Read Nguna Togoa Etafe North SALAMO 105 Bible Online

SALAMO 105 - Nguna Togoa Etafe North bible

SALAMO 105

¹Kuga vasadodom̃ata ki Yehovah, kuga vioso ki nagisana; Kuga mari namariana aneana maga euga vei tea ataeana m̃aleoputo ni nalauna maga.

²Kuga lega ki nia, kuga legasamasamani a; Kuga noa nawosiana ni namagaana aneana maga mamau puti.

³Kuga vakavakae nagisana tapu: Nap̃op̃o ni tea maga waina eu do laaga Yehovah euga to laelaea.

⁴Kuga laaga Yehovah go nakasuaana aneana; Kuga laaga naraena sara ragi.

⁵Kuga midoa ki nawosiana ni namagaana aneana maga waina e mari ra; Navaivaiana aneana maga, go navasap̃otaeana maga ni nawokana;

⁶Nimu naworawora ni Abraham tea suasua aneana, Nimu Yakob natuna maga, tea matadoaana aneana maga.

⁷Nae e pei Yehovah Sup̃e anigida: Navasap̃otaeana aneana maga eu doko maramana mamau.

⁸E midoa ki navasasokiana aneana pa pa e du mau du, Navasaana waina e magi tagona manu sikai dip̃a ki nia;

⁹Navasasokiana waina e mari a paki Abraham, Go navivisaana aneana paki Isaak;

¹⁰Go e lawosoki a paki Yakob naga ega vei natawonakiana sikai, Paki Israel naga ega vei navasasokiana waina ega tu mau du.

¹¹E naga, Aga wo dua ko navanua ni Kanaan, Laine totowo ni tea veanipiolikiana animu:

¹²Ragi waina eu ko pei naatam̃oli visa maau, Tea visa maau sa, go nam̃enaki‐atatoko asa;

¹³Go eu surata pasara pae nalauna paki nalauna, Pae namarakiana sikai pa punusi narei p̃ota sikai.

¹⁴E da suasua ki te naata naga ega maripavakoto paki da mau; Go e pasa kasua ki nawota maga nalakena nara;

¹⁵E naga, Kuga ta kisidogo tea vuvuraikiana aginau maga mau, Go kuga ta mari sa ki profeta aginau maga mau.

¹⁶Go e soso navitoloana sikai e umai paki navanua; E marip̃oriwori sara tiko ni navinaga.

¹⁷E dip̃akilua naatam̃oli sikai e pea ki da; Yosef e pei tea soriana naga ega vei naviti sikai:

¹⁸Eu mari natuana ero pitinu ki tea moti; E pei tea motiana ki namori ni airon maga:

¹⁹Pa pa paki ragi waina navasaana aneana e lolomana; Nanoaana ki Yehovah e maridogo e.

²⁰Nawota e dip̃akilua po peresi a; Tea maraki nalauna maga, go e p̃olagati a.

²¹E mari a e pei nawota ni nasum̃a aneana, Go tea maramara ni nasogolapaana aneana mamau:

²²Naga ega soli tea maraki aneana maga ragi waina e masauna, Go naga ega mari tea matua aneana maga euga manumatua.

²³Go Israel e umai paki Ityipt; Go Yakob e m̃enaki‐atatoko navanua ki Ham.

²⁴Go e mari narei aneana eu pavakawora p̃arua, Po mari ra eu kasua liu tea maga waina eu kokona ki da.

²⁵E doa nap̃op̃oda naga euga vilosi narei aneana, Naga euga marisore paki tea suasua aneana maga.

²⁶E dip̃akilua Moses, tea suasua aneana, Go Aaron waina e matadoa e.

²⁷Ero doropusi navasaana maga ni navaivaiana aneana maga m̃aleoputo kakada, Go tea ni namagaana maga navanua ki Ham.

²⁸E dipakilua namaligo, po mari a e maligo; Go eu da marip̃auluulu paki navasaana aneana maga mau.

²⁹E doa noai adeada maga eu pei nada, Go e maripunue naika adeada maga.

³⁰Navanua adeada e pura ki frok maga, Ekopu ni em̃ago maga ki nawota adeada maga.

³¹E pitip̃aki, go lago e umai, Go kutu maga usuraki navanua adeada mamau.

³²E dua ra usa ni vatu e oli usa, Go mena maga ni nakapu doko navanua adeada.

³³Go e atugi vaine adeada maga go napuliva adeada maga; Po marip̃oriwori nakau maga ni navanua adeada mamau.

³⁴E pitip̃aki, go midiri e umai, Go uraasi, waina eu mari sap̃o pei tea veveana,

³⁵Po gani sara nataputea ni navanua adeada, Po gani nawa ni natano adeada.

³⁶Go e atugi takalapa maga mamau puti ni navanua adeada, Takavea maga ni nakasuaana adeada mamau.

³⁷Go e piragilua ra eu m̃elu pilake silver go kold: Go tea manainai sikai e da doko m̃aleoputo ni naworawora aneana maga mau.

³⁸Ityipt e laelaea ragi waina eu m̃elu pano; Nalakena namatau‐ki‐da‐ana e dowo ara.

³⁹E p̃elesa ki napopouru sikai naga ega vei tea tap̃augoro sikai; Go nakapu naga ega maramalaga p̃ogi.

⁴⁰Eu datago, go e piragi kuel maga eu rumai, Po mari ra eu puka ki navinaga ni nakoroatelagi.

⁴¹E p̃olagati vatu laketoko sikai, go noai maga eu sara dave; Eu sara tokora garagara maga dapala noai sara sikai.

⁴²Nalakena e midoa ki navasaana tapu aneana, Go Abraham tea suasua aneana.

⁴³Go e piragilua narei aneana eu m̃elu pilake nalaelaeaana, Tea matadoaana aneana maga pilake nakolalaelaeaana.

⁴⁴Go e dua ra navanua maga ki nalauna maga; Go eu dape peani nawosiana ki narei maga:

⁴⁵Naga euga vavaigoro natawonakiana aneana maga, Po dogo parati ki nawotaeana aneana maga. Kuga samasamani Yah.