Read Nguna Togoa Etafe North SALAMO 103 Bible Online

SALAMO 103 - Nguna Togoa Etafe North bible

SALAMO 103

¹Salamo sikai ki David. P̃a vasap̃ia ki Yehovah, naatagu O; Go tea maga mamau puti ni nap̃alaugu, kuga vasa p̃ia ki nagisana tapu.

²P̃a vasap̃ia ki Yehovah naatagu O, Go p̃a ta malio ki puti namarim̃atakiana aneana maga mau:

³Waina e do manigo midoakikorokoro puti namarinaleotageleana anigo maga; Waina e do marilua puti nasasanaana anigo maga;

⁴Waina e do daulua namauriana anigo pa dua ki m̃orutano; Waina e do p̃auvau ki‐go ki nadodomiana go ki namaritadodomiana maga:

⁵Waina e do mari naatam̃a e maro ki tea wia; Dapala naveinatureaiana anigo e do pei tea maripaukiana dakiusi ikila.

⁶Yehovah e do mari namarinaleoleanaana maga, Go navasap̃otaeana maga magi tea maga mamau puti waina eu pei tea maripavakotoana.

⁷E mari napua aneana maga eu pei tea ataeana paki Moses, Namariana aneana maga paki Israel natuna maga.

⁸Yehovah e pei maritadodomi go e saup̃ia, E mari daliali namaetoana, go e p̃arua nadodomiana.

⁹Ega wo da pululu doko mau doko mau; Go ega wo da mauti namaetoana aneana pa pa ega tu mau du mau.

¹⁰E da mari paki gida pae namarinaleosaana anigida maga mau, Go e da lagati dua gida pae namarinaleotageleana anigida maga mau.

¹¹Nalakena dapala waina nakoroatelagi e pakilagi dap̃au maramana, Nadodomiana aneana e marimatua dap̃au tea maga waina eu matau ki nia.

¹²Dapala waina elo sake e madu uvea ki elo musu, E mari natapiriana anigida maga eu madu uvea ki gida.

¹³Dapala waina tama ni piakiki e do maritadodomi natuna maga, Yehovah e do maritadodomi tea maga waina eu do matau ki nia.

¹⁴Nalakena nae e atae namaridawonakiana kakagida; E do midoa ki nia naga tu pei nam̃otam̃ota.

¹⁵Naatam̃oli, naaleatia aneana maga eu dapala nam̃enau; Dapala napum̃a ni vanua, e do pum̃a dapala nogoe.

¹⁶Nalakena nalagi sikai e duagoto asa, go e da doko mau; Go tokora kakana ega wo da moro atae a mau.

¹⁷Ma nadodomiana ki Yehovah e doko pae tuai mau pa pa paki tuai mau e doko tea maga waina eu do matau ki nia, Go namarinaleoleanaana aneana e pei agi natuda natuda maga;

¹⁸E pei agi tea maga waina eu do pavaigoro navasasokiana aneana. Go agi tea maga waina eu do midoa ki navasaparatikiana aneana maga naga euga mari ra.

¹⁹Yehovah e lawokilaketoko malo tasake aneana nakoroatelagi maga; Go namarakiana aneana e do maramara dap̃au tea maga mamau puti.

²⁰Kuga vasap̃ia ki Yehovah, agelo aneana maga: Tea marimatua ni nakasuaana, waina ku do mari navasaana aneana, Waina ku do dogo parati ki nadaleo ni navasaana aneana.

²¹Kuga vasa p̃ia ki Yehovah, taua aneana maga mamau puti; Tea suasua aneana maga, waina ku do mari namasauana aneana.

²²Kuga vasap̃ia ki Yehovah, nawosiana aneana maga mamau puti, Waina ku doko tokora maga mamau puti ni namarakiana aneana: P̃a vasap̃ia ki Yehovah, naatagu O.