Ekasana, Yehovah O, ku do lawodu uvea? Ekasana ku do dokoloku ragi maga ni nariesokiana?

²Ki nalomadagaana ni tea sigisigileo tea rogokitesa e pei tea kopaleleana kasua asa; Euga vei tea vuasokiana ki namidoakip̃otaeana maga waina eu dum̃ada midoa ki da.

³Nalakena tea sigisigileo e do pakavakae namasauana ni naatana, Go e do pasap̃ia ki tea tapepavakoto, e do pasadao Yehovah.

⁴Tea sigisigileo, pae navakilagiana ni naraena, e naga, Ega wo da datago asa mau. Namidodoana aneana maga mamau puti eu pei, Sup̃e e dika.

⁵Napua aneana maga eu kusua sara ragi; Navasap̃otaeana anigo maga eu pakilagi uvea ki naraena: Tea kokona ki nia maga mamau puti, e do pu‐ki‐dao ara.

⁶E noa nap̃op̃ona, Aga wo da parivari mau: Aga wo da doko sa mau pa pa paki tagona go tagona.

⁷Nawokana e pura ki navasasakiana go namarisoreana go natapepavakotoana: Namarisakiana go namarinaleotageleana ero doko etano ni namenana.

⁸E do doko tokora ni nakusugoroana ni natokoana kiki maga: E do maripunue tea waina sogi e dika asa tokora ni natokolokuana maga: Namatana ero do dokoloku raki tea silaeana tika.

⁹E do kusugoro tokora ni natokolokuana dakiusi laion tokora siliana aneana: E do kusugoro naga ega vuasoki tea rogokitesa: E do puasoki tea rogokitesa, ragi waina e puati a ki kup̃ena aneana.

¹⁰E do kusu, e do kolo pakitano, Go tea silaeana tika maga eu do dowo pae tea kasua aneana maga.

¹¹E noa nap̃op̃ona, Sup̃e e malio ki nia: E dasuru ki naraena; ega wo da punusi a mau pa pa ega tu mau du.

¹²P̃a tuleana, Yehovah O; Sup̃e O, p̃a sike nam̃elearum̃a: P̃a ta malio ki tea rogokitesa maga mau.

¹³Ekasana tea sigisigileo e pasadao Sup̃e, Po noa nap̃op̃ona, P̃a wo da datago asa mau?

¹⁴Ku punusi a; nalakena nigo ku do leopunusi namarisakiana go namaetoana, naga p̃a toropusi a nam̃elearum̃a: Tea silaeana tika e do dum̃ana doropusi a paki‐go: Nigo ku pei tea silae tea waina e pei namalepu.

¹⁵P̃a marip̃ori naru ni tea sigisigileo; Go naatam̃oli sa, p̃a wo laaga nasigisigileoana aneana pa pa p̃a wo da pap̃ai a mau.

¹⁶Yehovah e pei Nawota pa pa e du du po du mau du: Nalauna maga eu puoli m̃elu dua ki navanua aneana.

¹⁷Yehovah, ku dogo namasauana ki tea matemate maga: P̃a wo lawokilaketoko nap̃op̃oda, p̃a wo mari nadaligam̃a ega rogo:

¹⁸Naga p̃a vasap̃otae tea waina e pei namalepu go tea marip̃oworiana, Naga naatam̃oli waina e pei tea ni natano ega ta moro pei tea mataukiana mau.