Read Nguna Togoa Etafe North SALAMO 106 Bible Online

SALAMO 106 - Nguna Togoa Etafe North bible

SALAMO 106

¹Kuga samasamani Yah. Kuga vasadodom̃ata ki Yehovah; nalakena e p̃ia: Nalakena nadodomiana aneana e du mau du.

²Sei ega wo noa namarimatuaana maga ki Yehovah? Sei ega wo mari nasamasamaniana mamau ega vei tea rogoana?

³Ae namaropaana ki tea maga waina eu do pavaigoro navasap̃otaeana, Go ki tea waina e do mari namarinaleoleanaana sara ragi!

⁴P̃a midoa ki nau, Yehovah O, pilake nasaup̃iaana waina e paki narei anigo; P̃a umai punusi au pilake namautipauriana anigo:

⁵Naga aga leo punusi doko nawiaana ki tea matadoaana anigo maga, Naga aga laelaea doko nalaelaeaana ki nalauna anigo, Naga aga vakavakae sikoti tea veaniana anigo.

⁶Au mari naleo sa sikoti tamagami maga, Au mari naleo tagele, au mari nasigisigileoana.

⁷Tamagami maga eu da midoakiatae nawosiana ni namagaana anigo maga Ityipt mau; Eu da midoa ki nalapalapaana ni nadodomiana anigo maga mau; Ma eu marip̃auluulu pisari natasi, Natasi Miala.

⁸Ma e mautipauri ra nalakena nagisana, Naga ega mari namarimatuaana aneana ega vei tea ataeana.

⁹Go e pasa kasua ki Natasi Miala, go e garagara: Go e mari ra eu surata duaduru epua maga, dapala masop̃alo sikai.

¹⁰Go e mautipauri ra m̃elu dua ki nam̃elearu ni tea vilosi, Po daulua ra m̃elu dua ki nam̃elearu ni tea kokona.

¹¹Go noai maga eu dap̃augoro tea maga waina eu diesoki ra: Sikai kakada e da doko mau.

¹²Go eu saralomau navasaana aneana maga; Eu lega‐samasamani a.

¹³Eu mari m̃araverave, eu malio ki nawosiana aneana maga; Eu da leogoro namidoakip̃otaeana aneana mau:

¹⁴Go eu masau navinaga p̃arua masop̃alo, Po maridogo Sup̃e maso maladi.

¹⁵Go e dua ra tea waina eu datago asa; Po dip̃akilua nam̃aguraana paki naatada.

¹⁶Go eu doitoi Moses tokora ni nam̃enakiana, Go Aaron tea tapu ki Yehovah.

¹⁷Natano e maga po dinomi Dathan, Po donigoro taua ki Abiram.

¹⁸Go nakapu sikai e pei tea tokoniana taua adeada; Go mena ni nakapu e sorovi tea sigisigileo maga.

¹⁹Eu mari kau natuna anoai sikai Horeb, Po suai natano paki nasup̃e takiana sikai.

²⁰Go eu surupioli ki nasamasamaana adeada. Raki nunu ni oks sikai waina e do gani nam̃enau.

²¹Eu malio ki Sup̃e waina e mautipauri ra, Waina e mari tea warua maga Ityipt;

²²Tea ni namagaana maga navanua ki Ham, Tea mataukiana maga Natasi Miala.

²³Go e noa naga ega marisa ki da, Ma Moses tea matadoaana aneana e lawodu naraena tokora marip̃oraeana, Naga ega mari namaetoana aneana ega liliu pa dua ki namarisakiana.

²⁴Go eu midoakip̃alo ki navanua masauniana, Eu da saralomau navasaana aneana mau.

²⁵Go eu dauruuru ekopu ni tap̃aup̃au adeada maga, Eu da dogo parati ki nadaleo ni Yehovah mau.

²⁶Go e sike nam̃elearuna paki da, Naga ega mari ra euga rowo masop̃alo:

²⁷Go naga ega mari naworaworada euga rowo m̃aleoputo ni nalauna maga, Go naga ega taperavera ki da usuraki navanua maga.

²⁸Go eu puluti Baal‐peor, Po gani naviriana maga paki tea mate maga.

²⁹Go eu mari a e maeto ki namariana adeada maga; Go naatugiana e dave duap̃ora paki da.

³⁰Go Finehas e duleana po pasap̃otae: Go naatugiana e pei tea tugoroana.

³¹Go e maneana pei tea midoakiana naga e pei namarinaleoleanaana, Pa pa paki tagona go tagona pa pa e du mau du.

³²Go eu mari a e maeto pisari noai maga ni Meribah, Go e sa ki Moses nalakena nara:

³³Nalakena eu marip̃auluulu paki naatana, Go e pasa pele ki nagolena maga.

³⁴Eu da mari sa ki narei maga mau, Waina Yehovah e noa ki da ara;

³⁵Ma eu sari nalauna maga, Po ataedogo nawosiana adeada maga:

³⁶Go eu magi nasup̃e adeada maga suasua; Waina eu pei vaivai sikai paki da:

³⁷Go eu maripunue natuda naanoai maga go natuda nagoroi maga eu pei naviriana paki dimon maga,

³⁸Go eu da ki nada tautau, nada ni natuda naanoai maga go ni natuda nagoroi maga, Waina eu maripunue ra eu pei naviriana paki nasup̃e maga ni Kanaan; Go navanua e pei tea mariana e loa ki nada.

³⁹Go eu dum̃ada mari ra eu loa ki nawosiana adeada maga, Po maripele pano ki namariana adeada maga.

⁴⁰Go namaetoana ki Yehovah e pavaga dip̃a narei aneana, Go e mamarago ki tea veaniana aneana.

⁴¹Go e pitua ki da paki nam̃elearu ni nalauna maga; Go tea maga waina eu pilosi ra eu maramara dap̃au ra.

⁴²Go tea kokona ki da maga eu diesoki ra, Go eu pei tea mariana eu ditip̃atua etano ki nam̃elearuda.

⁴³E paka laapa pualua ra; Ma nara eu do marip̃auluulu ki namidoakip̃otaeana adeada, Po pei tea viragiana pakitano ki namarinaleotageleana adeada.

⁴⁴Ma e leopunusi nariesoki‐ra‐ana, Ragi waina e dogo nakuapiosoana adeada:

⁴⁵Go e madeada midoa ki navasasokiana aneana, Po midoakipiri pae nalapalapaana ni nadodomiana aneana maga.

⁴⁶Go e dua ra namaritadodomiana narae ni tea maga mamau puti waina eu piragiluapavakoto ara.

⁴⁷P̃a mautipauri gami, Yehovah Sup̃e aginami O, Go p̃a viragi‐saisai ki gami m̃elu dua ki nalauna maga, Naga auga vasadodom̃ata ki nagisam̃a tapu, Go naga auga vakavakae nasamasamani‐ko‐ana.

⁴⁸Yehovah, Sup̃e ki Israel, ega vei tea vasap̃iakiana, Ega vae tuai mau pa pa paki tuai mau, Go narei mamau euga naga, Amen. Kuga samasamani Yah.