Read Nguna Togoa Etafe North SALAMO 104 Bible Online

SALAMO 104 - Nguna Togoa Etafe North bible

SALAMO 104

¹P̃a vasap̃ia ki Yehovah naatagu O. Yehovah Sup̃e aginau O, ku p̃arua p̃arua liu; Ku pei tea sugoroana ki nadodomadaganiana go natatap̃auana.

²Ku do dum̃am̃a kovagoro ko ki namarama dapala sugoro sikai; Ku do sai ki nakoroatelati maga dapala tea kovagoro sikai:

³Waina e do nadi ki sila maga ni em̃ago ni elagi aneana maga eu doko noai maga; Waina e do mari napopouru maga eu pei kariot aneana; Waina e do pano doko nalivaru maga ni nalagi:

⁴E do mari nalagi maga eu pei tea tautauana aneana maga; Tea suasua aneana maga eu pei nakapu waina e soro:

⁵E lawo ki maramana e doko laketano kakana maga, Ega wo da parivari te naaleatia mau pa pa ega tu mau du.

⁶Ku dap̃augoro e ki epua dapala sugoro sikai; Noai maga eu lawodu elagi ki tava maga.

⁷Nalakena navasakasuaana anigo eu sava pano; Nalakena nadaleo ni tovae anigo eu dam̃alua pano;

⁸Eu sake tava maga, eu siwo nap̃aloa maga, Paki tokora waina ku madeada lawo ki nia.

⁹Ku lawo ki kokoi sikai, euga wo da liu sa mau; Euga wo da moro liliu naga euga dap̃augoro maramana mau.

¹⁰Waina e do dip̃akilua namata ni noai maga paki nap̃aloa maga; Eu do sara namawota ni tava maga:

¹¹Eu do pitua ki namunuana paki sara nalo mila ni namalasi; Ass mila maga eu do marikotovi namadouana adeada.

¹²Manu maga ni nakoroatelagi eu do doko elagi ki da, Eu do pitua ki nadaleoda pae m̃aleoputo ni ara maga.

¹³E do pue tava maga pae em̃ago ni elagi aneana maga: Maramana e pura ki nawa ni nawosiana anigo maga.

¹⁴E do magi katel maga mari nam̃enau e ulua, Go tea malakesa agi nawosiana ni nalalawoana ki naatam̃oli; Naga ega viragi navinaga ega tave m̃elu natano:

¹⁵Go waine waina e do mari nap̃op̃o ni naatam̃oli e laelaea, Naga ega mari naraena ega giregire p̃arua liu naroro, Go navinaga waina e do silae nap̃op̃o ni naatam̃oli.

¹⁶Nakau maga ki Yehovah eu puravura; Sidar maga ni Lebanon waina e lawo ra;

¹⁷Waina manu kiki maga eu do mari vete adeada maga ara: Ova, paine maga eu pei nasum̃a aneana.

¹⁸Tava maga tea vakilagi maga eu pei agi naninani mila maga; Vatu laketoko maga eu magi koni maga pei tokora ni nasavasiliana.

¹⁹E mari atelagi e pei agi ragi maga: Elo e atae namusuana aneana.

²⁰Ku do mari namaligo, go e po pei p̃ogi; Waina sara nalo mila ni namalasi eu do dave pano asa.

²¹Laion tureai maga waina eu do uru raki tea kati‐p̃oraworaeana, Go naga euga tatagovi Sup̃e ki navinaga adeada.

²²Elo e do sake, eu do pei tea saisaikiana, Po do one natano valeada maga.

²³Naatam̃oli e do dave paki nawosiana aneana pano, Go paki nalalawoana aneana pa pa paki ragi melu.

²⁴Yehovah O, nawosiana anigo maga eu laapa pa! Ku mari puti ra pae namanumatuaana: Maramana e pura ki nasogolapaana anigo maga.

²⁵Natasi waia, tea warua go tea welewelea ni taleva dua, Waina tea kakaravi maga waina eu mari sa pei tea veveana eu doko asa, Nalo mauri kiki maga sikoti tea warua maga.

²⁶Tokora wanogoe shipe maga eu do sava asa; Leviathan waia, waina ku maridawona ki nia naga ega p̃arop̃aro asa.

²⁷Eu mamau puti do leogoro ako, Naga p̃a tua ra navinaga adeada ragi kakana.

²⁸Ku do dua ra eu do pilae; Ku do pukesi nam̃elearum̃a, eu do puka ki tea wia.

²⁹Ku do dasuru ki naraem̃a, eu do m̃anaunau; Ku do dapelua nameroda, eu do mate, Po do liliu paki nam̃otam̃ota kakada.

³⁰Ku do dip̃akilua naatam̃a, eu do pei tei tawonakiana; Go ku do maripau ki narae ni natano.

³¹Nasamasamaana ni Yehovah ega tu po du mau du; Yehovah ega laelaea nawosiana aneana maga:

³²Waina e do leopunusi maramana, go e do durururu; E do kisidogo tava maga, go eu do asua.

³³Aga wo lega ki Yehovah ragi ni namauriana aginau: Aga wo lega samasamani Sup̃e aginau ragi ni natokoana aginau.

³⁴Namidodoana aginau ega wo gagadi paki nia: Kinau aga wo laelaea Yehovah.

³⁵Tea mari naleo sa maga euga sirinopu m̃elu dua ki maramana, Go tea sigisigileo maga euga ta moro doko mau. P̃a vasap̃ia ki Yehovah, naatagu O, Kuga samasamani Yah.