Read Nguna Togoa Etafe North SALAMO 101 Bible Online

SALAMO 101 - Nguna Togoa Etafe North bible

SALAMO 101

¹Salamo sikai ki David. Aga wo lega nadodomiana go navasap̃otaeana: Yehovah O, aga wo lega‐samasamani ko.

²Aga wo marimanumatua pae napua wialua: P̃a wo umai punusi au seve ragi? Aga wo surata pae nawialuaana ni nap̃op̃ogu ekopu ni nasum̃a aginau.

³Aga wo da lawo ki te naleo sa sikai kivea ki namatagu maga mau: A pilosi namariana ki tea maga waina eu dawasi; Ega wo da puluti au mau.

⁴P̃op̃o tagele ega wo m̃elu dua ki nau pano: Aga wo da atae tea sa mau.

⁵Tea vasapinoa ki panako ki tana ri, aga wo mari a ega vunuta: Tea leolagi go tea p̃op̃o‐welewelea aga wo da mariatae soki a mau.

⁶Namatagu eroga wo doko tea veilomau maga ni navanua, naga euga toko sikoti au: Tea surata pae napua wialua, nae ega wo maginau suasua.

⁷Tea mari namarisoreana ega wo da doko ekopu ni nasum̃a aginau mau: Tea vasa nasorosoroana maga ega wo da pei tea lawokilaketokoana kivea ki namatagu maga mau.

⁸Sara malip̃ogi aga wo mari tea sigisigileo maga mamau puti ni navanua euga vunuta; Naga aga taelua puti tea mari namarinaleotageleana m̃elu dua ki natokoana ki Yehovah.